Gawa 22:1-30

22  “Agagi tan kaamaan, dengel kayo ta ipaliwawak ed sikayo so agawa.”  (Sanen nadngel da a sikatoy mansasalita ed sikara diad lenguahen Hebreo, lalon nandeen ira, tan inkuan to:)  “Sakey ak a Judio, a nianak ed Tarso na Cilicia, balet nanaral ed sayan syudad tan imbangat a mismo nen Gamaliel, abangatan ya ontumbok a maong ed Ganggan na inmuunan atateng, maseseg parad Dios a singa sikayon amin natan.  Tan pinasegsegang ko iramay ontutumbok ed sayan Dalan anggad patey, a binabalor tan impaiprisok iray lalaki tan bibii,  a napaneknekan iya na atagey a saserdote tan amin ya ulop na mamasiken. Angala ak met ed sikara na saray sulat parad saray agagi ed Damasco, tan diad saman et wala ak la ed dalan pian baloren ko iramay wadman tan iyakar ko ra diad Jerusalem pian nadusa ra.  “Balet sanen mamapaarap ak la tan asingger ak la ed Damasco, a ngalngali la pegley-agew, biglan sinminag ed kaliberliber ko so masmasnag a liwawa manlapud tawen,  tan atumba ak tan nadngel koy sakey a boses ya angikuan ed siak, ‘Saulo, Saulo, akin et papasegsegangen mo ak?’  Inmebat ak, ‘Siopa ka, Katawan?’ Tan inkuan to ed siak, ‘Siak si Jesus a Nazareno, a papasegsegangen mo.’  Natan saramay kaibak a lalaki et anengneng da so liwawa balet ta agda nadngel so boses na samay mitotongtong ed siak. 10  Diad saman et inkuan ko, ‘Antoy gawaen ko, Katawan?’ Et inkuan na Katawan, ‘Alagey ka, la ka ed Damasco, tan diman et ibaga ed sika so amin a nepeg mon gawaen.’ 11  Balet lapud anggapon balot so nanengneng ko ta masmasnag iman a liwawa, intabin ak na saramay kaibak kanian akasabi ak ed Damasco. 12  “Natan si Ananias, a sakey a gagalangen a laki unong ed Ganggan, tan maabig so ibabaga na amin a Judion manaayam diman nipaakar ed sikato, 13  et linma ed siak, tan sanen inmalagey ed abay ko et inkuan to ed siak, ‘Saulo, agi, makanengneng ka lamet!’ Tan ninmengneng ak ed sikato diad saman ya oras. 14  Inkuan to, ‘Say Dios na inmuunan atateng tayo et pinili to ka pian naamtaan moy linawa to tan nanengneng mo imay Sakey a matunong tan narengel moy boses to, 15  lapud magmaliw kan tasi to ed amin a totoo nipaakar ed saray anengneng tan nadngel mo. 16  Natan sirin, akin et manpapaleen ka? Alagey ka, manpabautismo ka tan urasan mo iray kasalanan mo diad itawag mo ed ngaran to.’ 17  “Balet sanen akapawil ak ed Jerusalem tan manpipikasi ak diad templo, akanengneng ak na sakey a pasingawey 18  tan sikatoy anengneng ko ya angikuan ed siak, ‘Apuram, paway kan tampol ed Jerusalem, ta agda awaten so pantasim nipaakar ed siak.’ 19  Et inkuan ko, ‘Katawan, amta ran mismo a nensaman et impaiprisok tan impalewet ko ed kada sinagoga iramay manisia ed sika; 20  tan sanen papatedteren day dala nen Esteban a tasim, akaalagey ak met diman ya aabobonan ko itan tan babantayan ko iray ilalatop a kawes na saramay mamapatey ed sikato.’ 21  Balet inkuan to ed siak, ‘La ka, lapud ibaki ta ka diad saray ararawin nasyon.’” 22  Balet anggad sayan salita labat so dinengel da ed sikato, insan inyeyag da: “Pateyen itan a too, ta agmanepeg a manbilay!” 23  Tan lapud naningal ira tan imbabantak da iray ilalatop dan kawes tan angisabuyag ira na dabok, 24  ingganggan na komandante na militar a sikatoy iloob da ed kuartel na saray sundalo tan inkuan ton sikatoy nepeg ya usisaen legan a sisiplatan, ta pian naamtaan ton maong no akin ya oniay iyeeyag da ed sikato. 25  Balet sanen niyunat da la pian siplatan da, imbaga nen Pablo ed samay opisyal na armada ya akaalagey diman: “Manepeg kasin siplatan yoy sakey a Romano ya agni asentensiaan?” 26  Sanen nadngel iya na opisyal na armada, sikatoy linma ed komandante na militar tan impaamta to, a kuan to: “Antoy nononoten mon gawaen? Ta sayan too et sakey a Romano.” 27  Kanian inmasingger so komandante na militar tan inkuan to ed sikato: “Ibagam ed siak, Sakey kan Romano?” Inkuan to: “On.” 28  Inmebat so komandante na militar: “Mabmabli so impanaliw ko ed sarayan kanepegan na sakey a mibabaley.” Et inkuan nen Pablo: “Balet wala la ed siak iratan manlapu nen nianak ak.” 29  Kanian inmarawin tampol ed sikato iramay lalakin manusisa tan mamairap komon ed sikato; tan tinmakot so komandante na militar sanen naamtaan ton sikatoy sakey a Romano tan lapud binalor to. 30  Kanian diad tinmumbok ya agew, sikatoy imbulos to tan ingganggan ton mantitipon iray manunan saserdote tan say interon Sanhedrin lapud labay ton naseguro no akin a sikatoy aakusaan na saray Judio. Tan inyakar to diman si Pablo tan pinaalagey to ed pegley da.

Paimanod leksab