Gawa 6:1-15
6 Natan diad sarayan agew, sanen ondarakel la iray disipulo, saray Judion mansasalitay Griego et nanreklamo ed saray Judion mansasalitay Hebreo, lapud napapaulyanan iray bibiin balo ed limog da diad inagew-agew a panagbunog.
2 Kanian tinawag na labindua so dakel ed saray disipulo tan inkuan da: “Aliwan manepeg a paulyanan mi so salita na Dios pian mangibunog na naakan diad saray lamisaan.
3 Kanian, agagi, mananap kayo ed limog yo na pitoran lalaki a maabig so reputasyon da, a napno ray espiritu tan karunongan, ta pian sikaray turoen mi a mangasikaso ed sayan importantin kimey;
4 balet sikami et usaren mi so amin a panaon tan biskeg mi diad panagpikasi tan diad ministeryo nipaakar ed salita.”
5 Tan aliketan so amin a disipulo ed imbaga na saray apostol tan pinili ra si Esteban, sakey a lakin napno na pananisia tan masanton espiritu, tan si Felipe tan si Procoro tan si Nicanor tan si Timon tan si Parmenas tan si Nicolas, a sakey a proselita* a taga Antioquia;
6 tan inyarap da ra ed saray apostol, tan kayari ran nampikasi, intapew da iray lima ra ed sikara.
7 Lapud saya et nantultuloy a binmulaslas so salita na Dios, tan nantultuloy a dinmakel iray disipulo ed Jerusalem; tan dakdakel a saserdote so nagmaliw a mananisia.
8 Natan si Esteban, a napno na kaabigay-linawa tan pakayari, so manggagawa na angkakabaleg iran pakelaw tan tanda ed saray totoo.
9 Balet walay pigaran lalaki a kabiangan ed grupo a tatawagen a Sinagoga na Saray Imbulos, tan saray taga Cirene tan Alejandria tan saramay taga Cilicia tan Asia, ya akisuppiatan ed si Esteban.
10 Ingen ta agda nadaeg so karunongan tan say espiritu a mangiwawanwan ed sikato a mansalita.
11 Diad saman et walaray totoo a masekreton kinombinse ra a mangibagan: “Sikatoy nadngel min mansasalita na agpanamagalang ed si Moises tan ed Dios.”
12 Tan sinugsogan da iray totoo tan saray mamasiken tan saray eskriba, tan sikatoy dinago ran tampol, tan puersaan dan inala tan inyakar ed Sanhedrin.
13 Tan angiyarap ira na palso iran testigo, ya angikuan: “Sayan too et ag-ontutundan mansasalita sumpad sayan masanton pasen tan sumpad Ganggan.
14 Singa bilang, nadngel min imbaga to a sayan pasen et igeba nen Jesus a Nazareno tan umanen to met iray kustombre ya inter nen Moises ed sikatayo.”
15 Tan legan a sikatoy sankanengneng na saramay amin ya akayurong diad Sanhedrin, anengneng da a say lupa to et singa lupay anghel.
