Efangele ya ga Mathaio 9:1-38

  • Jesu o fodisa motho yo o sa kgoneng go tsamaya (1-8)

  • Jesu o bitsa Mathaio (9-13)

  • Potso ka go itima dijo (14-17)

  • Morwadia Jairo; mosadi o kgoma seaparo sa ga Jesu sa ka fa ntle (18-26)

  • Jesu o fodisa difofu le dimumu (27-34)

  • Thobo e kgolo mme badiri ba mmalwa (35-38)

9  Ka jalo, o ne a palama mokoro, mme a kgabaganya a ya kwa motseng wa gagabo.+  Mme batho bangwe ba ne ba mo tlisetsa monna yo o sa kgoneng go tsamaya, a rapame mo bolaong. E rile Jesu a bona gore ba na le tumelo, o ne a raya monna yoo a re: “Nna pelokgale, ngwanaka! O itshwaretswe maleo a gago.”+  Jaanong bakwadi bangwe ba ne ba ipolelela jaana: “Motho yono o a tlhapatsa.”  E re ka Jesu a ne a lemoga se ba se akanyang, o ne a re: “Ke ka ntlha yang fa lo akanya dikakanyo tseo tse di bosula?+  Ka sekai, ke eng se se motlhofo, a ke go raya motho o re, ‘O itshwaretswe maleo a gago,’ kgotsa go mo raya o re, ‘Ema mme o tsamaye’?+  Le fa go ntse jalo, e le gore lo tle itse gore Morwa motho o na le taolo ya go itshwarela batho maleo mo lefatsheng . . .” foo o ne a raya monna yoo yo o sa kgoneng go tsamaya a re: “Ema, tsaya bolao jwa gago, mme o ye gae.”+  Mme o ne a ema a bo a ya gae.  Fa boidiidi bo bona seno, bo ne jwa welwa ke poifo, mme bo ne jwa galaletsa Modimo, yo o neileng batho taolo e e ntseng jalo.  Morago ga moo, fa Jesu a ntse a tsweletse ka loeto a tswa koo, o ne a bona monna mongwe yo o bidiwang Mathaio a ntse fa ofising ya lekgetho, mme o ne a mo raya a re: “Nna molatedi wa me.” Ka yone nako eo, o ne a ema a bo a mo sala morago.+ 10  Moragonyana fa a ntse a ja* mo ntlong ya ga Mathaio, bakgethisi le baleofi ba le bantsi ba ne ba tla mme ba ja le Jesu le barutwa ba gagwe.+ 11  Le fa go ntse jalo, e rile Bafarasai ba bona seno, ba ne ba raya barutwa ba gagwe ba re: “Ke ka ntlha yang fa moruti wa lona a ja le bakgethisi le baleofi?”+ 12  E rile a ba utlwa, o ne a re: “Batho ba ba sa lwaleng ga ba tlhoke ngaka, mme ba ba lwalang ba a e tlhoka.+ 13  Ka jalo, tsamayang, mme lo ithute gore seno se kaya eng: ‘Ke batla gore lo utlwele batho botlhoko, go na le gore lo nkentshetse setlhabelo.’+ Gonne ke tletse go bitsa baleofi, e seng batho ba ba siameng.” 14  Go tswa foo, barutwa ba ga Johane ba ne ba tla kwa go ene ba bo ba mmotsa ba re: “Ke ka ntlha yang fa rona le Bafarasai re itima dijo mme barutwa ba gago bone ba sa itime dijo?”+ 15  Foo Jesu o ne a ba raya a re: “Ditsala tsa monyadi ga di na lebaka la go hutsafala fa monyadi a sa ntse a na le tsone,+ gakere? Le fa go ntse jalo, nako e tla tla ya gore monyadi a tlosiwe mo go tsone,+ mme ke gone di tla itimang dijo. 16  Ga go na ope yo o rokelelang letsela le lesha mo seaparong se segologolo, ka gonne letsela le sesha le tla gagola seaparo seo, mme fa go neng go gagogile teng go tla nna maswe le go feta.+ 17  E bile batho ga ba tshele beine e ntšha mo medutwaneng* ya beine e megologolo. Fa ba ka dira jalo, medutwana ya beine e tla phatloga mme beine e bo e tshologa. Le fa go ntse jalo, batho ba tshela beine e ntšha mo medutwaneng ya beine e mesha, mme dilo tseo ka bobedi di ka se senyege.” 18  Fa a ntse a ba bolelela dilo tseno, mmusi mongwe o ne a atamela mme a obama* fa pele ga gagwe a re: “Mo nakong eno morwadiake o tshwanetse a bo a sule, le fa go ntse jalo, tla o mmeye seatla mme o tla tshela.”+ 19  Foo Jesu o ne a ema le barutwa ba gagwe, mme ba mo sala morago. 20  Mme mosadi mongwe yo o neng a na le bolwetse jwa go elela madi dingwaga di le 12,+ o ne a mo atamela a tswa kwa morago a bo a kgoma karolo e e kwa tlase ya seaparo sa gagwe sa ka fa ntle,+ 21  ka gonne o ne a nna a ipolelela a re: “Fa fela nka kgoma seaparo sa gagwe sa ka fa ntle, ke tla fola.” 22  Jesu o ne a retologa, mme a mmona a bo a re: “Nna pelokgale, morwadiaka! Tumelo ya gago e go fodisitse.”+ Mme go tloga ka nako eo, mosadi yoo o ne a fola.+ 23  Jaanong, e rile Jesu a goroga kwa ntlong ya mmusi yono mme a bona batho ba ba letsang difulutu le boidiidi bo tsositse tlhakatlhakano,+ 24  o ne a re: “Tlogang fano, ka gonne mosetsanyana ga a swa, mme o robetse.”+ Fa a rialo, ba ne ba simolola go mo tshega ka tshotlo. 25  Fela fa boidiidi bo sena go ntshediwa kwa ntle, o ne a tsena kwa mosetsanyana yoo a neng a le gone a bo a tshwara seatla sa gagwe,+ mme mosetsanyana yoo o ne a tsoga.+ 26  Mme kgang eno e ne ya anama mo kgaolong eo yotlhe. 27  Fa Jesu a ntse a tsweletse ka loeto a tswa koo, banna ba babedi ba ba foufetseng+ ba ne ba mo sala morago, ba goa ba re: “Re utlwele botlhoko, Morwa Dafide.” 28  Fa a sena go tsena mo ntlong, banna bao ba ba foufetseng ba ne ba tla kwa go ene, mme Jesu o ne a ba botsa a re: “A lo a dumela gore nka dira seno?”+ Ba ne ba mo araba ba re: “Ee, Morena.” 29  Foo o ne a kgoma matlho a bone,+ a re: “E re ka lo na le tumelo, matlho a lona a tla bulega.” 30  Mme ba ne ba kgona go bona. Mo godimo ga moo, Jesu o ne a ba tlhagisa a tiisitse, a re: “Lo tlhomamise gore ope a se ka a itse kgang eno.”+ 31  Le fa go ntse jalo, fa ba sena go tswela kwa ntle, ba ne ba bua ka ene phatlalatsa mo kgaolong eo yotlhe. 32  Fa ba tswa, batho ba ne ba mo tlisetsa monna yo o semumu yo o laolwang ke ledimona;+ 33  mme fa Jesu a sena go leleka ledimona leo, monna yoo yo o semumu o ne a bua.+ Ka jalo, boidiidi bo ne jwa gakgamala mme jwa re: “Ga go ise go ke go direge dilo tse di tshwanang le tseno mo Iseraele.”+ 34  Le fa go ntse jalo, Bafarasai ba ne ba re: “O leleka madimona ka maatla a a tswang kwa mmusing wa madimona.”+ 35  Mme Jesu o ne a tswa letsholo la go etela metse le metsana yotlhe, a ruta mo disinagogeng tsa bone, a rera dikgang tse di molemo tsa Bogosi e bile a fodisa bolwetse jwa mofuta mongwe le mongwe le bokoa jwa mofuta mongwe le mongwe.+ 36  Fa a bona boidiidi jwa batho, o ne a ba tlhomogela pelo,+ ka gonne ba ne ba sotlegile e bile ba gasame jaaka dinku tse di se nang modisa.+ 37  Foo o ne a raya barutwa ba gagwe a re: “Eleruri, thobo e kgolo, mme badiri ba mmalwa.+ 38  Ka jalo, kopang Mong wa thobo gore a romele badiri mo thobong ya gagwe.”+

Dintlha Tse di Kwa Tlase

Kgotsa “fa a ntse ka go sekama fa tafoleng.”
Bona “Modutwana” mo Ditlhaloso Tsa Mafoko.
Kgotsa “ikoba.”