Efangele ya ga Mathaio 14:1-36
14 Ka nako eo, Herode yo e leng mmusi wa kgaolo, o ne a utlwa dilo tse Jesu a neng a di dira+
2 mme o ne a raya batlhanka ba gagwe a re: “Yono ke Johane Mokolobetsi. O tsositswe mo baswing, mme ke gone ka moo a dirang dikgakgamatso tseno.”+
3 Herode* o ne a ile a tshwara Johane mme a mmofa a bo a mo tsenya mo kgolegelong ka ntlha ya ga Herodiase. Herodiase o ne a kile a bo a nyetswe ke mogolowe Herode yo o bidiwang Filipo.+
4 Gonne Johane o ne a ntse a mo raya a re: “Ga o a tshwanela go ka bo o mo nyetse.”+
5 Le fa gone Herode a ne a batla go bolaya Johane, Herode o ne a boifa boidiidi jwa batho, ka gonne ba ne ba dumela gore Johane ke moporofeti.+
6 Mme fa go ne go ketekiwa letsatsi la botsalo jwa ga Herode,+ morwadia Herodiase o ne a bina mo moletlong oo mme a itumedisa Herode fela thata+
7 mo a neng a dira maikano a mo solofetsa gore o tla mo naya sepe fela se a se kopang.
8 Mme e re ka a ne a tlhotlhelediwa ke mmaagwe, o ne a re: “Nneye tlhogo ya ga Johane Mokolobetsi e le mo sejaneng.”+
9 Le fa gone Kgosi Herode a ne a hutsafetse, o ne a laela gore a e newe ka ntlha ya maikano a a neng a a dirile fa pele ga baeng ba gagwe.*
10 Ka jalo, o ne a laela gore Johane a kgaolwe tlhogo kwa kgolegelong.
11 Tlhogo ya gagwe e ne ya tlisiwa ka sejana e bo e newa mosetsana yoo, mme ene o ne a e isa kwa go mmaagwe.
12 Moragonyana barutwa ba gagwe ba ne ba tla mme ba tsaya setopo sa gagwe ba bo ba se fitlha; go tswa foo, ba ne ba tla mme ba bolelela Jesu.
13 Fa Jesu a utlwa seno, o ne a tswa koo ka mokoro a ya kwa lefelong le le kwa thoko gore a nne a le nosi. Le fa go ntse jalo, e rile batho ba bantsintsi ba lemoga seno, ba ne ba tswa mo metseng ba mo sala morago ka dinao.+
14 Fa a tla fa lotshitshing lwa lewatle, o ne a bona batho ba bantsintsi, mme o ne a ba tlhomogela pelo+ a bo a fodisa ba ba lwalang.+
15 E rile go nna maitseboa, barutwa ba gagwe ba ne ba ya kwa go ene mme ba re: “Lefelo leno le kwa thoko e bile go setse go le maitseboa; laela batho bano gore ba tsamaye mme ba ye kwa metsaneng e e gaufi ba ye go ithekela dijo.”+
16 Le fa go ntse jalo, Jesu o ne a ba raya a re: “Ga ba tlhoke go tsamaya; lona ba neyeng sengwe se ba ka se jang.”
17 Ba ne ba mo raya ba re: “Ga re na sepe fano ntle le dinkgwe tse tlhano le ditlhapi tse pedi fela.”
18 O ne a re: “Di tliseng kwano.”
19 Mme o ne a laela boidiidi joo jwa batho gore ba nne mo bojannyeng. Go tswa foo, o ne a tsaya dinkgwe tseo tse tlhano le ditlhapi tse pedi a bo a leba kwa legodimong a rapela,+ mme fa a sena go ngathoganya dinkgwe tseo, o ne a di naya barutwa, mme barutwa ba ne ba di naya batho.
20 Ka jalo, batho botlhe ba ne ba ja ba bo ba kgora, mme barutwa ba ne ba kokoanya manathwana a a setseng mme a tlala dimmanki di le 12.+
21 Go ne ga ja banna ba le 5 000 go sa balwe basadi le bana.+
22 Go tswa foo, ga a ka a senya nako mme o ne a laela barutwa ba gagwe gore ba palame mokoro mme ba tsamaele kwa pele ga gagwe ba ye kwa letlhakoreng le lengwe la lewatle, fa ene a ntse a phatlalatsa batho.+
23 Fa a sena go phatlalatsa batho bao, o ne a tlhatlogela kwa thabeng a le nosi a ya go rapela.+ Fa go nna maitseboa, o ne a sa ntse a le koo a le nosi.
24 Mo nakong eno, mokoro o ne o le bokgakala jwa dimetara di le makgolokgolo* go tswa fa lefatsheng, o phailakwa ke makhubu ka gonne o ne o lebagane le phefo.
25 Mme mo e ka nnang nako nngwe magareng ga 3:00 le 6:00 mo mosong* o ne a ya kwa go bone a tsamaya mo godimo ga metsi.
26 E rile barutwa ba mmona a tsamaya mo godimo ga metsi, ba ne ba boifa, ba re: “Ke sedimo!” Mme ba ne ba goela kwa godimo ba tshogile.
27 Ka yone nako eo, Jesu o ne a bua le bone a re: “Nnang pelokgale! Ke nna; lo se ka lwa tshoga.”+
28 Petere o ne a mo araba a re: “Morena, fa e le gore ke wena, ntaele gore ke tle kwa go wena ke tsamaya mo godimo ga metsi.”
29 O ne a re: “Tlaya!” Foo Petere o ne a tswa mo mokorong mme a tsamaya mo godimo ga metsi a ya kwa go Jesu.
30 Le fa go ntse jalo, e rile a leba phefo ya matsubutsubu, o ne a boifa. Mme fa a simolola go nwela, o ne a goa a re: “Morena, mpoloke!”
31 Ka yone nako eo, Jesu o ne a otlolola seatla sa gagwe a bo a mo tshwara mme a mo raya a re: “Wena yo o nang le tumelo e potlana, ke ka ntlha yang fa o ne o nna le dipelaelo?”+
32 Fa ba sena go palama mokoro, phefo ya matsubutsubu e ne ya kgaotsa.
33 Foo ba ba mo mokorong ba ne ba obama* fa pele ga gagwe, ba re: “Ruri o Morwa Modimo.”
34 Mme ba ne ba kgabaganya ba tla mo lefatsheng mo Genesareta.+
35 Fa batho ba lefelo leo ba mo lemoga, ba ne ba romela molaetsa mo mafelong a a gaufi wa gore Jesu o tlile, mme batho ba ne ba tlisa botlhe ba ba lwalang kwa go ene.
36 Ba ne ba mo kopa gore balwetse bao ba kgome fela karolo e e kwa tlase ya seaparo sa gagwe sa ka fa ntle,+ mme botlhe ba ba neng ba e kgoma ba ne ba fola.
