Gawa 8:1-40

8  Balet si Saulo et inabobonan toy impamatey ed si Esteban. Diad saman ya agew et apasegsegang a maong so kongregasyon diad Jerusalem; nitaytayak iran amin diad interon pasen na Judea tan Samaria nilikud ed saray apostol.  Balet si Esteban et imponpon na saray mapagalang a lalaki, tan nanakisan dan maong.  Ingen marukruksa so impantrato nen Saulo ed kongregasyon. Sinansakey ton nilooban iray kaabungan da, tan inggagayugoy to iray lalaki tan bibii, ya impaipriso to ra.  Balet, saramay nitaytayak et linma ed nanduruman pasen na dalin ya inyaabawag da so maong a balita nipaakar ed salita na Dios.  Sakey lay Felipe, a linma ed syudad na Samaria tan impulong to ed sikara so Kristo.  Saray totoo et nankakasakey ya angimanon maong ed saray imbaga nen Felipe, legan a sikatoy tatalinengen da tan nenengnengen da iray tanda a gagawaen to.  Ta dakel iray walaan na marutak ya espiritu, tan oneeyag iraya ed maksil a boses tan ompapaway ira. Niarum ni, dakel a paralitiko tan piley so apaabig.  Kanian walay baleg a liket ed satan a syudad.  Diad satan a syudad et walay sakey a lakin manngaran na Simon, ya antis na saya et sikatoy manmamahiko tan pankekelawen to so nasyon na Samaria, ya ibabaga ton sikatoy makapanyari. 10  Tan amin da, manlapud sankaabebaan anggad sankatageyan, so mangiimanon maong ed sikato tan ibabaga ran: “Sayan too so Pakayari na Dios, a nayarin tawagen a Baleg a Pakayari.” 11  Kanian sikatoy iimanoen dan maong lapud abayag la ran mankelaw ed panmamahiko to. 12  Balet sanen anisia ra ed si Felipe, a mangiyaabawag na maong a balita nipaakar ed panarian na Dios tan ed ngaran nen Jesu-Kristo, nampabautismo ira, lalaki tan bibii. 13  Si Simon et nagmaliw met a mananisia, tan sanen abautismoan et akiulop a naynay ed si Felipe, tan nikelawan diad pakakanengneng to ed saray nagagawan tanda tan angkakabaleg iran makapanyarin gawa. 14  Sanen nadngelan na saray apostol ed Jerusalem ya inawat na saray totoo ed Samaria so salita na Dios, imbaki ra ditan si Pedro tan Juan; 15  tan linma iraya ed saray taga Samaria tan impikasi da ra pian makaawat ira na masanton espiritu. 16  Ta anggapo ni ed sikara so akaawat ed satan, noagta abautismoan labat ira diad ngaran na Katawan a Jesus. 17  Diad saman et intapew da iray lima ra ed sikara, kanian akaawat ira na masanton espiritu. 18  Natan sanen anengneng nen Simon a niiter so masanton espiritu diad impangitapew na saray apostol ed lima ra, inopresian to ray kuarta, 19  ya inkuan to: “Iter yo met ed siak iyan autoridad, ta pian siopaman a pangitapewan koy limak et makaawat na masanton espiritu.” 20  Balet inkuan nen Pedro ed sikato: “Naderal komon so pilak mo a pati sika, lapud iisipen mo a nakayarian moy andi-bayar a regalo na Dios diad panamegley na kuarta. 21  Anggapon balot so betang odino tawir mo ed saya, ta aliwan maptek so pusom ed imaton na Dios. 22  Magbabawi ka sirin ed sayan kaugsan mo, tan mikasi ka ed si Jehova, a no nayari et perdonaen to komon so getma na pusom, 23  ta nanenengneng ko a sakey kan ampait a samal tan aripen* na ag-inkatunong.” 24  Et inmebat si Simon: “Ipikasi yo ak komon ed si Jehova ta pian anggapo ed sarayan imbaga yo so nagawa ed siak.” 25  Diad saman, sanen sigpot la ran akapantasi tan nipasabi da lay salita nen Jehova, pinmawil ira ed Jerusalem tan inyabawag da so maong a balita ed dakel a baryo na saray Samaritano. 26  Balet, akitongtong so anghel nen Jehova ed si Felipe, a kuan to: “Alagey ka tan la ka ed abalaten diad dalan a palasur ed Gaza manlapud Jerusalem.” (Sakey iyan dalan diad desierto.) 27  Diad saman et sikatoy inmalagey tan linma, tan nia! walay sakey ya Etiopen eunoko, a walaan na atagey a posisyon tan manlilingkor ed si Candace a reyna na saray Etiope, tan mangaasikaso ed amin a kayamanan to. Sikatoy linma ed Jerusalem pian mandayew, 28  balet sikatoy pasempet la tan akayurong ed karwahe to tan babasaen ton maksil so libro nen propetan Isaias. 29  Kanian imbaga na espiritu ed si Felipe: “La ka tan asinggeran mo iyan karwahe.” 30  Et binmatik si Felipe a binansagan to itan tan nadngel to a babasaen ton maksil so libro nen propetan Isaias, tan inkuan to: “Natatalosan moy babasaen mo?” 31  Inkuan to: “Panon kon natalosan no anggapoy mangipaliwawa ed siak?” Tan pinalugan toy Felipe tan pinayurong to ed abay to. 32  Natan say kabiangan na Kasulatan a babasaen ton maksil et saya: “Sikatoy singa sakey a karnero ya inyakar ed panagpateyan, tan singa sakey a kordero a marendeen ed arapan na managkiskis to, ya agto biswaten so sangi to. 33  Sanen sikatoy papabandayen, agto naawat so dugan panangukom. Siopay mangibaga ed saray detalye na kapolian to? Lapud say bilay to et inekal ed dalin.” 34  Inkuan na eunoko ed si Felipe: “Ibagam pa ed siak, Siopay tutukoyen dia na propeta? Sikaton mismo odino arum a too?” 35  Et nansalitay Felipe, tan manlapud sayan Kasulatan et impulong to ed sikato so maong a balita nipaakar ed si Jesus. 36  Legan a wala ra ed dalan, akasabi ra ed kawalaan na danum, tan inkuan na eunoko: “Nia! Walay danum; antoy makasbel ed pakabautismoan ko?” 37*  —— 38  Diad saman et pinatunda to so karwahe, tan linmasur iran dua ed danum, si Felipe tan say eunoko; tan sikatoy binautismoan to. 39  Sanen sinmakbit la ra, si Felipe so inwanwan a tampol na espiritu nen Jehova ya ontaynan, tan sikatoy agla anengneng na eunoko, ta nantultuloy ya amaarap ed dalan to a malikeliket. 40  Balet si Felipe so anengneng a walad Asdod, tan niliber to so teritorya tan intultuloy ton inyabawag so maong a balita diad amin a syudad anggad sikatoy akasabi ed Cesarea.

Paimanod leksab

Gaw 8:23 * Literal, “balor.”
Gaw 8:37 * Nengnengen so paimano ed leksab na Mat 17:21.