Jeremias 21:1-14
21 Nakarawat ni Jeremias an pulong tikang kan Jehova han ginpakadto ha iya ni Hadi Zedekias+ hi Pasur+ nga anak nga lalaki ni Malkias ngan hi Zepanias+ nga anak nga lalaki ni Maaseias, nga saserdote, nga naghahangyo:
2 “Alayon pagpakiana kan Jehova para ha amon, kay hi Hadi Nabucodonosor* han Babilonya nakikiggirra ha amon.+ Bangin man la magbuhat hi Jehova para ha amon han usa han Iya gamhanan nga mga buhat, basi umatras hiya tikang ha amon.”+
3 Hi Jeremias nagsiring ha ira: “Ini an sadang niyo igsiring kan Zedekias,
4 ‘Ini an siring ni Jehova nga Dios han Israel: “Kitaa, ig-aatubang ko kontra ha iyo* an mga armas nga pan-girra nga aada ha iyo mismo mga kamot, nga iyo ginagamit ha pakiggirra ha hadi han Babilonya+ ngan ha mga Caldeo nga nakapalibot ha iyo ha gawas han pader. Ngan paninirukon ko ito* ngadto ha butnga hini nga syudad.
5 Ngan ako mismo an makikiggirra ha iyo+ pinaagi hin nakaunat nga kamot ngan gamhanan nga butkon, nga may kasina ngan kapungot ngan duro nga kangalas.+
6 Hahampakon ko an mga naukoy hini nga syudad, an tawo ngan an hayop. Pinaagi hin grabe nga peste* magkakamatay hira.”’+
7 “‘“Ngan katapos hito,” nasiring hi Jehova, “itutubyan ko hi Hadi Zedekias han Juda ngan an iya mga surugoon ngan an katawohan hini nga syudad—an mga makakatalwas ha peste, ha espada, ngan ha gutom—ngadto ha kamot ni Hadi Nabucodonosor* han Babilonya, ha kamot han ira mga kaaway, ngan ha kamot han mga nag-iikaparatay ha ira.*+ Pamamatayon niya hira pinaagi han espada. Diri hiya masusubo para ha ira, ngan diri liwat hiya magpapakita hin pagpaid o malolooy.”’+
8 “Ngan sadang mo sidngan ini nga katawohan, ‘Ini an siring ni Jehova: “Kitaa, iginbubutang ko ha iyo atubangan an dalan han kinabuhi ngan an dalan han kamatayon.
9 An mga magpapabilin hini nga syudad mamamatay pinaagi han espada, han gutom, ngan han peste. Kondi padayon nga mabubuhi an bisan hin-o nga magawas ngan masurender ha mga Caldeo nga nakapalibot ha iyo, ngan an iya kinabuhi* magigin dinag-an niya.”’*+
10 “‘“Kay iginsalikway ko ini nga syudad ngan makakaeksperyensya ini hin kabungkagan ngan diri hin kaopayan,”+ nasiring hi Jehova. “Itutubyan ini ha kamot han hadi han Babilonya,+ ngan susunugon niya ini ha kalayo.”+
11 “‘Para ha panimalay han hadi han Juda: Pamatii an pulong ni Jehova.
12 O panimalay ni David, ini an siring ni Jehova:
“Ipadapat an hustisya kada aga,Ngan talwasa ha kamot han nanlilimbong an tawo nga ginkuhaan hin panag-iya,+Basi an akon kapungot diri maglarab pariho hin kalayo+Ngan maglaga nga waray bisan hin-o nga makakaparong
Tungod han iyo magraot nga mga binuhatan.”’+
13 ‘Kitaa, nakontra ako ha imo, O ikaw nga naukoy ha walog,*O bato ha patag nga tuna,’ nasiring hi Jehova.
‘Mahitungod ha iyo nga nasiring: “Hin-o an maatake ha amon?
Ngan hin-o an masulong ha amon mga urukyan?”
14 Sisirotan ko kamoNga amo an angay ha iyo mga binuhatan,’+ nasiring hi Jehova.
‘Ngan palalarabon ko an iya kagurangan,Ngan uugtangon han kalayo an ngatanan nga butang ha palibot niya.’”+
Mga footnote
^ Lit., “Nabucodorosor,” usa pa nga ginagamit nga ispeling.
^ O “bibirikon ko.”
^ O posible nga “hira.”
^ O “sakit.”
^ O “namimiling han ira kalag.”
^ Lit., “Nabucodorosor,” usa pa nga ginagamit nga ispeling.
^ O “kalag.”
^ O “ngan makakapalagiw hiya nga buhi.”
^ O “hamubo nga kapatagan.”
