Nehemias 13:1-31
13 Hito nga adlaw an libro ni Moises ginbasa ha atubangan han katawohan,+ ngan hin-agian nga nahisurat dida hito nga ha bisan san-o waray Ammonita o Moabita+ nga sadang sumulod ha kongregasyon han tinuod nga Dios,+
2 kay waray nira tagi hin tinapay ngan tubig an mga Israelita, kondi ginsuholan lugod nira hi Balaam kontra ha ira basi panhimarauton hira.+ Pero an panhimaraot ginhimo han amon Dios nga bendisyon.+
3 Pakabati gud han katawohan ha Balaud, gintikangan nira pagpaiwas ha Israel an ngatanan nga tulin hin taga-iba nga nasud.*+
4 Antes hini, an saserdote nga nagdudumara han mga bodega* ha balay* han amon Dios+ amo hi Eliasib,+ nga paryente ni Tobia.+
5 Iya iginpagamit ha iya an usa nga daku nga bodega,* diin iginbubutang nira hadto an halad nga tikang ha lugas, an busag nga insenso, ngan an mga garamiton ngan an ikanapulo nga bahin han lugas, han bag-o nga bino, ngan han lana,+ nga katungod han mga Levita,+ mga parakanta, ngan mga parabantay han ganghaan, pati na an amot para ha mga saserdote.+
6 Ngan durante hiton bug-os nga panahon waray ako ha Jerusalem, kay kinadto ako ha hadi ha ika-32 ka tuig+ ni Hadi Artaxerxes+ han Babilonya; ngan paglabay hin pipira ka panahon nagsarit ako ha hadi nga mabaya ako.
7 Katapos, inabot ako ha Jerusalem ngan nakita ko an maraot gud nga ginbuhat ni Eliasib+ pinaagi ha pagpagamit kan Tobia+ hin bodega ha bungsaran han balay han tinuod nga Dios.
8 Waray gud ako malipay hini, salit iginlabog ko ha gawas han bodega* an ngatanan nga muwebles han balay ni Tobia.
9 Katapos hito nagsugo ako, ngan ira ginlimpyohan an mga bodega;* ngan iginbalik ko didto an mga garamiton ha balay han tinuod nga Dios,+ pati na an halad nga tikang ha lugas ngan an busag nga insenso.+
10 Nadiskobrehan ko liwat nga an mga bahín han mga Levita+ diri naihahatag ha ira,+ salit an mga Levita ngan an mga parakanta nga nagbubuhat han buruhaton binaya, an tagsa ngadto ha iya kalugaringon nga uma.+
11 Salit ginsaway ko an kabulig nga mga magmarando+ ngan nagsiring: “Kay ano nga ginpapabay-an an balay han tinuod nga Dios?”+ Katapos, gintirok ko hira ngan ginpabalik ha ira mga toka.
12 Ngan gindara han bug-os nga Juda ngadto ha mga bodega+ an ikanapulo nga bahin+ han lugas, han bag-o nga bino, ngan han lana.
13 Katapos, igintoka ko hi Selemias nga saserdote, hi Zadok nga parakopya,* ngan hi Pedaias nga usa han mga Levita basi magdumara han mga bodega, ngan hi Hanan nga anak nga lalaki ni Zacur nga anak nga lalaki ni Matanias an ira kabulig, kay ini nga kalalakin-an gintatagad nga masasarigan. Responsabilidad nira nga ipanhatag an bahín han ira kabugtoan.
14 O Dios ko, hinumdumi ako+ may kalabotan hini, ngan ayaw paraa an akon mga buhat tungod han maunungon nga gugma nga akon ginbuhat para ha balay han akon Dios ngan ha mga buruhaton* didto.+
15 Hito nga mga adlaw may nakita ako nga mga tawo ha Juda nga nagtatamak-tamak hin mga ubas ha purog-an hito ha adlaw han Sabbath,+ nagdadara hin mga tambak han lugas ngan iginkakarga ito ha mga asno, ngan nagdadara hin mga bino, mga ubas, mga igos, ngan han tagsa nga klase hin kargamento ngadto ha Jerusalem ha adlaw han Sabbath.+ Salit ginpahamangnoan ko hira nga diri magbaligya hin mga pagkaon hito nga adlaw.*
16 Ngan an mga taga-Tiro nga naukoy ha syudad nagdadara hin mga isda ngan han ngatanan nga klase hin tinda, ngan iginbabaligya nira ito ha katawohan han Juda ngan ha Jerusalem durante han Sabbath.+
17 Salit ginsaway ko an mga dungganon han Juda ngan ginsidngan hira: “Ano ini nga karaotan nga iyo ginbubuhat? Ginpapasiparahan niyo an adlaw han Sabbath!
18 Diri ba ini an ginbuhat han iyo mga kaapoy-apoyan, salit ginpahinabo han aton Dios ini ngatanan nga kadaot ha aton ngan pati hini nga syudad? Yana iyo gindudugangan an naglalaga nga kasina kontra ha Israel pinaagi han pagpasipara ha Sabbath.”+
19 Salit han nagtitikasirom na ha mga ganghaan han Jerusalem antes han Sabbath, nagsugo ako nga sadhan an mga purtahan. Nagsiring liwat ako nga diri nira ito sadang abrihan samtang Sabbath pa, ngan ginpapwesto ko ha mga ganghaan an pipira han akon kalugaringon nga mga kabulig basi waray mga kargamento nga madadara ha sulod ha adlaw han Sabbath.
20 Salit an mga negosyante ngan an mga parabaligya han ngatanan nga klase hin tinda makausa o makaduha nga nagpalabay han gab-i ha gawas han Jerusalem.
21 Katapos, ginpahamangnoan ko hira ngan ginsidngan hira: “Kay ano nga nagpapalabay kamo han gab-i ha atubangan han pader? Kon buhaton niyo ito utro, magamit ako hin pwersa ha pagpaiwas ha iyo.” Tikang hito nga panahon waray na hira kumadto durante han Sabbath.
22 Ngan ginsidngan ko an mga Levita nga kinahanglan regular nga magputli hira han ira kalugaringon ngan kumadto ngan bantayan an mga ganghaan basi matipigan nga baraan an adlaw han Sabbath.+ Hinumdumi liwat ini para ha akon kaopayan, O Dios ko, ngan pagpakita ha akon hin kalooy uyon ha imo hura nga maunungon nga gugma.+
23 Hito nga mga adlaw hinbaroan ko liwat nga may mga Judio nga nag-asawa* hin Asdodita,+ Ammonita, ngan Moabita+ nga kababayin-an.+
24 An katunga han ira mga anak nagyayakan han yinaknan han mga Asdodita ngan an katunga nagyayakan han yinaknan han iba-iba nga mga katawohan, kondi waray bisan usa ha ira an maaram magyakan han yinaknan han mga Judio.
25 Salit ginsaway ko hira ngan ginpanhimaraot hira ngan iginpakastigo an pipira han kalalakin-an+ ngan ginrabnot an ira buhok ngan ginpasumpa hira ha ngaran han Dios: “Diri niyo sadang ihatag an iyo mga anak nga babaye ha ira mga anak nga lalaki, ngan diri niyo sadang karawaton an bisan hin-o han ira mga anak nga babaye para ha iyo mga anak nga lalaki o ha iyo kalugaringon.+
26 Diri ba tungod hini nakasala hi Hadi Solomon han Israel? Ha butnga han damu nga nasud waray hadi nga pariho ha iya;+ ngan hinigugma hiya han iya Dios,+ salit an Dios naghimo ha iya nga hadi han bug-os nga Israel. Pero bisan hiya nakasala tungod han mga asawa nga taga-iba nga nasud.+
27 Diri katoohan nga iyo ginbubuhat inin daku nga karaotan pinaagi han pagin diri matinumanon ha aton Dios tungod han iyo pag-asawa hin mga babaye nga taga-iba nga nasud!”+
28 Usa han mga anak nga lalaki ni Joiada+ nga anak ni Eliasib+ nga hitaas nga saserdote an nagin umagad ni Sanbalat+ nga Horonita. Salit ginpaiwas ko hiya tikang ha akon.
29 Hinumdumi hira, O Dios ko, kay ira ginhugawan an pagkasaserdote ngan an kasabotan nga ginhimo ha mga saserdote+ ngan ha mga Levita.+
30 Ngan ginputli ko hira tikang ha ngatanan nga kahugaw han mga taga-iba nga nasud, ngan gintagan ko hin mga toka an mga saserdote ngan an mga Levita, an tagsa ngadto ha iya kalugaringon nga buruhaton,+
31 ngan naghimo ako hin mga kahikayan para han suplay han kahoy+ ha itinanda nga mga panahon ngan para han siyahan nga hinog nga mga bunga.
O Dios ko, hinumdumi ako nga may pag-uyon.+
Mga footnote
^ O “nga may halo nga iba nga lahi.”
^ O “mga kwarto nga pangaonan.”
^ O “templo.”
^ O “kwarto nga pangaonan.”
^ O “kwarto nga pangaonan.”
^ O “mga kwarto nga pangaonan.”
^ O “eskriba.”
^ O “ha pagpanginano.”
^ O posible nga “ginpahamangnoan ko hira hito nga adlaw nga diri magbaligya hin mga pagkaon.”
^ O “nagdara ha ira mga balay.”
