Gawa 26:1-32

26  Inkuan nen Agripa ed si Pablo: “Nayari ka lan mansalita pian mandepensa.” Kanian inyunat nen Pablo so lima to tan nansalita:  “Arin Agripa, nipaakar ed amin a pangaakusaan ed siak na saray Judio, maliket ak ta diad sayan agew et makapandepensa ak ed arapan mo,  nagkalalo la ta kabkabat mo so amin a kustombre tan saray pansasangsangan ed limog na saray Judio. Kanian ipangasim, anosan mo ak pan dengelen.  “Tua, no nipaakar ed paraan na impanbilay ko manlapud inkaugaw ko diad limog na saray kanasyonan ko tan diad Jerusalem, amin a Judio  a makapikabat la ed siak nensaman et amta ra, no bilang ta labay dan tasian, a nambilay ak bilang Fariseo unong ed sankapegetan a paraan na panagdayew na sekta mi.  Balet natan, lapud paniilalok ed samay insipan na Dios ed inmuunan atateng mi, siak so akaalagey dia ya uukomen,  tan say kasumpalan na sayan sipan et iilaloan met a naawat na labinduan tribu mi diad masimoon a panlilingkor da ed Dios diad labi tan agew. Nipaakar ed sayan ilalo et siak so inakusaan na saray Judio, O ari.  “Akin et iisipen yon agnapanisiaan so pamaoli na Dios ed saray inaatey?  Siak a mismo et ninonot ko a nepeg kon gawaen so amin a nayarian ko pian sumpaen so ngaran nen Jesus a Nazareno; 10  a diad tua et ontan so ginawak diad Jerusalem, tan dakel ed saray masanto so impaiprisok, unong ed naawat kon autoridad manlapud saray manunan saserdote; tan sano pateyen la ra et susuportaan ko itan. 11  Tan dinusak ira ya aminpigapiga diad amin a sinagoga, a pinasoot ko ran ipulisay day pananisia ra; tan lapud alablabas a sanok ko ed sikara, pinasegsegang ko ra anggan diad arum iran syudad. 12  “Diad sarayan pansasagpot ko, sanen mamapaarap ak la ed Damasco ya awit koy autorisasyon tan ganggan manlapud saray manunan saserdote, 13  diad pegley-agew, O ari, akanengneng ak diad dalan na sakey a liwawan nanlapud tawen a masmasnag nen say agew a sinminag ed kaliberliber ko tan ed saramay kaibak a manaakar. 14  Et sanen atumba kamin amin, nadngel koy sakey a boses ya angikuan ed siak diad lenguahen Hebreo, ‘Saulo, Saulo, akin et papasegsegangen mo ak? Say pangidedepak mon naynay ed saray utok* et mamairap labat ed sika.’ 15  Balet inkuan ko, ‘Siopa ka, Katawan?’ Et inkuan na Katawan, ‘Siak si Jesus, a papasegsegangen mo. 16  Ingen, bangon ka tan alagey ka. Nampanengneng ak ed sika ta pian pilien ta ka bilang sakey a lingkor tan sakey a tasi ed saray bengatlan anengneng mo la tan ed saray bengatlan ipanengneng ko ed sika nipaakar ed siak; 17  tan iyagel ta ka ed sarayan totoo tan ed saray nasyon, a pangibakian ko ed sika, 18  pian lukasan moy kamataan da, ya iyakar mo ra ed liwawa manlapud kabilungetan tan diad Dios manlapud pakauley nen Satanas, ta pian naperdona iray kasalanan da tan naawat da so tawir a kaiba na saramay pinasanto lapud pananisia ra ed siak.’ 19  “Lapud saya, Arin Agripa, agko sinumlang so anengneng kon pasingawey ed tawen, 20  balet impasabik nin unona so mensahe ed saramay walad Damasco tan ed saramay walad Jerusalem, insan diad interon dalin na Judea, tan diad amin a nasyones pian magbabawi ra tan ompawil ira ed Dios, ya ipanengneng dan magbabawi ira diad panamegley na gawa ra. 21  Nisengeg ed saraya, inerel ak na saray Judio diad templo tan ginetma ra ak a pateyen. 22  Balet lapud tutulongan ak na Dios, makapanpupulong ak ed saray angkekelag tan angkakabaleg anggad sayan agew, ingen ta anggapo lay arum ya ibabagak noag saray bengatlan imbaga na saray Propeta tan si Moises a nagawa, 23  a say Kristo et nepeg a manirap, tan bilang unonan napaoli manlapud inaatey, ipulong toy liwawa ed saray Judio tan ed saray nasyon.” 24  Natan legan ya ibabaga to iraya diad pandedepensa to, inkuan nen Festo ed maksil a boses: “Natatapis ka la, Pablo! Natatapis ka la lapud karakel na kakabatan mo!” 25  Balet inkuan nen Pablo: “Agak natatapis, Kagalgalang a Festo, noagta saray ibabagak et katuaan tan manlalapud limpion kanonotan. 26  Diad tua et amta iraya na ari a pitotongtongan ko natan a makmakpel; ta manisia ak ya anggapoy anggan sakey ed saraya ya agto naimano, lapud ag-iraya ginawa ed maamot. 27  Manisia ka ed saray Propeta, Arin Agripa? Amtak a manisia ka.” 28  Balet inkuan nen Agripa ed si Pablo: “Maganom ak lan natangguyor a magmaliw a Kristiano.” 29  Diad saya et inkuan nen Pablo: “Kerewen ko ed Dios a diad magano odino diad mabayag a panaon et aliwan sika labat, noagta pati sarayay amin ya ondedengel ed siak natan, so magmaliw a totoon singa siak met, puera labat ed sarayan balor.” 30  Et inmalagey lay ari tan say gobernador tan si Bernice tan saray lalakin akayurong a kaiba ra. 31  Balet sanen ontataynan la ra, nantotongtong ira, ya inkuan da ed sakey tan sakey: “Anggapon balot so ginawa na sayan too pian manepeg a pateyen odino baloren.” 32  Niarum ni, inkuan nen Agripa ed si Festo: “Sayan too et imbulos la komon no agla inmapela ed Cesar.”

Paimanod leksab

Gaw 26:14 * Salanti, sakey a nan-utok a tayukor ya uusaren pian dagdagen so sakey ya ayep.