Gawa 3:1-26
3 Natan, si Pedro tan Juan et tinmatdang ed templo parad oras na pikakasi, diad komasiam ya oras,*
2 tan diman et aawiten na totoo so sakey a lakin lupoy manlapu la ed inkianak to, tan inagew-agew dan ipuepuesto diad asingger ed puerta na templo a tatawagey Marakep, ta pian makapipayabol ed saramay onloloob ed templo.
3 Sanen anengneng toy Pedro tan Juan ya onloob la ed templo, sikatoy akipayabol ed sikara.
4 Balet sikatoy ninengneng nen Pedro tan Juan, tan inkuan nen Pedro ed sikato: “Nengneng mo kami.”
5 Kanian ninengneng to ra, ya iilaloan ton walay naawat to ed sikara.
6 Balet, inkuan nen Pedro: “Anggapoy pilak tan balitok ko, balet iter ko ed sika so walad siak: Diad ngaran nen Jesu-Kristo a Nazareno, akar ka!”
7 Diad saman et sikatoy inegnaan nen Pedro ed kawanan a lima tan impaalagey to. Et tampol a binmiskeg iray dapan to tan kalitkalit to;
8 tan sikatoy linmukso, ya inmalagey tan inmakar la, tan akila ed sikara a linmoob ed templo, a manaakar tan manluklukso tan indaydayew toy Dios.
9 Tan anengneng na amin a totoo a sikatoy manaakar tan mangidadayew ed Dios.
10 Tan abidbir da a sikato imay lakin akayurong a mipapayabol diad Marakep a Puerta na templo, tan pankelkelawan tan panlikliketan day agawa ed sikato.
11 Tan legan ya akabemben imay laki ed si Pedro tan Juan, amin a totoo so kibatiktik a dinmago ed sikara diad pasen a tatawagey naatepan a dadalanan* nen Solomon, tan mankelkelaw ira ed samay agawa.
12 Sanen anengneng iya nen Pedro, inkuan to ed saray totoo: “Sikayoran totoo na Israel, akin a pankelawan yo iya, odino akin a nenengnengen yo kami a singano sikatoy apaakar mi ed panamegley na pakayari min dili odino maridios a debosyon mi?
13 Say Dios nen Abraham tan Isaac tan Jacob, say Dios na saray inmuunan atateng tayo, so angigloria ed Lingkor to a Jesus, ya inyawat tan impulisay yon mismo ed arap nen Pilato, sanen labay to lan ibulos.
14 On, impulisay yo itan a masanto tan matunong, tan impaibulos yo imay toon managpatey,
15 ingen ta pinatey yo so Manunan Manangitonton ed bilay. Balet sikatoy pinaoli na Dios manlapud inaatey, a saya so atasian mi.
16 Kanian diad ngaran to, salanti, lapud pananisia mi ed ngaran to, sayan laki a sankanengneng yo tan kabat yo et binmiskeg, tan lapud pananisia mi ed sikato, sayan laki et sigpot ya apaabig diad imaton yon amin.
17 Tan natan, agagi, amtak ya agyo amtay ginawa yo, a singa ed ginawa na saray manuley yo.
18 Balet diad onian paraan et sinumpal na Dios iray inyabawag to nensaman diad panamegley na amin a propeta, a say Kristo to et manirap.
19 “Magbabawi kayo sirin, tan manguman* kayo ta pian naperdona* iray kasalanan yo, tan onsabi iray makapainawan panaon a manlapud si Jehova a mismo
20 tan ibaki to so Kristo ya aturo parad sikayo, si Jesus,
21 a nepeg a mansiansia ed tawen anggad panaon na panangipawil ed amin a bengatlan sinalita na Dios diad panamegley na sangi na saray masanton propeta to nensaman.
22 Diad tua et inkuan nen Moises, ‘Manlapud limog na saray agagi yo, si Jehova a Dios et manuro na sakey a propeta a singa siak parad sikayo. Sikatoy nepeg yon dengelen unong ed amin a bengatlan salitaen to ed sikayo.
23 On, siopaman a kamarerwa ya ag-ondengel ed satan a Propeta et deralen na Dios manlapud limog na totoo to.’
24 Diad tua, sarayan agew so impakabat na amin a propeta, manlapud si Samuel anggad saramay tinmumbok ni, a dakdakel ira a nampropesiya.
25 Sikayo iray anak na saray propeta tan say sipanan ya akisipanan na Dios ed saray inmuunan atateng yo, ya inkuan to ed si Abraham, ‘Tan diad panamegley na binim et nabendisyonan so amin a pamilya diad dalin.’
26 Kayarin tinuro na Dios so Lingkor to, sikayo so unonan angibakian ed sikato pian bendisyonan to kayo, ya iyarawi to so kada sakey ed sikayo ed mauges iran gawa yo.”
