Gawa 16:1-40
16 Kanian sikatoy akasabi ed Derbe tan ontan met ed Listra. Tan diman et walay sakey a disipulo a manngaray Timoteo, a say ina to et mananisian Judio balet say ama to et Griego,
2 tan alay abig so ibabaga na saray agagi ed Listra tan Iconio nipaakar ed sikato.
3 Imbaga nen Pablo a labay ton ipila iyan laki, kanian sikatoy intagar to balet sinegat to ni lapud walaray Judio ed saraman a pasen, ta kabkabat na amin a say ama to et sakey a Griego.
4 Natan legan iran manbiabiahe diad saray syudad, ipapasabi ra ed saramay wadman a nepeg ya unoren iray totontonen a denisisyonan na saray apostol tan saray mamasiken a walad Jerusalem.
5 Lapud saya, saray kongregasyon et nantultuloy a binmiskeg ed pananisia tan ondarakel so bilang da ed kada agew.
6 Ontan met, niliber day Frigia tan say dalin na Galacia, lapud ag-ira inabuloyan na masanton espiritu ya ipulong so salita diad distrito na Asia.
7 Niarum ni, sanen akasabi la ra ed Misia, nanggunaetan day onla ed Bitinia, balet ag-ira inabuloyan na espiritu nen Jesus.
8 Kanian nilabsanan day Misia tan linma ra ed Troas.
9 Tan diad labi et akanengneng si Pablo na pasingawey: walay sakey a lakin taga Macedonia ya akaalagey tan mikakasi ed sikato, a kuan to: “Gala dia ed Macedonia tan tulongan mo kami.”
10 Natan kayari ton anengneng so pasingawey, namparaan kamin onla ed Macedonia, a ninonot min tinawag kami na Dios pian iyabawag ed sikara so maong a balita.
11 Kanian nambarko kami manlapud Troas tan dinmiretso kami ed Samotracia, balet diad tinmumbok ya agew et linma kami ed Neapolis,
12 tan manlapu diman et linma kami ed Filipos, sakey a syudad ya uuleyan na Roma, a saya so manunan syudad ed distrito na Macedonia. Nansiansia kami ed sayan syudad diad pigaran agew.
13 Tan diad agew na sabaton et linma kami ed paway na puerta na syudad diad abay na ilog, ta iisipen min wala diman so pasen a pampikasian; tan yinmurong tan akitongtong kami ed saramay wadman a bibiin nantitipon.
14 Tan onderengel so sakey a biin manngaran na Lidia, a managlako na purpura. Sikatoy taga syudad na Tiatira tan managdayew ed Dios, tan nilukasan nen Jehova so puso to pian manimano ed saray sasalitaen nen Pablo.
15 Natan, sanen sikato tan say sankaabungan to et abautismoan, sikatoy akikasi: “No ipapasen yo ak a matoor ed si Jehova, loob kayo ed abung ko tan mansiansia kayo diman.” Tan pinilit to kamin onla.
16 Et sanen onla kami la ed pasen a pampikasian, inabet kami na sakey a biin aripen a walaan na sakey ya espiritu, sakey a demonyo na panagparles. Sikatoy napipinabangan a maong na saray katawan to lapud panguusar toy dunong ed panagparles.
17 Sayan bii et tumbotumbok ed sikami di Pablo, tan oniay ibabando to: “Sarayan lalaki et ariripen na Sankatageyan a Dios, ya ipupulong da ed sikayo so dalan na kilalaban.”
18 Pigay agew lan oniay gagawaen to. Diad saman et agla naanosan itan nen Pablo kanian inarap to tan inkuan to ed espiritu: “Diad ngaran nen Jesu-Kristo, paway ka ed sikato.” Et pinmaway itan ed saman a mismon oras.
19 Kanian, sanen anengneng na saray katawan to a naandi la imay pinanabangan da, inerel day Pablo tan Silas tan inggayugoy da ra diad tindaan pian iyakar ed saray manuley,
20 tan sanen niyarap da la ra ed saray mahistrado* na baley, inkuan da: “Guguloen na sarayan lalaki so syudad tayo, lapud Judio ra,
21 tan ibabangat da iray kustombre ya agtayo manepeg a tumboken odino gawaen, lapud Romano itayo.”
22 Tan nankakasakey iray totoo a sinmumpa ed sikara; tan impapilat na saray mahistrado na baley iray latop a kawes da, insan impalewet da ra.
23 Kayari da ran nilelewet, impriso da ra, a binilin day manangipriso a bantayan to ran maong.
24 Lapud ontan so bilin ed sikato, inyan to ra ed sankadaleman a prisoan tan sinigpit to na angkakabaleg a tabla iray sali ra.
25 Balet diad pegley-labi, si Pablo tan Silas so manpipikasi tan mankakanta na panangidayew ed Dios; on, narerengel ira na saray priso.
26 Et biglan yinmegyeg a maksil, kanian agalaw iray pundasyon na prisoan. Insan tampol ya alukas-lukasan so amin a kapot, tan naukbar iray balor dan amin.
27 Sanen abangon so manangipriso tan anengneng ton alukasan iray kapot na prisoan, inuyos toy espada to tan manbikkel la lawari, lapud inisip to ya akablos iray priso.
28 Balet inmeyag si Pablo, a kuan to: “Agmo sasakitan so laman mo, ta wadia kamin amin!”
29 Kanian sikatoy nampaala na silew tan binmatik ed loob, tan sikatoy manggiwgiw a dinmakmomo ed arap nen Pablo tan Silas.
30 Tan impaway to ra tan inkuan to: “Kakatawan, antoy nepeg kon gawaen pian nilaban ak?”
31 Inkuan da ed sikato: “Manisia ka ed Katawan a Jesus tan nilaban ka, sika tan say sankaabungan mo.”
32 Tan say salita nen Jehova et impaliwawa ra ed sikato tan ed amin a wadman ed abung to.
33 Tan diad saman ya oras ed labi, intagar to ra tan inurasan to iray sugat da; insan sikaran amin et tampol ya abautismoan, sikato tan say sankaabungan to.
34 Tan pinaloob to ra ed abung to tan imparaanan to ray naakan da, tan sikatoy nanliket a maong pati say interon sankaabungan to lapud sikatoy manisia la ed Dios.
35 Sanen kabuasan la, imbaki na saray mahistrado na baley iray guardia pian mangibaga: “Ibulos yo iraman a totoo.”
36 Kanian impasabi iya na manangipriso ed si Pablo: “Walaray lalakin imbaki na saray mahistrado na baley ta pian ibulos da kayon dua. Kanian natan, paway kayo la tan la kayo ed kareenan.”
37 Balet inkuan nen Pablo ed sikara: “Nilewet da kami ed arap na totoo anggano agkami ni asentensiaan, anta Romano kami, tan impriso da kami; insan natan et papataynanen da kamin anggapoy makaamta? Andi! sikaran mismo so onla dia a mangipaway ed sikami.”
38 Kanian impasabi iraya na saray guardia diad saray mahistrado na baley. Tan tinmakot iraya sanen nadngel da a Romano irayan totoo.
39 Lapud saya et linma ra tan akikasi ed sikara, tan sanen nipaway da la ra, kinerew da ya ontaynan la ra ed syudad.
40 Balet kapaway da ed prisoan, linma ra ed abung nen Lidia, tan sanen anengneng da iray agagi, pinaseseg da ra insan la ra tinmaynan.
