Gawa 17:1-34

17  Sikara natan so nambiahe a dinmalan ed Amfipolis tan Apolonia tan akasabi ra ed Tesalonica, a diman et walay sinagoga na saray Judio.  Kanian unong ed niyugali la nen Pablo et sikatoy linmoob diman, tan diad taloran nantutumbokan a sabaton et sikatoy akikatunongan ed sikara manlapud Kasulatan,  ya impaliwawa tan pinaneknekan to ed panamegley na saray reperensya a say Kristo et kaukolan a manirap tan onoli manlapud inaatey, a kuan to: “Saya so Kristo, sayan Jesus ya ipupulong ko ed sikayo.”  Lapud saya et nagmaliw a mananisia so arum ed sikara tan akila ra ed si Pablo tan Silas, tan ontan met so ginawa na dakerakel ed saray Griego a mandadayew ed Dios tan dakel ed saray maimpluensyan bibii.  Balet saray Judio, a nagmaliw a maimon, so angitagar na pigaran mauges a lalaki ya akar-akar labat ed tindaan, tan anugyop ira na sakey a grupo tan ginulo ray syudad. Tan nilooban day abung nen Jason tan inanap da ra pian awiten da ra ed saray magulon totoo.  Sanen agda ra aromog, si Jason tan say pigaran agagi so inggayugoy da ed saray manuley na syudad, ya iyeeyag da: “Wadia met irayan lalaki a manggugulo ed amin a pasen,  tan sayan Jason so amarawes ed sikara. Tan amin irayan totoo et onsusumpa ed saray ganggan nen Cesar, ya ibabaga ran walay sananey ya ari, si Jesus.”  Et agulo iray totoo tan saray manuley na syudad sanen nadngel da iraya;  tan sanen akala la ray magenap a piyansa ed si Jason tan ed arum ni ra, imbulos da ra. 10  Diad saman a labi et tampol ya imbaki na saray agagi si Pablo tan Silas diad Berea, tan kasabi ra et linmoob ira ed sinagoga na saray Judio. 11  Et magmaong so kanonotan na saray Judio ed Berea nen saramay walad Tesalonica, lapud akaparaan a maong so nonot dan angawat ed salita, a maalwar dan uusisaen so Kasulatan ya inagew-agew no kasin tua irayan bengatla. 12  Kanian dakel ed sikara so nagmaliw a mananisia, ontan met ed dakel a galgalangen a Griegon bibii tan lalaki. 13  Balet sanen akabatan na saray Judio ed Tesalonica a say salita na Dios et inyabawag met nen Pablo diad Berea, sikaray linma met diman pian sugsogan tan guloen iray totoo. 14  Diad saman et tampol a pinaonla na saray agagi si Pablo anggad baybay, balet tinmilak ni diman si Silas tan si Timoteo. 15  Balet, saramay angipatnubang ed si Pablo et akila ed sikato anggad Atenas, tan kapangawat da ed ganggan a no nayari et paonlaen da lan tampol ed sikato si Silas tan Timoteo, sinmipot la ra. 16  Natan legan ya aalagaren ira nen Pablo ed Atenas, naalipanesan so espiritu to diad impakanengneng to a say syudad et napno na saray idolo. 17  Kanian sikatoy akikatunongan ed saray Judio tan ed arum nin totoo a mandadayew ed Dios diad sinagoga tan diad saramay nababanaan to ed tindaan ed inagew-agew. 18  Balet akisuppiatan ed sikato so pigara ed saray pilosopon Epicureo tan Estoico, tan ibabaga na arum: “Antoy ibabaga na sayan malabir?” Say kuan na arum: “Singano sakey a managpulong na agkabat iran dirios.” Inkuan da iya ta iyaabawag toy maong a balita nipaakar ed si Jesus tan say kioli. 19  Kanian sikatoy inerel da tan inyakar da ed Areopago,* ya inkuan da: “Ibagam pa ed sikami no anto iyan balon bangat a sasalitaen mo? 20  Ta walaray ipaparungtal mon bengatla a dumaruma ed pakadngel mi. Labay mi sirin a naamtaan no antoy kabaliksan na saraya.” 21  Diad tua, amin a taga Atenas tan saray sangkailin miaayam diman et anggapoy arum a panguusaran day libren panaon da noag say pangibaga odino pandengel ed balon bengatla. 22  Natan et inmalagey si Pablo ed pegley na Areopago tan inkuan to: “Lalakin taga Atenas, nanenengneng ko a diad amin a bengatla et ompatnag a mas matakot kayo ed saray dirios nen say arum. 23  Singa bilang, legan ya ondadalan ak tan iimanoen kon maong iray bengatlan dadayewen yo, anengneng ko met so sakey ya altar a walay akasulat ‘Diad Sakey a Dios ya Agkabat.’ Kanian samay agyo kabat a pangiiteran yoy maridios a debosyon, saya so ipupulong ko ed sikayo. 24  Say Dios a nanggawa na mundo tan amin a bengatlan wadtan, sayan Sakey, a Katawan na tawen tan dalin, et agmanaayam ed saray templo a ginawa na lima, 25  tan agto met nakaukolan a sikatoy asikasoen na totoo a singano walay nakaukolan to, lapud sikaton mismo so mangiiter na bilay tan linawa tan amin a bengatla diad amin a totoo. 26  Tan manlapud sakey a too et ginawa to so kada nasyon na totoo pian manayam diad interon dalin, tan inggeter to iray aturon panaon tan saray ketegan na panaayaman na totoo, 27  ta pian anapen day Dios, no bilang ta mankarkarapkap iran manaanap ed sikato tan peteg a naromog da, anggaman diad tua et sikatoy ag-arawi ed balang sakey ed sikatayo. 28  Ta diad panamegley to et walay bilay tayo tan onggagalaw itayo tan wala itayo, a singa imbaga na arum ed saray manag-anlong ed limog yo, ‘Ta sikatayo met so ilalak to.’ 29  “Kanian lapud ilalak itayo na Dios, agtayo nepeg ya isipen a say Sakey a Dios et singa balitok odino pilak odino bato, singa sakey a bengatlan inukit lapud dunong tan panagnonot na too. 30  Tua ya inabuloyan na Dios ya onlabas iray panaon a saray totoo et andiay-pikakabat, ingen ibabaga to natan a nepeg a magbabawi so amin a katooan ed inerman a pasen, 31  lapud inggeter to so sakey ya agew pian ukomen toy mundo unong ed inkatunong diad panamegley na sakey a toon tinuro to, tan sikatoy angiter na garantiya ed amin a totoo diad impamaoli to ed sikato manlapud inaatey.” 32  Et sanen nadngel da so nipaakar ed kioli na saray inaatey, nanludlurey so arum, balet ibabaga na arum: “Dengelen mi ka lamet ed saya diad arum a panaon.” 33  Kanian tinaynan la ra nen Pablo, 34  balet akila ed sikato so pigaran lalaki tan nagmaliw iran mananisia, a kaiba ra met si Dionisio, a huis ed korte na Areopago, tan say biin manngaran na Damaris, tan saray arum ni.

Paimanod leksab

Gaw 17:19 * Sakey a pukdol ed kadaanan ya Atenas, a pantitiponan met na say atagey a korte.