Nehemias 6:1-19
6 Han ginsumatan hi Sanbalat, hi Tobia,+ hi Gesem nga Arabiano,+ ngan an iba pa han amon mga kaaway nga akon gintukod utro an pader+ ngan waray na guhang nga nahisalin dida hito (bisan kon tubtob hito nga panahon waray ko pa maibutang an mga purtahan ha mga ganghaan),+
2 hira Sanbalat ngan Gesem nagpadara dayon hini nga mensahe ha akon: “Pakadi, ngan pagsabot kita hin takna nga magkikita kita ha mga baryo han Kapatagan han Ono.”+ Kondi nagpaplano hira nga buhatan ako hin maraot.
3 Salit nagsugo ako hin mga mensahero ha ira, nga nasiring: “Daku an buruhaton nga akon ginbubuhat, ngan diri ako makakalugsad ngada. Kay kon bumaya ako didi ngan kumada ha iyo, mauundang an buruhaton.”
4 Upat ka beses nga iginpadara nira ha akon an amo gihapon nga mensahe, ngan ha kada panahon amo la gihapon an akon iginbabaton ha ira.
5 Katapos, ha ikalima ka beses ginsugo ni Sanbalat ngadi ha akon an iya kabulig dara an amo gihapon nga mensahe, nga may ginkakaptan nga abrido nga surat.
6 Nakasurat dida hito: “Hinbatian na han mga nasud, ngan hi Gesem+ nasiring liwat, nga ikaw ngan an mga Judio nagpaplano pagrebelde.+ Ito an hinungdan nga gintutukod niyo an pader; ngan sumala hini nga mga sumat ikaw an ira magigin hadi.
7 Nagtoka ka liwat hin mga propeta basi magpasamwak mahitungod ha imo ha bug-os nga Jerusalem, ‘May-ada hadi ha Juda!’ Ngan yana isusumat ha hadi ini nga mga butang. Salit pakadi, ngan pag-iristoryahan naton ini.”
8 Kondi iginpadara ko ha iya ini nga baton: “Waray bisan usa han mga butang nga imo ginsisiring an tinuod; hinimo-himo mo la ito tikang ha imo kalugaringon nga imahinasyon.”*
9 Kay hira ngatanan nangangalimbasog nga hadlukon kami, nga nasiring: “An ira mga kamot magluluya ha buruhaton,+ ngan diri ito mahuhuman.” Yana, nag-aampo ako, parig-ona an akon mga kamot.+
10 Katapos, kinadto ako ha balay ni Semaias nga anak nga lalaki ni Delaias nga anak nga lalaki ni Mehetabel samtang waray hiya gawas-gawas didto. Nagsiring hiya: “Pagsabot kita hin takna nga magkikita kita ha balay han tinuod nga Dios, ha sulod han templo, ngan sadhan naton an mga purtahan han templo, kay makanhi hira basi patayon ka. Makanhi hira ha gab-i basi patayon ka.”
11 Pero nagsiring ako: “Sadang ba pumalagiw an usa nga lalaki nga pariho ha akon? Makakasulod ba ha templo an usa nga lalaki nga pariho ha akon ngan mabubuhi?+ Diri ako masulod!”
12 Katapos, nasantop ko nga waray hiya sugoa han Dios, kondi ginsuholan hiya nira Tobia ngan Sanbalat+ basi magyakan hini nga tagna kontra ha akon.
13 Ginsuholan hiya basi hadlukon ako ngan basi makasala ako, para magkaada hira hin mga basihan nga dauton an akon reputasyon basi mapakaalohan ako.
14 O Dios ko, hinumdumi hira Tobia+ ngan Sanbalat ngan ini nga ira mga buhat, ngan pati liwat hi Noadias nga propetisa ngan an iba pa han mga propeta nga padayon nga nangangalimbasog nga hadlukon ako.
15 Salit an pader natapos han ika-25 ka adlaw han Elul,* ha sulod han 52 ka adlaw.
16 Pakabati gud mahitungod hito han ngatanan namon nga kaaway ngan pakakita gud hito han ngatanan nga nakapalibot nga nasud, naawod hira hinduro,*+ ngan ira nasantop nga natapos ini nga buruhaton pinaagi han bulig han amon Dios.
17 Hito nga mga adlaw, an mga dungganon+ han Juda nagpapadara hin damu nga surat kan Tobia, ngan hi Tobia nabaton ha ira.
18 Damu ha Juda an nanumpa nga madapig ha iya, kay umagad hiya ni Secanias nga anak nga lalaki ni Arah,+ ngan an iya anak nga lalaki nga hi Jehohanan nag-asawa han anak nga babaye ni Mesulam+ nga anak nga lalaki ni Berekias.
19 Sugad man, pirme nira ako ginsusumatan hin mag-opay nga mga butang mahitungod ha iya ngan katapos ira iginsusumat ha iya an akon ginsisiring. Katapos, hi Tobia nagpapadara hin mga surat basi hadlukon ako.+
