Efangele ya ga Mathaio 16:1-28
16 Jaanong Bafarasai le Basadukae ba ne ba tla kwa go ene, mme ba ne ba mo leka, ba mo kopa gore a ba bontshe sesupo se se tswang kwa legodimong.+
2 O ne a ba raya a re: “Fa go nna maitseboa lwa re, ‘Kamoso go tla bo go se na maru, ka gonne loapi lo bohibidu jwa molelo,’
3 mme mo mosong lwa re, ‘Gompieno go tla nna tsiditsana e bile pula e tla na, ka gonne loapi lo bohibidu jwa molelo e bile lo letobo.’ Lo itse go tlhalosa kafa loapi lo lebegang ka gone, mme ga lo kgone go tlhalosa ditshupo tsa metlha.
4 Kokomana e e bosula le e e sa ikanyegeng* e nna e batla sesupo, mme ga e kitla e newa sesupo sepe+ ntle le sesupo sa ga Jona.”+ Fa a sena go rialo, o ne a tsamaya a ba tlogela.
5 Jaanong barutwa ba ne ba kgabaganyetsa ka kwa letlhakoreng le lengwe mme ba lebala go tsamaya ba tshotse dinkgwe.+
6 Jesu o ne a ba raya a re: “Nnang lo butse matlho mme lo ele tlhoko sebediso sa Bafarasai le Basadukae.”+
7 Ka jalo, ba ne ba buisana ba re: “Ga re a tla le dinkgwe dipe.”
8 E re ka Jesu a itse seno, o ne a re: “Ke ka ntlha yang fa lo buisana ka kgang ya gore ga lo a tla le dinkgwe, lona ba lo nang le tumelo e potlana?
9 A le jaanong ga lo ise lo tshware ntlha, kgotsa a ga lo gakologelwe dinkgwe tse tlhano tse go neng ga fepiwa banna ba le 5 000 ka tsone le gore lo ne lwa tlatsa dimmanki di le kae?+
10 Kgotsa dinkgwe di le supa tse go neng ga fepiwa banna ba le 4 000 ka tsone le gore lo ne lwa tlatsa dimmanki tse dikgolo* di le kae?+
11 Go tla jang go bo lo sa lemoge gore ke ne ke sa bue le lona ka senkgwe? Le fa go ntse jalo, elang tlhoko sebediso sa Bafarasai le Basadukae.”+
12 Foo ba ne ba tlhaloganya gore o ne a raya gore ba ele tlhoko thuto ya Bafarasai le Basadukae, e seng sebediso sa senkgwe.
13 Fa Jesu a sena go goroga mo kgaolong ya Kaesarea Filipi, o ne a botsa barutwa ba gagwe a re: “Batho ba re Morwa motho ke mang?”+
14 Ba ne ba re: “Bangwe ba re ke Johane Mokolobetsi,+ ba bangwe ba re ke Elija,+ mme ba bangwe bone ba re ke Jeremia kgotsa mongwe wa baporofeti.”
15 O ne a ba raya a re: “Mme lona lwa re ke mang?”
16 Simone Petere o ne a araba a re: “O Keresete,+ Morwa Modimo yo o tshelang.”+
17 Jesu o ne a mo raya a re: “Go itumela wena, Simone morwa Jona, ka gonne seno ga o a se senolelwa ke motho,* mme o se senoletswe ke Rre yo o kwa magodimong.+
18 Gape ke go raya ke re: O Petere,+ mme ke tla aga phuthego ya me mo lefikeng leno,+ mme dikgoro tsa Lebitla* ga di kitla di e fenya.
19 Ke tla go naya dilotlolo tsa Bogosi jwa magodimo, mme sepe fela se o tla se bofang mo lefatsheng se tla bo se setse se bofilwe kwa magodimong, e bile sepe fela se o tla se bofololang mo lefatsheng se tla bo se setse se bofolotswe kwa magodimong.”
20 Go tswa foo, o ne a laela barutwa ba gagwe a tiisitse gore ba se ka ba bolelela ope gore ke ene Keresete.+
21 Go tloga ka nako eo, Jesu o ne a simolola go tlhalosetsa barutwa ba gagwe gore o tshwanetse go ya Jerusalema mme baeteledipele le baperesiti ba bagolo le bakwadi ba tla mmogisa thata a bo a bolawa, le gore o tla tsosiwa mo letsatsing la boraro.+
22 Foo Petere o ne a mo tseela kwa thoko a bo a mo kgalemela, a re: “Ikutlwele botlhoko, Morena; dilo tseno ga di kitla di go diragalela.”+
23 Mme o ne a fularela Petere a bo a mo a raya a re: “Mpota ka fa morago, Satane! O sekgoreletsi mo go nna, ka gonne ga o akanye dikakanyo tsa Modimo, mme o akanya dikakanyo tsa batho.”+
24 Go tswa foo, Jesu o ne a raya barutwa ba gagwe a re: “Fa mongwe a batla go ntshala morago, a a iitatole mme a tseye kota ya gagwe ya tlhokofatso* a bo a ntshala morago a sa kgaotse.+
25 Gonne ope fela yo o batlang go sireletsa botshelo* jwa gagwe bo tla mo latlhegela, mme ope fela yo o latlhegelwang ke botshelo* jwa gagwe ka gonne e le molatedi wa me o tla boa a bo bona.+
26 Tota motho o tla boelwa ke eng fa a gapa lefatshe lotlhe mme a latlhegelwa ke botshelo* jwa gagwe?+ Kgotsa ke eng se motho a ka se ntshang gore a bone botshelo* jwa gagwe?+
27 Gonne Morwa motho o tla tla le baengele ba gagwe a le mo kgalalelong e Rraagwe a tla e mo nayang, mme ka nako eo o tla duela mongwe le mongwe go ya ka ditiro tsa gagwe.+
28 Ammaaruri ke a lo bolelela, go na le bangwe mo go ba ba emeng fano ba ba se kitlang ba swa pele ga ba bona Morwa motho a tla a le mo Bogosing jwa gagwe.”+
Dintlha Tse di Kwa Tlase
^ Kgotsa “e e dirang boaka.”
^ Kgotsa “dimmanki tsa mofago.”
^ Seger., “ke nama le madi.”
^ Kgotsa “Hadese.” Bona Ditlhaloso Tsa Mafoko.
^ Bona Ditlhaloso Tsa Mafoko.
^ Seger., “psy·kheʹ.” Bona Ditlhaloso Tsa Mafoko.
^ Seger., “psy·kheʹ.” Bona Ditlhaloso Tsa Mafoko.
^ Seger., “psy·kheʹ.” Bona Ditlhaloso Tsa Mafoko.
^ Seger., “psy·kheʹ.” Bona Ditlhaloso Tsa Mafoko.
