Malaquias 2:1-17
2 “Ug karon, Oh mga saserdote, kining sugoa maoy alang kaninyo.+
2 Kon dili mo mamati ug kon dili ninyo kini seryosohon aron himayaon ang akong ngalan,” si Jehova sa mga panon miingon, “magpadala kog tunglo kaninyo,+ ug ang inyong mga panalangin himoon nakong tunglo.+ Oo, gihimo nakong tunglo ang mga panalangin, kay wala ninyo kini seryosoha.”
3 “Tan-awa! Tungod kaninyo, daoton* nako ang binhi nga inyong gipugas,+ ug hilam-osan nakog kinalibang ang inyong mga nawong, ang kinalibang sa mga hayop nga inyong gihalad sa inyong mga pista; ug kamo dad-on ngadto niini.*
4 Unya inyong mahibaloan nga gihatag nako kining sugoa kaninyo aron ang akong pakigsaad kang Levi magpadayon,”+ si Jehova sa mga panon miingon.
5 “Tungod sa akong pakigsaad kaniya, siya nagpabiling buhi ug malinawon. Tungod niana, siya nagpakitag kahadlok* kanako. Wala siya maghimog bisan unsa nga makapasuko kanako kay gipasidunggan niya ang akong ngalan.
6 Ang balaod* sa kamatuoran anaa sa iyang baba,+ ug walay pagkadaotan diha sa iyang mga ngabil. Siya naglakaw uban kanako sa pakigdait ug pagkamatarong,+ ug daghan siyag gipatalikod gikan sa kasaypanan.
7 Kay ang mga ngabil sa usa ka saserdote angayng magtudlo kanunay ug kahibalo, ug ang katawhan angayng mangita sa balaod* diha sa iyang baba,+ kay siya ang mensahero ni Jehova sa mga panon.
8 “Apan kamo mismo mitipas gikan sa dalan. Daghan ang napandol sa balaod tungod ninyo.*+ Inyong gilapas ang pakigsaad ni Levi,”+ si Jehova sa mga panon miingon.
9 “Busa atubangan sa tanang katawhan himoon mo nakong talamayon ug ubos, kay wala ninyo subaya ang akong mga dalan apan nagpihigpihig mo sa pagpadapat sa balaod.”+
10 “Dili ba usa ra ang amahan natong tanan?+ Dili ba usa ra ka Diyos ang naglalang nato? Busa nganong giluiban nato ang usag usa,+ nga nagpasipala sa pakigsaad sa atong mga katigulangan?
11 Ang Juda nagmaluibon, ug dihay gihimong dulumtanang butang diha sa Israel ug Jerusalem; kay gipasipalahan sa Juda ang pagkabalaan* ni Jehova,+ nga Iyang gihigugma, ug iyang gipangasawa ang anak sa usa ka langyawng diyos.+
12 Laglagon ni Jehova gikan sa mga tolda ni Jacob si bisan kinsa nga naghimo niini, bisan kinsa pa siya,* bisag naghalad pa siya kang Jehova sa mga panon.”+
13 “Ug duna pa moy laing* gibuhat, nga tungod niini ang halaran ni Jehova napunog luha, paghilak, ug pagpanghupaw, mao nga wala na siya magtagad sa inyong halad o magpakitag pag-uyon sa bisan unsa nga gikan sa inyong kamot.+
14 Ug miingon mo, ‘Tungod sa unsa?’ Tungod kini kay si Jehova nagsilbing saksi tali kanimo ug sa asawa sa imong pagkabatan-on nga imong giluiban, bisan tuod siya imong kapikas ug asawa pinaagig pakigsaad.*+
15 Apan dihay usa nga wala mobuhat niini, kay anaa kaniya ang nahibilin sa espiritu. Ug unsay iyang gitinguha? Ang kaliwat* sa Diyos. Busa bantayi ninyo ang kiling sa inyong panghunahuna,* ug ayaw mo pagluib sa asawa sa inyong pagkabatan-on.
16 Kay akong* gidumtan ang pagdiborsiyo,”+ miingon si Jehova nga Diyos sa Israel, “ug ang usa nga nagbestig* kapintasan,” si Jehova sa mga panon miingon. “Ug bantayi ang kiling sa inyong panghunahuna,* ug ayaw mo pagluib.+
17 “Gipaluya ninyo si Jehova sa inyong mga pulong.+ Apan miingon mo, ‘Giunsa man namo siya pagpaluya?’ Pinaagi sa pag-ingon, ‘Ang nagabuhat ug daotan maoy maayo sa mga mata ni Jehova, ug siya may kalipay kaniya,’+ o pinaagi sa pag-ingon, ‘Asa man ang Diyos sa hustisya?’”
Mga Footnote
^ Literal, “badlongon.”
^ Sa dapit nga labayanag kinalibang sa mga gihalad.
^ O “pagtahod.”
^ O “instruksiyon.”
^ O “instruksiyon.”
^ O posible, “sa inyong instruksiyon.”
^ O posible, “sangtuwaryo.”
^ Literal, “ang usa nga nagmata ug ang usa nga nagtubag.”
^ Literal, “ikaduhang.”
^ O “legal nga asawa.”
^ Literal, “binhi.”
^ Literal, “ang inyong espiritu.”
^ Literal, “iyang.”
^ O “naghimog.”
^ Literal, “ang inyong espiritu.”
