Salmo 42:1-11
Para sa direktor nin musika. Maskil* kan mga aki ni Kora.+
42 Arog nin sarong usa na hinihidaw an tubig na nagbubulos,
Hinihidaw taka man,* O Diyos.
2 Napapaha ako* sa Diyos, sa buhay na Diyos.+
Nuarin daw ako makakaduman asin makakaatubang sa Diyos?+
3 An sakong mga luha an nagin kakanon ko aldaw asin banggi;Bilog na aldaw akong pigtutuya kan mga tawo: “Hain man an Diyos mo?”+
4 An mga bagay na ini sakong nagigirumduman, asin sasabihon ko sa saimo an gabos kong namamatian,*Huling naglakaw ako kaidto kaiba kan dakulon na tawo;Dati akong solemneng* naglakaw sa inutan ninda pasiring sa harong nin Diyos,Na may maugmang kurahaw asin pasasalamat,Hali sa sarong kadaklan na nagseselebrar nin kapiyestahan.+
5 Nata grabe an kamunduan ko?*+
Nata grabe an pagkapurisaw ko?
Maghahalat ako sa Diyos,+Huling uumawon ko pa siya bilang sakong Pinakanangungurog na Paraligtas.+
6 O Diyos ko, grabe an kamunduan ko.*+
Kaya nagigirumduman taka,+Mantang nasa rehiyon kan Jordan asin sa mga alituktok kan Hermon,Mantang nasa Bukid nin Mizar.*
7 Inaapod kan hararom na katubigan an hararom na katubiganPaagi sa tanog kan ragasa kan saimong busay.
Nasanop ako kan gabos mong alon na nag-aalimbukay.+
8 Sa aldaw, ipapahiling sa sako ni Jehova an maimbod na pagkamuot niya,Asin sa banggi, makanta ako manungod sa saiya—sarong pamibi sa Diyos kan sakuyang buhay.+
9 Ihahapot ko sa sakong Diyos na sakuyang dakulang gapo:
“Nata liningawan mo na ako?+
Nata kaipuhan kong maglakaw-lakaw na mamundo huli sa pang-aapi kan kalaban ko?”+
10 May pagkaungis akong tinutuya kan mga kalaban ko na garo baga gusto ninda akong gadanon;*Bilog na aldaw ninda akong pigtutuya: “Hain man an Diyos mo?”+
11 Nata grabe an kamunduan ko?*
Nata grabe an pagkapurisaw ko?
Maghahalat ako sa Diyos,+Huling uumawon ko pa siya bilang sakuyang Pinakanangungurog na Paraligtas asin sakuyang Diyos.+
