Salmo 89:1-52
Sarong maskil.* Salmo ni Etan+ na Ezrahita.
89 Makanta ako sagkod lamang manungod sa mga kapahayagan nin maimbod na pagkamuot ni Jehova.
Paagi kan sakong nguso ipapaisi ko sa gabos na henerasyon an saimong kaimbudan.
2 Huli ta sinabi ko: “An maimbod na pagkamuot papasarigon* sagkod lamang,+Asin inestablisar mo nin marigon sa kalangitan an saimong kaimbudan.”
3 “Nakipagtipan ako sa sakuyang pinili;+Suminumpa ako sa lingkod kong si David:+
4 ‘Papagdanayon ko* sagkod lamang an saimong gikan,*+Asin papasarigon ko sa gabos na henerasyon an saimong trono.’”+ (Selah)
5 Inuumaw kan kalangitan an mga ginibo mong ngangalásan, O Jehova,Iyo, inuumaw sa katiripunan* kan mga banal an saimong kaimbudan.
6 Huli ta siisay sa kalangitan an maikukumparar ki Jehova?+
Siisay sa mga aki nin Diyos+ an siring ki Jehova?
7 Sa konseho* nin mga banal, an Diyos ibinibilang na kahanga-hanga;+Para sa gabos na nakapalibot sa saiya, siya nangungurog asin maninigo sa pagkatakot saka paggalang.+
8 O Jehova na Diyos nin mga hukbo,Siisay an makapangyarihan na arog mo, O Jah?+
Napapalibutan ka kan saimong kaimbudan.+
9 Pinapamahalaan mo an nag-aalimbukay na dagat;+Pag minaragasa an mga alon kaiyan, pinapakalma mo an mga iyan.+
10 Rinunot mo an Rahab+ na siring sa saro na ginadan.+
Paagi kan makusog mong takyag iwinararak mo an saimong mga kalaban.+
11 Saimo an kalangitan, asin saimo an daga;+An mabungang daga asin an gabos na yaon diyan+—ika an naggibo* kan mga iyan.
12 An norte asin an timog—ika an nagtalaga* kan mga iyan;An Tabor+ asin an Hermon+ maugmang nag-uumaw sa saimong pangaran.
13 An saimong takyag makapangyarihan;+An saimong kamot makusog;+An saimong tuong kamot iiniitaas.+
14 An katanusan asin hustisya iyo an pundasyon kan saimong trono;+An maimbod na pagkamuot asin kaimbudan nakatindog sa atubangan mo.+
15 Maugma an banwaan na nakakaaram kan kurahaw nin kaugmahan.+
O Jehova, naglalakaw sinda sa liwanag kan saimong lalawgon.
16 Huli sa saimong pangaran nag-uugma sinda nin bilog na aldaw,Asin huli sa saimong katanusan sinda nailalangkaw.
17 Huli ta ika an saindang kamurawayan asin kusog,+Asin huli sa pag-uyon mo nadadagdagan an samuyang kusog.*+
18 Huli ta an samuyang kalasag hali ki Jehova,An samuyang hadi hali sa Banal na Diyos* kan Israel.+
19 Kan panahon na iyan, nakipag-ulay ka sa mga maimbod sa saimo paagi sa bisyon asin nagsabi:
“Tinawan ko nin kusog an saro na makapangyarihan;+Ilinangkaw ko an saro na pinili hali sa banwaan.+
20 Nanumpungan ko si David na sakuyang lingkod;+Linahidan ko siya paagi kan sakuyang banal na lana.+
21 Aalalayan siya kan kamot ko,+Papakusugon siya kan takyag ko.
22 Mayo nin kalaban na mahagad nin tributo* sa saiya,Asin mayo nin bakong matanos na tawo na maapi sa saiya.+
23 Rurunuton ko sa atubangan niya an mga kaiwal niya+Asin gagaradanon ko an mga nauungis sa saiya.+
24 Ipapahiling ko sa saiya an sakong kaimbudan asin maimbod na pagkamuot,+Asin huli sa sakong pangaran madadagdagan an saiyang kusog.*
25 Ilalaag ko an saiyang kamot* sa ibabaw kan dagatAsin an saiyang tuong kamot sa ibabaw kan mga salog.+
26 Maapod siya sa sako: ‘Ika an sakuyang Ama,An sakuyang Diyos asin an Gapo nin sakong kaligtasan.’+
27 Asin itatalaga ko siya na iyo an magin panganay,+An pinakahalangkaw sa mga hadi kan daga.+
28 Papagdanayon ko sagkod lamang an sakong maimbod na pagkamuot sa saiya,+Asin dai nuarin man masusudya an sakong tipan sa saiya.+
29 Papagdanayon ko sagkod lamang an saiyang gikan*Asin papangyarihon ko na magdanay nin siring sa kalangitan an saiyang trono.+
30 Kun bayaan kan saiyang mga aki an sakuyang katugunanAsin dai sinda maglakaw sigun sa sakuyang mga dekreto,*
31 Kun balgahon ninda an sakuyang mga reglamentoAsin dai ninda sunudon an sakuyang mga tugon,
32 Kakastiguhon ko sinda paagi sa pamakol huli sa pagsuway* ninda+Asin paagi sa paghampak huli sa pagkakasala ninda.
33 Alagad dai ko nuarin man hahalion an maimbod na pagkamuot ko sa saiya+Ni magigin putikon kun manungod sa sakuyang panuga.*
34 Dai ko babalgahon an sakuyang tipan+O babaguhon man an mga itinaram kan sakuyang mga ngabil.+
35 Suminumpa na ako sa sakuyang kabanalan, sarong beses asin sagkod lamang;Dai ako mataram ki David nin mga kaputikan.+
36 An saiyang gikan* magdadanay sagkod lamang;+An saiyang trono magdadanay sa atubangan ko arog kan aldaw.+
37 Arog kan bulan, marigon iyan na maeestablisar sagkod lamangBilang sarong maimbod na saksi sa kalangitan.” (Selah)
38 Alagad ika mismo, isinikwal mo siya asin hinabuan;+Naanggot kang marhay sa saimong linahidan.
39 Isinikwal mo an tipan mo sa saimong lingkod;Hinalian mo nin onra an saiyang korona* paagi sa pag-apon kaiyan sa daga.
40 Ginaraba mo an gabos niyang kudal* na gibo sa gapo;Rinumpag mo an saiyang mga masarig na depensa.*
41 Sinamsaman siya kan gabos na nag-aaragi;Tinutuya-tuya siya kan saiyang mga pagtaraid.+
42 Pinangyari mong manggana an saiyang mga kaiwal;*+Pinangyari mong mag-urugma an gabos niyang kalaban.
43 Pinasibog mo man an saiyang espada,Asin pinangyari mong umatras siya sa ralaban.
44 Tinapos mo an saiyang kahanga-hangang kagayunanAsin ibinagsak mo sa daga an saiyang trono.
45 Pinahalipot mo an mga aldaw kan pagkahoben niya;Binaduan mo siya nin kasusupgan. (Selah)
46 O Jehova, sagkod nuarin ka magtatago? Sagkod lamang?+
Padagos daw na maglalaad nin siring sa kalayo an saimong grabeng kaanggutan?
47 Girumduma kun gurano kahalipot an buhay ko!+
Mayo daw nin katuyuhan an paglalang mo sa gabos na tawo?
48 Siisay na tawo an mabubuhay asin dai nuarin man magagadan?+
Maililigtas daw niya an saiyang sadiri* sa kapangyarihan kan Lubungan?* (Selah)
49 Hain na su dati mong mga gibo nin maimbod na pagkamuot, O Jehova,Na saimong isinumpa ki David huling maimbod ka?+
50 Girumduma, O Jehova, an mga panunuya sa saimong mga lingkod;Kun paano ko kinaipuhan na tiuson* an mga panunuya kan gabos na banwaan;
51 Kun paano nang-iinsulto an saimong mga kaiwal, O Jehova;Kun paano ninda ininsulto an lambang lakad kan saimong linahidan.
52 Pag-umawon lugod si Jehova sagkod lamang. Amen asin Amen.+
Mga Nota
^ O “magdadanay.”
^ O “Eestablisaron ko nin marigon.”
^ Sa literal, “banhi.”
^ O “kongregasyon.”
^ O “katiripunan.”
^ O “nag-establisar.”
^ O “naglalang.”
^ Sa literal, “nailalangkaw an samuyang sungay.”
^ O “sa Saro na Banal.”
^ Sa literal, “mailalangkaw an saiyang sungay.”
^ O “awtoridad.”
^ Sa literal, “banhi.”
^ O “mga ipinapautob na desisyon.”
^ O “pagrebelde.”
^ Sa literal, “Ni magpuputik man ako sa sakuyang kaimbudan.”
^ Sa literal, “banhi.”
^ O “diyadema.”
^ O “taguan.”
^ O “mga kuta.”
^ Sa literal, “Itinaas mo an tuong kamot kan saiyang mga kaiwal.”
^ O “kalag.”
^ Sa literal, “sa kamot kan Sheol,” an buot sabihon, an pangkagabsan na lubungan nin katawuhan. Hilingon sa Glosaryo.
^ Sa literal, “darahon sa sakong daghan.”
