Salmo 135:1-21
135 Umawon nindo si Jah!*
Umawon an pangaran ni Jehova;Magtao kamong pag-umaw, kamong mga lingkod ni Jehova,+
2 Kamo na mga nakatindog sa harong ni Jehova,Sa mga patyo kan harong kan satuyang Diyos.+
3 Umawon si Jah, huli ta marahay si Jehova.+
Magkanta nin mga pag-umaw* sa pangaran niya, huli ta iyan nakakaugma.
4 Huli ta pinili ni Jah an Jacob para sa saiyang sadiri,An Israel bilang saiyang espesyal na pagsadiri.*+
5 Huli ta aram kong marhay na si Jehova nangungurog;An satuyang Kagurangnan mas urog kisa sa gabos na iba pang diyos.+
6 Ginigibo ni Jehova an gabos na gustuhon niya+Sa langit asin sa daga, sa kadagatan asin sa gabos na kararuman.
7 Pinapaitaas niya an mga panganuron* hali sa mga puro kan daga;Naggigibo siya nin kikilat* para sa uran;Pinapaluwas niya an duros hali sa saiyang mga bodega.+
8 Ginaradan niya an mga panganay kan Ehipto,Mga tawo asin hayop.+
9 Nagpaabot siya nin mga tanda asin mga milagro sa tahaw mo, O Ehipto,+Laban ki Faraon asin sa gabos niyang lingkod.+
10 Linaglag niya an dakul na nasyon+Asin ginaradan an makapangyarihan na mga hadi+
11 —Si Sihon na hadi kan mga Amorita,+Si Og na hadi kan Basan,+Asin an gabos na kahadian sa Canaan.
12 Itinao niya bilang mana an saindang kadagaan,Sarong mana para sa Israel na saiyang banwaan.+
13 O Jehova, nagdadanay sagkod lamang an saimong pangaran.
O Jehova, nagdadanay sa gabos na henerasyon an saimong kabantugan.*+
14 Huli ta idedepensa ni Jehova an* banwaan niya,+Asin kakahirakan niya an* mga lingkod niya.+
15 An mga idolo kan mga nasyon plata asin bulawan,Gibo kan mga kamot nin tawo.+
16 May nguso sinda, pero dai sinda nakakataram;+May mga mata, pero dai sinda nakakahiling;
17 May mga talinga sinda, pero dai sinda nakakadangog.
Mayo nin hinangos sa nguso ninda.+
18 An mga tawong naggigibo sa sainda magigin arog nanggad ninda,+Siring man an gabos na nagtitiwala sa sainda.+
19 O banwaan* nin Israel, umawon nindo si Jehova.
O pamilya* ni Aaron, umawon nindo si Jehova.
20 O pamilya* ni Levi, umawon nindo si Jehova.+
Kamong mga may pagkatakot ki Jehova, umawon nindo si Jehova.
21 Pag-umawon lugod si Jehova hali sa Sion,+An Saro na nag-iirok sa Jerusalem.+
Umawon nindo si Jah!+
Mga Nota
^ O “Aleluya!” Sa Ingles, Hallelujah. An “Jah” pinahalipot na porma kan pangaran na Jehova.
^ O “Maggibo nin musika para.”
^ O “pinapahalagahan na rugaring.”
^ O posibleng “nin mga sagop.”
^ O “alisngaw.”
^ O “pangaran.” Sa literal, “girumduman.”
^ O “an ipinapakipaglaban kan.”
^ O “Asin magbabasol siya para sa.”
^ Sa literal, “harong.”
^ Sa literal, “harong.”
^ Sa literal, “harong.”
