An Siyahan nga Surat ni Pedro 1:1-25
1 Tikang kan Pedro, nga apostol+ ni Jesu-Kristo, para ha temporaryo nga mga residente nga nagpatsarang ha Ponto, Galacia, Capadocia,+ Asia, ngan Bitinia, para ha mga pinili
2 uyon ha hinbabaroan nga daan han Dios nga Amay,+ nga ginbaraan pinaagi han espiritu,+ ha katuyoan nga magin masinugtanon ngan mawisikan han dugo ni Jesu-Kristo:+
Mahura unta kamo han diri matupngan nga pagkabuotan ngan kamurayawan.
3 Pagdayawon an Dios ngan Amay han aton Ginoo nga hi Jesu-Kristo, kay uyon ha iya daku nga kalooy ginpahinabo niya nga ig-anak utro kita+ ngadto ha buhi nga paglaom+ pinaagi han pagkabanhaw ni Jesu-Kristo tikang ha mga patay,+
4 ngadto ha panurundon nga diri nadudunot ngan waray hugaw ngan diri nalubad.+ Iginreserba ito ha langit para ha iyo,+
5 nga ginpapanalipdan pinaagi han gahum han Dios tungod han iyo pagtoo para ha katalwasan nga andam igpahayag ha kataposan nga peryodo han panahon.
6 Tungod hini nagrarayhak gud kamo, bisan kon ha halipot nga panahon, kon ginkikinahanglan ito, nagsasakit kamo tungod han magkalain-lain nga mga pagsari,+
7 basi an nasarihan nga kalidad han iyo pagtoo,+ nga mas daku an bili kay han bulawan nga nadadaot bisan kon ginsarihan* na ito ha kalayo, magresulta hin kadayawan ngan himaya ngan dungog ha panahon nga ipahayag hi Jesu-Kristo.+
8 Bisan kon waray gud niyo hiya makita, hinigugma niyo hiya. Bisan kon diri niyo hiya nakikita yana, pero nagpapakita kamo hin pagtoo ha iya ngan nagrarayhak gud nga may diri maisaysay ngan daku nga kalipay,
9 samtang nakakab-ot niyo an tumong han iyo pagtoo, an iyo katalwasan.*+
10 May kalabotan hini nga katalwasan, an mga propeta nga nanagna mahitungod han diri matupngan nga pagkabuotan nga para ha iyo, maduruto nga nagpakiana ngan nag-usisa hin maopay.+
11 Padayon nga gin-usisa nira kon ano nga espisipiko nga panahon o kon ano nga panahon an gintutudlok han espiritu nga aada ha ira may kalabotan ha Kristo+ han abanse nga ginpamatud-an hito an mahitungod han mga pag-antos nga para ha Kristo+ ngan mahitungod han himaya nga masunod.
12 Iginpahayag ha ira nga nagsiserbi hira diri ha ira kalugaringon, kondi ha iyo, may kalabotan ha iginpahibaro ha iyo yana han mga nagpasamwak ha iyo han maopay nga sumat pinaagi han baraan nga espiritu nga iginpadara tikang ha langit.+ Mahitungod hini mismo nga mga butang, an mga anghel naghihingyap gud nga makasabot.
13 Salit iandam an iyo hunahuna para ha buruhaton;+ tipigi nga bug-os an iyo maopay nga panhunahuna;+ ibutang an iyo paglaom ha diri matupngan nga pagkabuotan nga ihahatag ha iyo ha panahon nga ipahayag hi Jesu-Kristo.
14 Sugad nga masinugtanon nga mga anak, ayaw na kamo pagpamolde* ha mga hingyap niyo hadto tungod han iyo kaignorante,
15 lugod pariho ha Baraan nga Dios nga nagtawag ha iyo, magin baraan kamo ha ngatanan niyo nga panggawi,+
16 kay nahisurat na: “Kinahanglan magin baraan kamo, kay ako baraan.”+
17 Ngan kon natawag kamo ha Amay nga waray ginpapaurog+ kon naghuhukom uyon ha ginbubuhat han kada tagsa, gumawi kamo nga may kahadlok+ ha panahon han iyo pagin temporaryo nga residente.
18 Kay maaram kamo nga diri pinaagi han nadudunot nga mga butang, pinaagi han silber o bulawan, nga gintagan kamo hin kagawasan*+ tikang ha iyo waray pulos nga pagkinabuhi nga iginpasa ha iyo pinaagi han iyo mga kaapoy-apoyan.*
19 Lugod pinaagi ito han presyoso nga dugo+ han Kristo,+ nga pariho han dugo han kordero nga waray depekto ngan putli.+
20 Ha pagkamatuod, ginpili na hiya han Dios antes pa han tinikangan han kalibotan,+ pero iginpadayag hiya ha kataposan han mga panahon para ha iyo kaopayan.+
21 Pinaagi ha iya nagin mga tumuroo kamo ha Dios,+ nga nagbanhaw ha iya tikang ha mga patay+ ngan naghatag ha iya hin himaya,+ basi tumoo ngan maglaom kamo ha Dios.
22 Yana nga ginputli na niyo an iyo kalugaringon* pinaagi han iyo pagkamasinugtanon ha kamatuoran nga nagresulta hin minagburugto nga gugma nga diri hipokrito,+ higugmaa gud an usa kag usa tikang ha kasingkasing.+
23 Kay ginpahinabo nga ig-anak utro kamo,+ diri pinaagi han nadudunot, kondi pinaagi han diri nadudunot nga binhi,*+ pinaagi han pulong han buhi ngan nagpapadayon nga Dios.+
24 Kay “an ngatanan nga tawo* pariho hin banwa, ngan an ngatanan nga himaya hito pariho hin bukad ha kapatagan; an banwa nalalaya, ngan an bukad nahuhulog,
25 pero an pulong ni Jehova* nagpapadayon ha waray kataposan.”+ Ngan ini nga “pulong” amo an maopay nga sumat nga iginpasamwak ha iyo.+
