Macitidwe a Atumwi 2:1-47

LIZANI

Anthu alandila mzimu woyela pa Pentekosite (1-13)
Nkhani imene Petulo anakamba (14-36)
Khamu la anthu licitapo kanthu pa nkhani imene Petulo anakamba (37-41)
- Anthu 3,000 abatizidwa (41)
Akhristu acitila zinthu pamodzi (42-47)

2 Tsopano pa tsiku la cikondwelelo ca Pentekosite, onse anasonkhana pamalo amodzi. ² Mwadzidzidzi, kumwamba kunamveka congo monga ca mkokomo wa mphepo yamphamvu. Congoco cinadzaza nyumba yonse imene iwo analimo. ³ Ndiyeno iwo anaona malawi a moto ooneka ngati malilime ndipo anagawikana n’kukhala pa aliyense wa iwo limodzi limodzi. ⁴ Onse anadzazidwa ndi mzimu woyela, ndipo anayamba kukamba zinenelo zosiyana-siyana,* monga mmene mzimuwo unawacititsila kulankhula. ⁵ Panthawiyo, Ayuda oopa Mulungu ocokela m’mitundu yonse pa dziko lapansi, anali kukhala ku Yerusalemu. ⁶ Conco congoco citamveka, khamu la anthu linasonkhana, ndipo anadabwa kwambili cifukwa aliyense wa iwo anawamva akulankhula m’cinenelo cake. ⁷ Iwo anadabwa kwambili cakuti anayamba kufunsana kuti: “Taonani, anthu onsewa amene akulankhula ndi Agalileya, si conco? ⁸ Nanga zikutheka bwanji kuti aliyense wa ife azimva cinenelo cake?* ⁹ Pakati pathu pali Apati, Amedi, Aelamu, anthu ocokela ku Mesopotamiya, ku Yudeya, ku Kapadokiya, ku Ponto, ndi ku cigao ca Asia. ¹⁰ Palinso anthu ocokela ku Fulugiya, Pamfuliya, ku Iguputo, ndi kumadela a ku Libiya, amene ali pafupi ndi Kurene. Ndipo palinso alendo ocokela ku Roma ndi Ayuda, komanso anthu otembenukila ku Ciyuda, ¹¹ Akerete, komanso a Arabu. Tonsefe tikuwamva akulankhula zinthu zazikulu za Mulungu m’zinenelo zathu.” ¹² Inde, onsewa anadabwa kwambili ndipo anathedwa nzelu, moti anali kufunsana kuti: “Kodi zocitika izi zikutanthauza ciani?” ¹³ Koma ena anali kuwaseka ndipo anali kukamba kuti: “Amenewa aledzela ndi vinyo watsopano.” ¹⁴ Koma Petulo anaimilila pamodzi ndi atumwi 11 aja, n’kulankhula nao mokweza mau kuti: “Anthu inu a ku Yudeya, komanso onse okhala ku Yerusalemu, dziwani izi ndipo mvetselani mosamala mau anga. ¹⁵ Anthu awa sanaledzele monga mmene mukuganizila, cifukwa muno ndi m’mawa ndipo nthawi ili ca m’ma 9 koloko.* ¹⁶ Koma zimene zacitikazi n’zimene mneneli Yoweli ananenelatu kuti: ¹⁷ ‘Mulungu anati, “M’masiku otsiliza, ndidzapungulila mzimu wanga pa camoyo ciliconse, ndipo ana anu aamuna komanso ana anu aakazi adzalosela. Anyamata anu adzaona masomphenya, ndipo amuna okalamba adzalota maloto. ¹⁸ Ndidzapungulilanso mzimu wanga ngakhale pa akapolo anga aamuna ndi akapolo anga aakazi m’masiku amenewo, ndipo iwo adzalosela. ¹⁹ Ndidzacita zodabwitsa* kumwamba, komanso zizindikilo pa dziko lapansi. Padzakhala magazi, moto, ndi utsi watolotolo. ²⁰ Dzuwa lidzasanduka mdima, ndipo mwezi udzasanduka magazi, tsiku lalikulu komanso laulemelelo la Yehova* lisanafike. ²¹ Ndipo aliyense woitanila pa dzina la Yehova* adzapulumuka.”’ ²² “Amuna inu a mu Isiraeli, mvelani mau awa: Yesu Mnazareti, ndi munthu amene Mulungu anakuonetsani poyela kudzela mu nchito za mphamvu, zodabwitsa, ndi zizindikilo zimene Mulungu anacita pakati panu kupitila mwa iye, monga mmene inu mukudziwila. ²³ Mulungu anadziwilatu pasadakhale kuti Yesu adzapelekedwa. Conco, cinali cifunilo cake. Inu munamukhomelela pamtengo pogwilitsa nchito anthu osamvela malamulo, ndipo munamupha. ²⁴ Koma Mulungu anamuukitsa pomumasula ku zowawa* za imfa cifukwa zinali zosatheka kuti imfa imugwile mwamphamvu. ²⁵ Pakuti Davide anakamba za iye kuti: ‘Nthawi zonse ndimaika Yehova* patsogolo panga,* cifukwa iye ali kudzanja langa lamanja kuti ndisagwedezeke. ²⁶ Pa cifukwa cimeneci, mtima wanga unasangalala ndipo n’nalankhula mokondwela kwambili. Ndiponso ine ndidzakhala ndi ciyembekezo, ²⁷ cifukwa simudzandisiya m’Manda,* kapena kulola kuti thupi la munthu wokhulupilika kwa inu liole. ²⁸ Mwandidziwitsa njila za moyo, ndipo ndikakhala nanu pafupi* mudzacititsa kuti ndisangalale kwambili.’ ²⁹ “Amuna inu, abale, ndiloleni ndilankhule mwaufulu za kholo lathu Davide. Iye anamwalila ndi kuikidwa m’manda, ndipo manda ake tili nao mpaka lelo. ³⁰ Popeza iye anali mneneli, ndipo anali kudziwa kuti Mulungu anamulonjeza mwakucita kulumbila kuti pa mpando wake wacifumu adzaikapo mmodzi wa mbadwa zake. ³¹ Anaonelatu pasadakhale ndipo anakambilatu za kuuka kwa Khristu kuti sadzasiidwa m’Manda,* ndipo thupi lake silidzaola. ³² Mulungu anaukitsa Yesu ameneyu, ndipo ife tonse ndife mboni za nkhani imeneyi. ³³ Conco, cifukwa cakuti iye anakwezedwa n’kukhala kudzanja lamanja la Mulungu ndipo analandila mzimu woyela umene Atate analonjeza, iye ndiye watipatsa* mzimu woyela malinga ndi zimene mukuona ndi kumva. ³⁴ Davide sanapite kumwamba, koma iyeyo anati, ‘Yehova* anauza Ambuye wanga kuti: “Khala kudzanja langa lamanja, ³⁵ mpaka nditaika adani ako kuti akhale copondapo mapazi ako.”’ ³⁶ Conco nyumba yonse ya Isiraeli idziwe ndithu kuti Yesu ameneyu, amene inu munamuphela pamtengo, Mulungu anamuika kukhala Ambuye komanso Khristu.” ³⁷ Anthuwo atamva mau amenewo anakhudzika mtima kwambili* moti anafunsa Petulo ndi atumwi ena onse kuti: “Amuna inu, abale, ndiye ticite ciani?” ³⁸ Petulo anawayankha kuti: “Lapani, ndipo aliyense wa inu abatizidwe m’dzina la Yesu Khristu kuti macimo anu akhululukidwe. Mukacita izi, mudzalandila mphatso ya mzimu woyela kwaulele. ³⁹ Cifukwa lonjezoli lipita kwa inu, kwa ana anu, komanso kwa anthu onse okhala kutali, onse amene Yehova* Mulungu wathu angawaitane.” ⁴⁰ Ndi mau enanso ambili, Petulo anacitila umboni mokwanila, komanso anapitiliza kuwadandaulila kuti: “Dzipulumutseni ku m’badwo uwu wa maganizo opotoka.” ⁴¹ Cotelo amene analandila mau ake mokondwela anabatizidwa. Moti pa tsikulo, anthu amene anaonjezekawo anali pafupi-fupi 3,000. ⁴² Iwo anapitiliza kutsatila zimene atumwi anali kuphunzitsa, ndipo anali kucezela pamodzi,* kudyela pamodzi, komanso kupemphela. ⁴³ Anthu onse anayamba kucita mantha, ndipo atumwi anayamba kucita zodabwitsa ndi zizindikilo zambili. ⁴⁴ Onse amene anakhala okhulupilila anali kukhala pamodzi ndipo anali kugawana zonse zimene anali nazo. ⁴⁵ Iwo anali kugulitsa malo ndi zinthu zina zimene anali nazo, ndipo ndalama zake anali kugawila onse malinga ndi zosowa zao. ⁴⁶ Tsiku lililonse anali kusonkhana m’kacisi mogwilizana. Iwo anali kudyela pamodzi cakudya m’nyumba zao. Ndipo anali kugawana cakudya cao mokondwela kwambili komanso ndi mtima wonse. ⁴⁷ Analinso kutamanda Mulungu ndipo anthu onse anali kuwakonda. Panthawi imodzi-modzi, Yehova* tsiku lililonse anapitiliza kuonjezela anthu amene anali kuwapulumutsa.