Gawa 23:1-35

23  Legan a nenengnengen nen Pablo so Sanhedrin, inkuan to: “Agagi, onkikiwas ak ed arap na Dios a malinlinis so konsiensiak anggad sayan agew.”  Diad saya et sikatoy papatampal na atagey a saserdoten si Ananias ed saramay akaalagey ed abay to.  Kanian inkuan nen Pablo ed sikato: “Kabilen ka komon na Dios, sikan pinaputin padir. Kasin yinmurong ka pian mangukom ed siak unong ed Ganggan tan manumlang ed satan, a papatampal mo ak?”  Et inkuan na saramay akaalagey: “Mumudmoraen moy atagey a saserdote na Dios?”  Inkuan nen Pablo: “Agagi, agko amta a sikatoy atagey a saserdote. Ta walan nisulat, ‘Agmo nepeg a pansalitaan na mauges so sakey a manuley ed totoom.’”  Natan, sanen naimano nen Pablo a say kapaldua ed sikara et Saduceo tan say arum et Fariseo, oniay imbaga to ed Sanhedrin: “Agagi, sakey ak a Fariseo, anak na saray Fariseo. Siak so uukomen lapud ilalon kioli na saray inaatey.”  Sanen imbaga to iya, nansasangsangan iray Fariseo tan saray Saduceo, tan naapag so karaklan.  Ta ibabaga na saray Saduceo ya anggapoy kioli odino anghel odino espiritu, balet sarayan amin et ibabangat na saray Fariseo ed saray totoo.  Kanian walay agawan paniingalan, tan inmalagey so arum ed saray eskriba a walad dapag na saray Fariseo tan mapaspasnok iran akisangsangan, a kuan da: “Anggapoy naromog min mauges ed sayan too; balet no akisalita ed sikato so sakey ya espiritu odino sakey ya anghel,—.” 10  Natan sanen ampetang lay sangsangan, tinmakot so komandante na militar ompan pangguguyoran day Pablo, kanian ingganggan to iray sundalo a dagoen da tan alaen da, insan iyakar da ed kuartel na saray sundalo. 11  Balet diad tinmumbok a labi et inmalagey so Katawan ed abay to, a kuan to: “Manpakpel ka! Ta no panon a sigpot mon tatasian ed Jerusalem iray bengatlan nipaakar ed siak, ontan met so nepeg a pantasim diad Roma.” 12  Natan sanen kabuasan la, saray Judio et nankokomplot tan nansamba ran amin, ya inkuan dan ag-ira mangan odino oninum anggad agda napatey si Pablo. 13  Masulok ya apataplon totoo so nanggawa ed sayan sinambaan a pankokomplot, 14  tan linma ra ed saray manunan saserdote tan mamasiken tan inkuan da: “Masimsimoon kamin nansamba ya agkamin balot mangan anggad agmi napatey si Pablo. 15  Natan sirin, sikayo tan say Sanhedrin so mangipaliwawa ed komandante na militar a sikatoy nepeg ya iyakar dia, ya ibaraan yon walay labay yo nin linewen a maong nipaakar ed sikato. Balet antis a sikatoy makaasingger dia, akaparaan kami lan mamatey ed sikato.” 16  Balet sayan plano ran pansabat et nadngel na anak na agin bii nen Pablo, tan sikatoy linma tan linmoob ed kuartel na saray sundalo tan imbaga to iya ed si Pablo. 17  Kanian tinawag nen Pablo so sakey ed saray opisyal na armada tan inkuan to: “Iyakar mo iyan malangwer a laki ed komandante na militar, ta walay ibaga to.” 18  Kanian inala to iya tan inyakar to ed komandante na militar tan inkuan to: “Tinawag ak na samay prison si Pablo tan kinerew to ed siak ya iyakar ko ed sika iyan malangwer a laki, ta walay ibaga to ed sika.” 19  Sikatoy inegnaan na komandante na militar tan inyarawi to tan sanen sikara labat la et tinepetan to: “Antoy ibagam ed siak?” 20  Inkuan to: “Nampapaknaan na saray Judio a kerewen da ed sika ya iyakar mo nabuas si Pablo diad Sanhedrin ya ibaraan dan walay labay da nin linewen nipaakar ed sikato. 21  Kanian, agka komon pakokombinse ed sikara, ta walay masulok ya apataplon lalaki a manabat ed sikato, tan nansamba ra ya ag-ira mangan odino oninum anggad agda napatey; tan akaparaan la ra natan, ya aalagaren dan abobonan moy kerew da.” 22  Kanian pinapawil la na komandante na militar so malangwer a laki kayari ton binilin: “Agmo ibabaga ed anggan siopa ya impaamtam iraya ed siak.” 23  Tan impatawag toy duara ed saray opisyal na armada tan inkuan to: “Iparaan yoy duanlasus a sundalo a manakar ya anggad Cesarea, ontan met ed pitomplon akakabayo tan duanlasus ya akaawit na gayang, diad komatlon oras* na labi. 24  Mangitarya kayo met na saray kabayo pian pangiluganan da ed si Pablo tan naawit dan maligen ed si Felix a gobernador.” 25  Tan sikatoy nanggawa na sulat ya oniay nabasa: 26  “Siak, si Claudio Lisias, so nansulat ed sika, kagalgalang a Gobernador Felix: Panangomusta! 27  Sayan laki et inerel na saray Judio tan ngalngali da la pateyen, balet sinmabi ak a tampol a kaibak iray sundalo tan inliktar ko, lapud naamtaan kon sikatoy sakey a Romano. 28  Tan lapud labay kon naseguro no akin a sikatoy aakusaan da, sikatoy inyakar ko ed Sanhedrin da. 29  Nalmoan ko a sikatoy inakusaan nipaakar ed saray bengatlan pansusuppiatan ed Ganggan da, balet anggapon balot so niyakusa ra pian sikatoy manepeg a pateyen odino baloren. 30  Balet lapud nipaamta ed siak so getma ra sumpad sikato, sikatoy impaiyakar kon tampol ed sika, tan ingganggan ko iray mangaakusa ed sikato a mansalita ra diad arap mo.” 31  Kanian sarayan sundalo et inala ray Pablo unong a niganggan ed sikara tan diad labi et sikatoy inawit da ed Antipatris. 32  Diad tinmumbok ya agew, inabuloyan da iray akakabayo a mangulop ed sikato, tan pinmawil ira ed saray kuartel na saray sundalo. 33  Saray akakabayo et linma ed Cesarea tan inyawat day sulat ed gobernador tan inyarap da met ed sikato si Pablo. 34  Kanian binasa to itan tan tinepet to no anton probinsya so nanlapuan to, tan naamtaan to a sikatoy nanlapud Cilicia. 35  Inkuan to: “Dengelen kon maong so kasom sano onsabi met iray mangaakusa ed sika.” Tan sikatoy impabantayan ton maong diad palasyo nen Herodes a panaayaman na gobernador.

Paimanod leksab

Gaw 23:23 * Alas-9 na labi, no igapo ed inselek na agew.