Josua 16:1-10
16 Mo graon blong olgeta we oli kamaot biaen long Josef,+ we oli yusum spesel ston+ blong faenemaot, i stat long Jodan Reva klosap long Jeriko, i go kasem ol wota long is blong Jeriko, i pastru long draeples ya we i stat long Jeriko i go antap long rijen blong ol hil long Betel,+
2 i go kasem Betel ya klosap long Lus, mo i stat long ples ya i go kasem boda blong ol laen blong Aki long Atarot,
3 mo i godaon long wes saed blong boda blong ol laen blong Jaflet, i go klosap long boda blong Betoron Daon+ mo Gesa,+ mo i go finis long solwota.*
4 Nao laen blong Josef,+ hemia Manase mo Efrem, oli go holem ol graon ya we oli kasem.+
5 Boda blong graon blong ol famle long laen blong Efrem i olsem: Graon blong olgeta long is, boda blong hem i stat long Atarotada+ i go kasem Betoron Antap,+
6 mo i go finis long solwota. Long not, boda blong olgeta i stat long Mikmetat,+ i pas i go long is, i kasem Tahanatsilo mo Janoa.
7 Mo i stat long Janoa i godaon kasem Atarot mo Naraha, mo i go kasem Jeriko,+ mo i go finis long Jodan Reva.
8 Mo boda we i stat long Tapua,+ hem i go kasem wes saed blong Wadi Long Kanaha, mo i go finis long solwota.+ Hemia nao graon blong ol famle long traeb blong Efrem.
9 Ol laen blong Efrem oli kasem sam taon tu wetem ol vilej raonabaot, we oli stap insaed long graon blong traeb blong Manase.+
10 Be oli no ronemaot ol laen blong Kenan we oli stap long Gesa,+ nao ol laen blong Kenan oli stap wetem ol laen blong Efrem kam kasem tede.+ Mo oli stap fosem olgeta blong mekem ol strong wok.+
Ol futnot
^ Hemia Big Si, Mediterenian Si.
