Josua 13:1-33

  • Graon we oli mas winim yet (1-7)

  • Ol graon we oli seraotem long is blong Jodan Reva (8-14)

  • Graon we Ruben i kasem (15-23)

  • Graon we Gad i kasem (24-28)

  • Graon we Manase i kasem long is (29-32)

  • Jehova i graon blong ol Livaet (33)

13  Nao Josua i kam olfala mo hem i no moa save laef longtaem moa.+ Ale Jehova i talem long hem se: “Naoia yu yu olfala, mo yu no moa save laef longtaem moa. Be i gat bigfala graon i stap yet we yufala i mas tekem.*  Hemia ol ples we i stap yet:+ Long olgeta rijen blong ol man Filistia mo ol man Gesuru,+  (we i stat long is saed* blong Ijip long ples we Nael Reva i seraot,* i go kasem teritori ya we fastaem hem i blong ol laen blong Kenan we i stap long boda blong Ekron long not,)+ wetem graon blong ol faef rula blong ol man Filistia:+ ol man Gasa, Asdod,+ Askelon,+ Gat,+ Ekron,+ mo graon ya Avim+  long saot, mo olgeta graon blong laen blong Kenan, mo Meara we i blong ol man Saedon,+ i go kasem Afek, long boda blong graon blong ol man Amoro,  mo graon blong ol man Gebal,+ mo olgeta graon long is blong Lebanon, stat long Balgad long stamba blong Hil Ya Hemon, i go kasem long Lebohamat,*+  mo ol man we oli stap long rijen blong ol hil, stat long Lebanon+ i go kasem Misrefotmaem,+ mo ol man Saedon,+ bambae mi givim long yufala. Bambae mi ronemaot* olgeta long fes blong ol man Isrel.+ Yu mas seraotem ol graon ya long ol man Isrel, stret olsem we mi bin talem long yu.+  Yu mas seraotem graon ya i go long ol naen traeb blong yufala, mo long haf traeb blong Manase blong oli stap long hem.”+  Narafala haf traeb blong Manase, laen blong Ruben, mo laen blong Gad, oli stap finis long graon blong olgeta long narasaed Jodan Reva long is, stret olsem we Moses man blong wok blong Jehova i givim long olgeta.+  Graon blong olgeta i stat long Aroere+ long saed blong Krik Blong Anon*+ i go, mo taon ya long medel blong vali, mo bigfala levelples antap long hil blong Medebaha i go kasem Dibon, 10  mo ol taon we King Sihon blong ol man Amoro i rul long olgeta, stat long Hesbon i go kasem boda blong ol man Amon,+ 11  mo Gilead mo teritori blong ol man Gesuru mo ol man Mahaka,+ mo olgeta ples long Hil Ya Hemon mo olgeta ples long Basan,+ i go kasem Salkaha,+ 12  mo olgeta ples long Basan we Og i rul long hem. Hem i rul long Astera mo Edrei, mo hem i wan long ol laswan Refaem.+ Moses i bin winim olgeta mo i ronemaot* olgeta.+ 13  Be ol man Isrel oli no ronemaot*+ ol man Gesuru mo ol man Mahaka, from we olgeta oli stap wetem ol man Isrel kasem tede. 14  Mo traeb blong Livae, Moses i no givim wan graon long olgeta+ from we Jehova God blong Isrel i promes long olgeta se samting we bambae oli kasem,+ hemia haf blong ol ofring we ol man oli bonem blong givim i go long God.+ 15  Nao Moses i givim wan graon long ol famle long traeb blong Ruben, 16  mo teritori blong olgeta i stat long Aroere long saed blong Krik Blong Anon,* i go, mo taon ya long medel blong vali, mo bigfala levelples antap long hil long Medebaha, 17  mo Hesbon wetem ol taon blong hem+ we oli stap long bigfala levelples antap long hil, Dibon, Bamotbal, Betbalmeon,+ 18  Jahaj,+ Kedemot,+ Mefahat,+ 19  Kiriataem, Sibma,+ Jeretsaha we i stap antap long bigfala hil klosap long vali,* 20  Betpeoro, ol saed blong hil blong Pisga,+ Betsesimot,+ 21  olgeta taon long bigfala levelples antap long hil, mo olgeta ples we King Sihon blong ol man Amoro, we i stap long Hesbon i rul long olgeta.+ Moses i winim hem+ wetem ol jif blong ol man Midian, hemia Evi, Rekem, Juru, Huru, Reba,+ mo ol king we oli stap aninit long paoa blong Sihon, we oli stap long ol ples ya. 22  Balam+ we i boe blong Beo, we i stap talemaot fiuja,+ hem tu i wan long olgeta ya we ol man Isrel oli kilim hem i ded long naef blong faet. 23  Mak blong graon blong ol laen blong Ruben hemia Jodan Reva. Mo hemia nao ol teritori wetem ol taon mo ol vilej we ol famle long laen blong Ruben oli kasem. 24  Mo tu, Moses i givim graon i go long ol famle long traeb blong Gad, 25  mo teritori blong olgeta hemia Jasere,+ mo olgeta taon long Gilead mo haf graon blong ol man Amon,+ i go kasem Aroere long saed we i fesem Raba.+ 26  Mo i stat long Hesbon+ i go kasem Ramatmispe mo Betonim, mo i stat long Mahanaem+ i go kasem boda blong Debiri, 27  mo long vali,* mo long Betaram, mo long Betnimra,+ mo long Sukot,+ mo long Jafon, mo olgeta ples we King Sihon blong Hesbon+ i rul long hem. Oli tekem ful saed blong Jodan Reva long is i go kasem Kineret Si.*+ 28  Hemia nao ol graon wetem ol taon mo ol vilej we ol famle long laen blong Gad oli kasem. 29  Mo tu, Moses i givim graon i go long haf traeb blong Manase, yes long ol famle long haf traeb blong Manase.+ 30  Mo teritori blong olgeta i stat long Mahanaem,+ i finisim olgeta ples long Basan, mo olgeta ples we King Og blong Basan i rul long hem, mo ol vilej blong Jaere+ long Basan we ol man oli laef long ol tent nomo. Oli tekem 60 taon evriwan. 31  Mo oli givim haf graon blong Gilead, Astera mo Edrei,+ hemia ol taon long Basan we King Og i rul long hem, i go long ol pikinini blong Makiri+ we i boe blong Manase, hemia haf blong ol pikinini blong Makiri. 32  Hemia nao ol graon we Moses i givim long olgeta taem oli stap long levelples blong Moab, long is saed blong Jeriko, narasaed long Jodan Reva.+ 33  Be ol traeb blong Livae, Moses i no givim graon long olgeta.+ Jehova God blong Isrel, hem i graon blong olgeta, stret olsem we hem i promes long olgeta.+

Ol futnot

NT: “winim.”
PT: “long fored.”
NT: “Ijip long Sihoro.”
NT: “long get blong Hamat.”
NT: “tekemaot.”
NT: “Wadi Long Anon.” Yu luk Diksonari.
NT: “tekemaot.”
NT: “tekemaot.”
NT: “Wadi Long Anon.”
NT: “levelples long medel blong ol hil.”
NT: “levelples long medel blong ol hil.”
Hemia lek ya Genesaret; Si Blong Galili.