Gawa 15:1-41

15  Et walaray lalakin linmasur a nanlapud Judea tan imbangat da ed saray agagi: “Agkayo nilaban no agkayo nasegat unong ed ganggan nen Moises.”  Balet sanen agla makapitalosan si Pablo tan Bernabe ed sikara tan nansasangsangan ira, nandesisyon iray agagi ya ibaki si Pablo tan Bernabe tan say arum ed sikara diad saray apostol tan mamasiken ed Jerusalem pian pantongtongan iyan nansasangsangan da.  Kanian kayari na impangipatnubang ed sikara na kongregasyon, nambiahe irayan lalaki tan sinmamar ira ed Fenicia tan Samaria, ya inistorya day nipaakar ed impakakomberte na saray totoo na nasyones, tan aliketan a maong so amin ya agagi lapud sikara.  Kasabi ra ed Jerusalem, maabig so impangawat ed sikara na kongregasyon tan saray apostol tan saray mamasiken, tan insalaysay da so dakel a ginawa na Dios diad panamegley da.  Ingen, inmalagey so arum ed saramay anisia a datin kabiangan na sekta na saray Fariseo tan inkuan da: “Kaukolan a sikaray segaten tan bilinen a mangunor ed ganggan nen Moises.”  Tan nantitipon iray apostol tan saray mamasiken pian pantongtongan da iyan bengatla.  Natan, kayari na dakel a sangsangan, inmalagey si Pedro tan inkuan to ed sikara: “Agagi, kabkabat yo a manlapu la nen inmuuna iran agew et pinili ak na Dios ed limog yo ta pian diad panamegley ko et narengelan na saray totoo na nasyones so salita na maong a balita tan manisia ra;  tan say Dios, a makaamta na walad puso, so nantasi diad impangiter to ed sikara na masanton espiritu, a singa ginawa to met ed sikatayo.  Tan parehoy impantrato to ed sikatayo tan sikara, tan nilinisan toy kapusoan da lapud pananisia ra. 10  Natan sirin, akin et susuboken yo so Dios, ya ipapasakbat yo ed saray disipulo so sakey a pako ya ag-ayarian a sakbaten na inmuunan atateng tayo odino sikatayo? 11  Balet, sikatayoy manmatalek a nilaban itayo diad panamegley na agnaparaan a kaabigan na Katawan a Jesus a singa met ed saraman a totoo.” 12  Diad saman et dinmeen so amin a totoo, tan dinmengel ira ed si Bernabe tan Pablo a mangisasalaysay na dakel iran tanda tan pakelaw a ginawa na Dios ed limog na saray nasyon diad panamegley da. 13  Sanen asumpal la ra, nansalita si Santiago, a kuan to: “Agagi, dengel yo ak. 14  Malinlinew ya insalaysay nen Simeon* no panon a diad unonan pankanawnawa et inimano na Dios iray nasyon pian mangala ed sikara na totoon parad ngaran to. 15  Tan mitunosan ed saya iray salita na saray Propeta, unong a nisulat, 16  ‘Kayari na sarayan bengatla et ompawil ak tan iletneg ko lamet so nagban abung* nen David; tan apigeren ko iray deral na satan tan ipaalagey ko lamet itan, 17  ta pian saramay nakeraan ed sarayan totoo et masimoon dan anapen si Jehova, pati saray totoo na amin a nasyones, saray totoon tatawagen ed ngaran ko, kuan nen Jehova, a manggagawa ed sarayan bengatla, 18  ya amta la nensaman ni.’ 19  Kanian say desisyon ko et agla gonigonen iramay totoo na saray nasyon ya ontutumbok ed Dios, 20  noagta sulaten ira ya arawian da iray bengatlan adutakan na saray idolo tan say pilalawanan* tan saray binikkel ya ayayep tan say dala. 21  Ta manlapu la nensaman et naynay a walaray mangipupulong ed si Moises diad kada syudad, lapud saray insulat to et babasaen a maksil diad saray sinagoga kada sabaton.” 22  Diad saman, nampapaknaan na saray apostol tan saray mamasiken pati say interon kongregasyon a mangibaki ra na pinilin lalaki ed limog da ya onla ed Antioquia a kaiba nen Pablo tan Bernabe, salanti, si Judas a tinawag a Barsabas tan si Silas, a lalakin mangidadaulo ed limog na saray agagi, 23  tan insulat da: “Saray apostol tan saray mamasiken, parad saramay agagi ed Antioquia tan Sirya tan Cilicia a nanlapud saray nasyon: Pinablin Agagi! 24  Lapud nadngel mi a walaray agagi ed limog mi a manggugulo ed sikayo diad saray paliwawa ra, a gogotgoten day nonot yo, anggano anggapon balot so ingganggan mi ed sikara, 25  nankakasakeyan tan nampapaknaan mi so mamili na lalaki ya ibaki ed sikayo a kaiba na saray pinabpabli tayo, si Bernabe tan si Pablo, 26  ya inrisga ray bilay* da nisengeg ed ngaran na Katawan tayon Jesu-Kristo. 27  Ibaki mi sirin si Judas tan si Silas, ta pian nisalaysay da met iraya ed sikayo. 28  Ta tinulongan kami na masanton espiritu pian makapandesisyon kami ya agla aruman so sasakbaten yo, nilikud ed sarayan nakaukolan a bengatla, 29  ya itultuloy yon arawian iray bengatlan imbagat ed saray idolo tan say dala tan saray binikkel ya ayayep tan say pilalawanan. No manalwar kayon maong ed sarayan bengatla, onaligwas kayo. Maong komon so bunigas yo!” 30  Kanian, sanen nibaki la irayan lalaki, linma ra ed Antioquia, tan tinipon da so dakel a disipulo tan inyawat da so sulat ed sikara. 31  Kayari ran binasa itan, nanliketan day panamaseseg. 32  Tan lapud si Judas tan Silas et propeta met, pinaseseg da iray agagi diad panamegley na dakel a paliwawa tan pinabiskeg da ra. 33  Kanian, kayari na impamalabas day pigaran panaon, pinasipot ira na saray agagi tan pinirawat dan makapawil iran mareen ed saramay angibaki ed sikara. 34*  —— 35  Balet, nansiansia ni ed Antioquia si Pablo tan Bernabe, a nambabangat ira tan kaiba ra met so dakel ni ya angipulong ed maong a balita na salita nen Jehova. 36  Kayari na pigaran agew, inkuan nen Pablo ed si Bernabe: “Gala, ompawil ta la tan bisitaen ta ray agagi ed kada syudad ya angipulongan ta na salita nen Jehova pian nanengneng ta so kipapasen da.” 37  Et labalabay nen Bernabe ya itagar met si Juan, a tinawag a Marcos. 38  Balet parad si Pablo et sikatoy agmanepeg ya ipila ta tinaynanan to ra ed Pamfilia tan agto la ra inibaan ed kimey. 39  Lapud saya et agawa so ampetang a sangsangan, kanian nansian iran dua; tan intagar nen Bernabe si Marcos tan nambarko ra ya amaarap ed Ciprus. 40  Pinili nen Pablo si Silas tan linma la kayarin sikatoy inmatalek na agagi ed agnaparaan a kaabigan nen Jehova. 41  Tan niliber toy Sirya tan Cilicia, a pinapabiskeg to iray kongregasyon.

Paimanod leksab

Gaw 15:14 * Sananey nin ngaran nen Simon (Pedro).
Gaw 15:16 * Odino, “kobongkobong.”
Gaw 15:20 * Sayan salita et manutukoy ed amin a klase na agmanepeg a seksual a relasyon. Nengnengen so Apendise 4.
Gaw 15:26 * Literal, “kamarerwa.”
Gaw 15:34 * Nengnengen so paimano ed leksab na Mat 17:21.