Gawa 18:1-28
18 Kayari na sarayan bengatla, sikatoy tinmaynan ed Atenas tan linma ed Corinto.
2 Tan aromog toy sakey a Judion manngaran na Aquila, a nianak ed Ponto, a kasabisabi ton nanlapud Italya, tan say asawa ton si Priscila, lapud ingganggan nen Claudio ya amin a Judio et ontaynan ed Roma. Kanian sikatoy linma ed sikara
3 tan lapud parehoy anapan da, sikatoy akiayam ed abung da, tan nankimey ira, ta say anapan da et managgaway tolda.
4 Balet, sikatoy manpapaliwawa ed sinagoga diad kada sabaton tan natatangguyor to iray Judio tan saray Griego.
5 Natan, sanen sinmabi lay Silas tan Timoteo manlapud Macedonia, inusar nen Pablo so amin a panaon to parad salita na Dios, a pinulongan to iray Judio pian paneknekan a si Jesus so Kristo.
6 Balet sanen naynay la ran onsusumpa tan mansasalita na mauges, impagpag to iray kawes to tan inkuan to ed sikara: “Saray dala yo et niiyan komon ed tapew na saray ulo yo. Malinis ak. Manlapud natan et onla ak ed saray totoo na nasyones.”
7 Kanian sikatoy tinmaynan diman tan linma ed abung na sakey a toon manngaran na Titio Justo, sakey a mandadayew ed Dios, a say abung to et walad abay na sinagoga.
8 Balet si Crispo a manangasikaso na sinagoga et nagmaliw a mananisia ed Katawan, tan ontan met ed interon sankaabungan to. Tan dakel ed saray taga Corinto ya akadngel so anisia tan abautismoan.
9 Tan diad labi et inkuan na Katawan ed si Pablo diad panamegley na pasingawey: “Agka natatakot, noagta mantultuloy kan mansalita tan agka ontutunda,
10 ta wala ak ed sika tan anggapoy mamasakit ed sika; ta dakel so totook ed sayan syudad.”
11 Kanian sikatoy nanayam diman ed loob na sakey taon tan anem bulan, ya imbabangat to ed sikara so salita na Dios.
12 Tan legan a si Galio so prokonsul* na Acaya, nankakasakey iray Judio a sinmumpa ed si Pablo tan sikatoy inyakar da ed panangukoman,
13 ya inkuan da: “Tatangguyoren na sayan too iray totoo a mandayew ed Dios diad paraan a misumlangan ed ganggan.”
14 Balet sanen onggapo lan mansalitay Pablo, inkuan nen Galio ed saray Judio: “No sakey itan a lingo odino sakey a gawan mauges, O sikayoran Judio, walay rason pian anosan ta kayo.
15 Balet no sangsangan labat itan nipaakar ed saray salita tan kangaranan tan ganggan yo, akauley kayo la ed satan. Agko labay so magmaliw ya ukom ed sarayan bengatla.”
16 Diad saman et pinataynan to ra ed panangukoman.
17 Kanian amin da so angerel ed si Sostenes a manangasikaso na sinagoga tan pinepekpek da ed arap na panangukoman. Balet, agbalot akibabali si Galio ed sarayan bengatla.
18 Balet, kayari na pigay agew nin impanayam nen Pablo diman, sikatoy nampatanir ed saray agagi tan nambarko ya amaarap ed Sirya, tan kaiba toy Priscila tan Aquila, tan diad Cencrea et impakatli toy buek to, ta walay sinambaan to.
19 Kanian akasabi ra ed Efeso, tan intilak to ra diman, balet sikatoy linmoob ed sinagoga tan akikatunongan ed saray Judio.
20 Anggaman naynay dan kekerewen a sikatoy mansiansia diman ed mas andukey a panaon, sikatoy ag-inmabuloy
21 noagta nampatanir tan inkuan to ed sikara: “Ompawil ak lamet ed sikayo, no linawa nen Jehova.” Tan sikatoy nambarko manlapud Efeso
22 tan sinmabi ed Cesarea. Insan sikatoy tinmatdang* ditan tan kinomusta toy kongregasyon, insan linma ed Antioquia.
23 Tan kayari ton nansiansia diman ed pigaran panaon, sikatoy tinmaynan tan linma ed nanduruman pasen diad dalin na Galacia tan Frigia, a pinapabiskeg toy amin a disipulo.
24 Natan et sinmabi ed Efeso so sakey a Judion manngaran na Apolos, a nianak ed Alejandria, sakey a toon maong a mansalita, tan kabkabisado toy Kasulatan.
25 Sayan too et nibangat ed dalan nen Jehova, tan lapud sikatoy marmarlang ed espiritu, susto so pansasalita tan pangibabangat to ed saray bengatlan nipaakar ed si Jesus, balet say kabat to labat et nipaakar ed bautismo nen Juan.
26 Tan sayan too et makpel a nansalita diad sinagoga. Sanen sikatoy nadngel nen Priscila tan Aquila, sikatoy impila ra tan impaliwawa ra ed sikato so dalan na Dios ed mas suston paraan.
27 Sakey ni, lapud labay toy onla ed Acaya, nansulat iray agagi ed saray disipulo, a binilin da ra a maong komon so pangawat da ed sikato. Kanian sanen sikatoy akasabi diman, baleg so nitulong to ed saramay anisia nisengeg ed agnaparaan a kaabigan na Dios,
28 ta mapuersa ton pinaneknekan ed arap na karaklan ya aliwa iray Judio, ya impanengneng to ed panamegley na Kasulatan a si Jesus so Kristo.
