Gawa 25:1-27
25 Kanian kasabi nen Festo ed probinsya tan ginmapon nanuley, sikatoy tinmatdang ed Jerusalem manlapud Cesarea kayari na taloy agew;
2 tan saray manunan saserdote tan manunaan a lalaki na saray Judio so angiter ed sikato na impormasyon a sumpad si Pablo. Kanian akikasi ra ed sikato,
3 a kinmerew ira na pabor a paonlaen to komon ed Jerusalem iyan laki, ta walay getma ra a sikatoy sabaten da diad dalan pian pateyen da.
4 Balet, inmebat si Festo a nepeg a pansiansiaen ya akapriso si Pablo diad Cesarea, ta agmanbayag et sikatoy onla met lanlamang diman.
5 Inkuan to, “Saramay mangidadaulo sirin ed sikayo et mila’d siak tan sikatoy akusaan da, no walay ginawan aliwa na sayan laki.”
6 Kanian kayari ton akilimog ed sikara diad ag-onsulok a walora odino samploran agew, sikatoy linma ed Cesarea, tan diad tinmumbok ya agew et sikatoy yinmurong ed panangukoman tan ingganggan to ya iloob day Pablo.
7 Sanen sikatoy sinmabi, saray Judio a nanlapud Jerusalem so inmalagey ed paliber to, ya imparungtal da so amayamay tan ambebelat ya akusasyon ed sikato, balet anggapo met lanlamang so nipanengneng dan ebidensya.
8 Balet nandepensay Pablo, a kuan to: “Anggapoy antokaman a kasalanan a ginawak sumpad Ganggan na saray Judio odino sumpad templo odino sumpad Cesar.”
9 Lapud pipirawaten nen Festo a naawat so pabor na saray Judio, inebatan toy Pablo: “Labay moy ontatdang ed Jerusalem ta pian diman so pangukoman ed sika ed arap ko nipaakar ed sarayan bengatla?”
10 Balet inkuan nen Pablo: “Wadia ak la natan ed arap na panangukoman nen Cesar, a dia so nepeg a pangukoman ed siak. Anggapoy makapuy a ginawak ed saray Judio, unong a napapaneknekan mo met la.
11 Balet, no talagan walay kasalanan ko tan walay ginawak a makanepegan na ipapatey, mabulos ak ya ompatey; ingen, no anggapoy katuaan na saratan a pangaakusaan ed siak na sarayan totoo, anggapoy toon makapangiyawat ed siak bilang pabor ed sikara. Onapela ak ed Cesar!”
12 Kanian, kayarin kinatongtong nen Festo so ulop na saray managsimbawa, sikatoy inmebat: “Lapud inmapela ka ed Cesar, onla ka sirin ed Cesar.”
13 Natan kalabas na pigaran agew, si Agripa ya ari tan si Bernice* et binmisita ed Cesarea pian pagalangan si Festo.
14 Kanian legan a wadman ira ed pigaran agew, impaamta nen Festo ed ari iray bengatlan nipaakar ed si Pablo, a kuan to:
“Walay sakey a priso a pinaulyanan la nen Felix,
15 tan sanen wala ak ed Jerusalem, saray manunan saserdote tan mamasiken na saray Judio et angiter na impormasyon nipaakar ed sikato, a papaukom da ed siak pian nadusa.
16 Balet inebatan ko ra ya aliwan kagagawa na Romano so pangiyawat ed siopaman a toon aakusaan bilang pabor no sikatoy agni akapiarapan ed saray mangaakusa ed sikato tan no agni akapandepensa nipaakar ed reklamo.
17 Kanian agak la nampaleen sanen nanuulop ira a linma dia, noagta diad tinmumbok ya agew et yinmurong ak la ed panangukoman tan ingganggan ko ya iloob da iyan too.
18 Sanen inmalagey iray mangaakusa, anggapo lanlamang so nidalem dan mauges iran bengatla, ya abaloan kon ginawa to.
19 Wala labat so pigaran insuppiat da ed sikato nipaakar ed dilin panagdayew da ed dios tan nipaakar ed samay Jesus ya inatey la balet ipipilit na sayan Pablo a sikatoy mabilay.
20 Kanian lapud agko amta no antoy gawaen ko ed onia iran pansusuppiatan, intepet ko no labay toy onla ed Jerusalem ta pian diman so pangukoman ed sikato nipaakar ed sarayan bengatla.
21 Balet sanen inmapela si Pablo a sikatoy bantayan ni legan ya aalagaren so desisyon na Emperador,* ingganggan ko a sikatoy bantayan ni anggad sikatoy paonlaen ko ed Cesar.”
22 Dia et imbaga nen Agripa ed si Festo: “Labay ko met a dengelen iyan too.” Et inkuan to: “Nabuas, sikatoy narengel mo.”
23 Kanian diad tinmumbok ya agew, sinmabi si Agripa tan Bernice ya inulop na mapangtan parada tan linmoob ira ed kuarton kawalaan na saray dumerengel a kaiba iray komandante na militar ontan met iray lalakin kabkabat ed syudad, insan ingganggan nen Festo ya iloob da lay Pablo.
24 Tan inkuan nen Festo: “Arin Agripa tan amin yon totoo a wadian kaiba mi, nanenengneng yo iyan too ya indalem ed siak na dakdakel a Judio diman ed Jerusalem tan dia, ya iyeeyag dan sikatoy agla manepeg a manbilay.
25 Balet atalosan ko ya anggapon balot so ginawa na sayan too a makanepegan na ipapatey. Kanian sanen labay toy onapela ed Emperador, nandesisyon ak a sikatoy paiyakar ko.
26 Balet nipaakar ed sikato et anggapon balot so nisulat ko ed Katawan ko. Kanian sikatoy inawit ko ed arap yo, tan nagkalalo ed arap mo, Arin Agripa, ta pian walay nisulat ko kayari na panusisa ed kaso to.
27 Ta parad siak et singano aliwan makatunongan no ibakik so sakey a priso ya anggapoy nipanengneng ko ya akusasyon sumpad sikato.”
