Gawa 9:1-43

9  Balet si Saulo, a siansia nin mamapagyaw tan manpipilalek a mamatey ed saray disipulo na Katawan, so linma ed atagey a saserdote  tan kinmerew na saray sulat ya iter to ed saray sinagoga* diad Damasco, ta pian sarag ton baloren tan awiten ed Jerusalem so siopaman a lalaki tan bibii a naromog ton kabiangan na Say Dalan.*  Legan a sikatoy walad dalan, ya asingger la ed Damasco, biglan sinminag ed kaliberliber to so sakey a liwawan nanlapud tawen,  tan sikatoy atumba tan nadngel toy sakey a boses ya angikuan ed sikato: “Saulo, Saulo, akin et papasegsegangen mo ak?”  Inkuan to: “Siopa ka, Katawan?” Et inkuan to: “Siak si Jesus, a papasegsegangen mo.  Balet, alagey ka tan loob ka ed syudad, tan ibaga ed sika no antoy nepeg mon gawaen.”  Natan, ag-akaskasel iray lalakin kaiba ton manaakar, lapud walay narerengel dan boses, balet anggapoy nanenengneng dan too.  Balet inmalagey si Saulo, tan anggano akalukas iray mata to et anggapoy nanengneng to. Kanian sikatoy intabin da tan inyakar da ed Damasco.  Tan agbalot makanengneng ed loob na taloy agew, tan ag-angan odino inminum. 10  Diad Damasco et walay sakey a disipulo a manngaran na Ananias tan inkuan na Katawan ed sikato diad pasingawey: “Ananias!” Et inkuan to: “Wadia ak, Katawan.” 11  Inkuan na Katawan ed sikato: “Alagey ka, la ka ed dalan a tatawagen a Maptek, tan dia ed abung nen Judas et anap moy sakey a toon manngaran na Saulo, a taga Tarso. Ta nia! sikatoy manpipikasi, 12  tan diad pasingawey et anengneng ton linmoob so sakey a lakin manngaran na Ananias tan intapew to iray lima to ed sikato ta pian ompawil so pakanengneng to.” 13  Balet inmebat si Ananias: “Katawan, nadngelan ko ed dakel so nipaakar ed sayan too, a dakdakel so makapasakit a ginawa to ed saray masanton totoom diad Jerusalem. 14  Tan walay autoridad to a nanlapud saray manunan saserdote pian baloren to dia so amin ya ontatawag ed ngaran mo.” 15  Balet inkuan na Katawan ed sikato: “La ka, lapud sayan too et sakey a pinilik a pananginan pian mangawit na ngaran ko ed saray nasyon ontan met ed saray arari tan ed saray anak na Israel. 16  Ta ipaliwawak a maong ed sikato no kaunongan karakel so nepeg ton sagmaken nisengeg ed ngaran ko.” 17  Kanian linma si Ananias tan linmoob ed abung, tan intapew to iray lima to ed sikato tan inkuan to: “Saulo, agik, imbaki ak na Katawan, samay Jesus a nampanengneng ed sika diad dinalanan mo, ta pian ompawil so pakanengneng mo tan napano ka na masanton espiritu.” 18  Et tampol a walaray singa siksik ya apagpag manlapud saray mata to, tan pinmawil so pakanengneng to; tan sikatoy inmalagey tan abautismoan, 19  tan sikatoy angan tan kinmasil. Sikatoy akiulop ed saray disipulo ed Damasco diad loob na pigaran agew, 20  tan diad saray sinagoga et tampol ya impulong to a si Jesus so Anak na Dios. 21  Balet amin iramay akadngel ed sikato et nikelawan tan imbaga ran: “Agta saya imay toon maruksan amasegsegang ed saramay walad Jerusalem ya ontatawag ed sayan ngaran, tan sikatoy linma dia ta pian baloren to ra tan iyakar to ed saray manunan saserdote?” 22  Ingen si Saulo et lalon awalaan na pakayari tan agmakaebat ed sikato iray Judio a manaayam diad Damasco sanen makatunongan ton pinaneknekan a si Jesus so Kristo. 23  Natan sanen apalabas lay dakel ya agew, nantotongtongan na saray Judio so pamatey ed sikato. 24  Ingen, akabatan nen Saulo so getma ra ed sikato. Balet binantayan da met a maong iray puerta diad agew tan labi ta pian sikatoy napatey da. 25  Kanian diad labi et sikatoy inala na saray disipulo to tan inleksab da manlapud sakey a bungaw ed padir diad panamegley na sakey a buksot. 26  Kasabi to ed Jerusalem, nanggunaetan toy miulop ed saray disipulo. Balet natatakot iran amin ed sikato, lapud ag-ira manisia a sikatoy sakey lan disipulo. 27  Kanian sikatoy tinulongan nen Bernabe tan inyakar to ed saray apostol, tan insalaysay ton amin ed sikara no panon ya anengneng toy Katawan diad dalan tan akitongtong ed sikato, tan no panon a sikatoy makmakpel a nansalita ed ngaran nen Jesus diad Damasco. 28  Tan sikatoy nantultuloy ya akiulop ed sikara, ya onloloob tan ompapaway diad Jerusalem, a makmakpel a nansalita diad ngaran na Katawan, 29  tan sikatoy mitotongtong tan misusuppiatan ed saray Judion mansasalitay Griego. Balet sikatoy ginetma ran pateyen. 30  Sanen naamtaan iya na saray agagi, sikatoy inyakar da ed Cesarea tan pinaonla ra ed Tarso. 31  Kanian, walay panaon a marendeen so kongregasyon diad interon Judea tan Galilea tan Samaria, ya apabiskeg ira; tan nantultuloy iran dinmakel lapud manbibilay iran walaay takot ed si Jehova tan naliligliwa ira na masanton espiritu. 32  Natan sanen liliberen nen Pedro so amin a pasen, nila to met iray masanto a manaayam ed Lida. 33  Diman et walay aromog ton laki a manngaran na Eneas, a waloy taon lan akarukol ed melag a dukolan to, ta sikatoy paralitiko. 34  Tan inkuan nen Pedro ed sikato: “Eneas, sika so paabigen nen Jesu-Kristo. Alagey ka tan sinop moy dukolan mo.” Et sikatoy inmalagey a tampol. 35  Tan sikatoy anengneng na amin a manaayam diad Lida tan diad patar na Saron, tan anisia ra ed Katawan. 36  Balet diad Joppe et walay sakey a disipulo a manngaray Tabita, a no ipatalos et mankabaliksay Dorcas. Dakdakel so agawaan ton kaabigan tan inter ton regalo lapud panangasi. 37  Balet diad saraman ya agew et sikatoy nansakit tan inatey. Kanian sikatoy inames da tan inyan da ed sakey a kuarto ed tagey. 38  Natan say Lida et asingger ed Joppe, kanian sanen nadngelan na saray disipulo a wadiad sayan syudad si Pedro, angibaki ira na duaran lalaki pian mikasi ed sikato: “Ipangasim pay onlan tampol ed sikami.” 39  Diad saman et inmalagey si Pedro tan akila ed sikara. Tan kasabi to, sikatoy inyakar da ed kuarto ed tagey; tan sikatoy inabet na amin a balon bibii a manaakis tan impapanengneng da so dakel a lalatopan tan ilalatop a kawes a ginawa nen Dorcas sanen kaiba to ni ra. 40  Balet pinapaway nen Pedro so amin, tan sikatoy tinmalimukor a nampikasi, insan inmarap ed bangkay, a kuan to: “Tabita, bangon ka!” Inmurikat to iray mata to, tan kanengneng to ed si Pedro, sikatoy yinmurong. 41  Binembenan nen Pedro so lima to tan pinaalagey to, tan tinawag to iray masanto tan saray balon bibii tan sikatoy inyawat ton mabilay. 42  Saya so akabatan diad interon Joppe, tan dakel so nagmaliw a mananisia ed Katawan. 43  Tan diad Joppe, si Pedro so pigay agew ya akiayam ed si Simon, a managkurti na katat.

Paimanod leksab

Gaw 9:2 * Nengnengen so paimano ed leksab na Mat 4:23.
Gaw 9:2 * Tutukoyen na saya so kabibilay tan bangat na Kristiano.