Efangele ya ga Mathaio 23:1-39

  • Lo se ka lwa etsa bakwadi le Bafarasai (1-12)

  • Ruri bakwadi le Bafarasai ba tla lebana le ditlamorago tse di botlhoko (13-36)

  • Jesu o hutsafalela Jerusalema (37-39)

23  Go tswa foo, Jesu o ne a bua le boidiidi jwa batho le barutwa ba gagwe, a re:  “Bakwadi le Bafarasai ba ipeile mo setulong sa ga Moshe.  Ka jalo, dilo tsotlhe tse ba di lo bolelelang, lo di dire e bile lo di ikobele, mme lo se ka lwa dira se ba se dirang, ka gonne ba a bua mme ga ba dire se ba se buang.+  Ba bofa merwalo e e bokete ba bo ba e pega mo magetleng a batho,+ mme bone ga ba batle le go e sutisa ka monwana wa bone.+  Dilo tsotlhe tse ba di dirang, ba di direla gore ba bonwe ke batho,+ ka gonne ba oketsa dikgetsinyana tse di nang le dikwalo tse ba di rwalang mo phatleng le mo letsogong la molema e le go itshireletsa,+ e bile ba dira gore makgabe a diaparo tsa bone a nne maleele.+  Ba rata go nna mo mannong a a kgethegileng fa ba le kwa dijong tsa maitseboa le mo ditulong tse di kwa pele mo disinagogeng+  e bile ba rata go dumedisiwa fa ba le kwa marekisetsong le gore batho ba ba bitse Rabi.*  Mme lona, lo se ka lwa bidiwa Rabi, ka gonne Moruti wa lona o mongwe fela,+ mme lona lotlhe lo bakaulengwe.  Mo godimo ga moo, lo se ka lwa bitsa ope rraalona mo lefatsheng, ka gonne Rraalona o mongwe fela,+ yo o kwa legodimong. 10  E bile lo se ka lwa bidiwa baeteledipele, ka gonne Moeteledipele wa lona o mongwe fela, e bong Keresete. 11  Mme yo mogolo thata mo go lona o tshwanetse go nna modiredi wa lona.+ 12  Ope fela yo o ikgodisang o tla kokobediwa,+ mme ope fela yo o ikokobetsang o tla godisiwa.+ 13  “Ruri lo tla lebana le ditlamorago tse di botlhoko lona bakwadi le Bafarasai, baitimokanyi! ka gonne lo tswalela batho dikgoro tsa Bogosi jwa magodimo; ka gonne lona ga lo tsene, mme ba ba reng ba a tsena ga lo ba letlelele go tsena.+ 14  *—— 15  “Ruri lo tla lebana le ditlamorago tse di botlhoko lona bakwadi le Bafarasai, baitimokanyi!+ ka gonne lo ralala lewatle le lefatshe gore lo sokolole motho a le mongwe, mme fa a sokologa lo dira gore a tshwanelwe ke Gehena* go feta lona. 16  “Ruri lo tla lebana le ditlamorago tse di botlhoko lona bagogi ba ba foufetseng,+ ba lo reng, ‘Fa motho a ikana ka tempele, ga go re sepe; mme fa motho a ikana ka gauta ya tempele, o ipofile.’+ 17  Dieleele le difofu ke lona! Tota ke eng se segolo, a ke gauta kgotsa ke tempele e e dirileng gore gauta e nne boitshepo? 18  Gape lwa re ‘Fa motho a ikana ka sebeso, ga go re sepe; mme fa motho a ikana ka mpho e e mo go sone, o ipofile.’ 19  Difofu ke lona! Tota ke eng se segolo, a ke mpho kgotsa ke sebeso se se dirang gore mpho e nne boitshepo? 20  Ka jalo, ope fela yo o ikanang ka sebeso o ikana ka sone le ka dilo tsotlhe tse di mo go sone; 21  le ope fela yo o ikanang ka tempele o ikana ka yone le ka Ene yo o nnang mo go yone;+ 22  le ope fela yo o ikanang ka legodimo o ikana ka setulo sa bogosi sa Modimo le ka Ene yo o ntseng mo go sone. 23  “Ruri lo tla lebana le ditlamorago tse di botlhoko lona bakwadi le Bafarasai, baitimokanyi! ka gonne lo ntsha moneelo* wa ditlhatshana tsa minte le dile le kumina,*+ mme lo itlhokomolositse dilo tse di botlhokwa thata tsa Molao, e leng tshiamiso+ le kutlwelobotlhoko+ le boikanyegi. Lo ne lo tshwanetse go ntsha moneelo, mme gone lo sa tlhokomologe dilo tse dingwe.+ 24  Bagogi ba ba foufetseng,+ ba lo ntshang* montsana+ lo bo lo metsa* kamela!+ 25  “Ruri lo tla lebana le ditlamorago tse di botlhoko lona bakwadi le Bafarasai, baitimokanyi! ka gonne lo tshwana le dijana tse di tlhatswitsweng ka fa ntle fela mme mo teng di le leswe.+ Mo teng ga lona go tletse bopelotshetlha+ le go tlhoka boikgapo.+ 26  Mofarasai ke wena yo o foufetseng, tlhatswa dijana ka fa teng pele, gore di tle di nne phepa le ka fa ntle. 27  “Ruri lo tla lebana le ditlamorago tse di botlhoko lona bakwadi le Bafarasai, baitimokanyi!+ ka gonne lo tshwana le mabitla+ a a tshasitsweng kalaka, a a lebegang a le mantle ka fa ntle mme mo teng a tletse marapo a batho ba ba suleng le leswe la mofuta mongwe le mongwe. 28  Ka tsela e e tshwanang, le lona ka fa ntle lo lebega lo siame mo bathong, mme mo teng ga lona go tletse boitimokanyi le bosula.+ 29  “Ruri lo tla lebana le ditlamorago tse di botlhoko lona bakwadi le Bafarasai, baitimokanyi!+ ka gonne lo aga mabitla a baporofeti e bile lo kgabisa mabitla a basiami,+ 30  mme lwa re, ‘Fa re ka bo re ne re tshela ka nako ya borraaronamogolo, re ka bo re sa dumalana le bone gore re bolaye baporofeti.’ 31  Jaanong lo itshupa gore lo bana ba batho ba ba neng ba bolaya baporofeti.+ 32  Ka jalo, feleletsang ditiro tse borraalonamogolo ba di simolotseng.* 33  “Dinoga ke lona, bana ba dinoga tse di botlhole,+ lo tla falola jang katlholo ya Gehena?*+ 34  Ka lebaka leno, ke romela baporofeti+ le batho ba ba botlhale le batlhatlheledi+ kwa go lona. Bangwe ba bone lo tla ba bolaya+ lo bo lo ba pega mo dikoteng, mme bangwe ba bone lo tla ba kgwathisa+ mo disinagogeng tsa lona lo bo lo ba bogisa+ mo metseng ka go latelana, 35  gore lo tle lo nne le molato wa madi a batho botlhe ba ba siameng ba ba bolailweng mo lefatsheng, go simolola ka madi a ga Abele+ yo o siameng go fitlha ka madi a ga Sekarea morwa Barakia, yo lo neng lwa mmolaela fa gare ga tempele le sebeso.+ 36  Ammaaruri ke a lo bolelela, dilo tseno tsotlhe di tla diragalela kokomana eno. 37  “Jerusalema wee, Jerusalema wee, wena yo o neng wa bolaya baporofeti wa bo wa kgobotletsa ba ba rometsweng kwa go wena ka maje,+ ke gantsi tota ke batla go phutha bana ba gago mmogo jaaka koko e namagadi e phuthela dikokwana tsa yone ka fa tlase ga diphuka tsa yone! Mme lo ne lwa gana.+ 38  Bonang, Modimo o tla tlogela tempele* eno.*+ 39  Gonne ke a lo bolelela, go tloga jaanong ga lo kitla lo tlhola lo mpona go fitlha lo re, ‘A go bakwe yo o tlang ka leina la ga Jehofa!’”*+

Dintlha Tse di Kwa Tlase

Kgotsa “Moruti.”
Seger., “karolo ya bolesome.” Bona Ditlhaloso Tsa Mafoko.
Minte, dile le kumina ke ditlhatshana le ditswaiso tse di neng di dirisiwa go natetsha dijo.
Kgotsa “tlhotlhang.”
Kgotsa “kodumetsa.”
Seger., “tlatsang selekanyo sa borraalonamogolo.”
Seger., “ntlo ya lona.”
Kgotsa gongwe “Lo tla tlogelelwa ntlo ya lona e le marope fela.”