Efangele ya ga Mathaio 20:1-34

  • Badiri ba mo tshimong ya morara le tuelo e e lekanang (1-16)

  • Jesu o bolelela pele loso lwa gagwe gape (17-19)

  • Ba kopa maemo mo Bogosing (20-28)

    • Jesu ke thekololo ya ba le bantsi (28)

  • Banna ba babedi ba ba foufetseng ba a fodisiwa (29-34)

20  “Gonne Bogosi jwa magodimo bo tshwana le mong wa ntlo yo o neng a tswa go sa le phakela a ya go thapa badiri ba ba tla berekang mo tshimong ya gagwe ya morara.*+  Fa a sena go dumalana le badiri bao gore o tla ba duela denario* ka letsatsi, o ne a ba romela kwa tshimong ya gagwe ya morara.  Fa a tswa gape mo e ka nnang ka 9:00 mo mosong,* o ne a bona ba bangwe ba eme fela kwa marekisetsong ba sa dire sepe;  mme o ne a ba raya a re, ‘Le lona yang kwa tshimong ya morara, mme ke tla lo naya tuelo e e lo tshwanetseng.’  Ka jalo, ba ne ba tsamaya. O ne a tswa gape mo e ka nnang ka 12:00 motshegare* le ka 3:00 motshegare* mme a dira se se tshwanang.  La bofelo, o ne a tswa mo e ka nnang ka 5:00 maitseboa* mme a fitlhela ba bangwe ba eme fela, mme a ba raya a re, ‘Ke ka ntlha yang fa lo ntse lo eme fano letsatsi lotlhe lo sa dire sepe?’  Ba ne ba mo araba ba re, ‘Ka gonne ga go na ope yo o re thapileng.’ A ba raya a re, ‘Le lona yang kwa tshimong ya me ya morara.’  “E rile go nna maitseboa, mong wa tshimo ya morara o ne a raya monna yo o okametseng badiri a re, ‘Bitsa badiri mme o ba duele,+ go simolola ka wa bofelo go fitlha ka wa ntlha.’  E rile banna ba ba thapilweng ka 5:00 maitseboa ba tla, mongwe le mongwe wa bone o ne a amogela denario.* 10  Ka jalo, fa ba ntlha ba tla, ba ne ba akanya gore ba tlile go amogela mo go oketsegileng, mme le bone ba ne ba duelwa denario.* 11  Fa ba e amogela, ba ne ba simolola go ngongoregela mong wa ntlo 12  mme ba re, ‘Banna bano ba bofelo ba dirile tiro ya ura e le nngwe fela; le fa go ntse jalo, o ba neile tuelo e e lekanang le ya rona ba re neng ra bereka ka natla letsatsi lotlhe re fisiwa ke letsatsi!’ 13  Le fa go ntse jalo, o ne a raya mongwe wa bone a re, ‘Mogaetsho, ga ke go direle phoso epe. O dumalane le nna ka denario,* gakere?+ 14  Tsaya se e leng sa gago o tsamaye. Ke batla go duela yono wa bofelo fela jaaka ke go duetse. 15  A ga ke a tshwanela go dira se ke se batlang ka madi a me? Kgotsa a o pelotshetlha* ka gonne ke le pelotshweu?’*+ 16  Ka tsela eno, ba bofelo e tla nna ba ntlha, mme ba ntlha e tla nna ba bofelo.”+ 17  Fa Jesu a ntse a le mo tseleng a ya Jerusalema, o ne a tseela barutwa ba gagwe ba ba 12 kwa thoko mme a ba raya a re:+ 18  “Bonang, re ya kwa Jerusalema, mme Morwa motho o tla tsenngwa mo diatleng tsa baperesiti ba bagolo le bakwadi. Ba tla mo atlholela loso+ 19  ba bo ba mo naya batho ba ditšhaba gore ba mo sotle, ba mo kgwathise le gore ba mmolaele mo koteng;+ mme o tla tsosiwa mo letsatsing la boraro.”+ 20  Go tswa foo, mmaagwe bomorwa Sebede+ o ne a mo atamela a na le bomorwawe, a khubama a bo a mo kopa sengwe.+ 21  Jesu o ne a mo raya a re: “O batla eng?” Ene a mo raya a re: “Ntsha taelo ya gore bomorwaake bano ba babedi ba nne le wena mo Bogosing jwa gago. Yo mongwe a nne ka fa seatleng sa gago sa moja mme yo mongwe ka fa go sa molema.”+ 22  Jesu o ne a ba araba a re: “Ga lo itse se lo se kopang. A lo ka nwa senwelo se ke tlogang ke se nwa?”+ Ba mo raya ba re: “Re ka se nwa.” 23  O ne a ba raya a re: “Eleruri lo tla nwa senwelo sa me,+ mme gone, ga se nna ke tlhophang gore ke mang a tla nnang ka fa seatleng sa me sa moja kgotsa sa molema, ka gonne Rre ke ene a dirang tshwetso ya gore ke mang yo o tla nnang mo mannong ao.”+ 24  Fa barutwa ba bangwe ba ba lesome ba utlwa ka seno, ba ne ba galefela barutwa bao ba babedi.+ 25  Mme Jesu o ne a ba biletsa kwa go ene a bo a re: “Lo a itse gore babusi ba ditšhaba ba busa batho ka tsela e ba e batlang le balaodi ba dirisa maemo a bone go gatelela batho.+ 26  Mme lona ga lo a tshwanela go dira jalo.+ Mongwe le mongwe yo o batlang go nna mogolo mo go lona, o tshwanetse go nna modiredi wa lona,+ 27  e bile mongwe le mongwe yo o batlang go nna wa ntlha mo go lona, o tshwanetse go nna motlhanka wa lona.+ 28  Fela jaaka Morwa motho a ne a sa tla go direlwa mme o ne a tletse go direla+ le go ntsha botshelo* jwa gagwe go rekolola ba le bantsi.”+ 29  Fa ba tswa mo Jeriko, batho ba bantsintsi ba ne ba mo sala morago. 30  Mme banna ba babedi ba ba foufetseng ba ba neng ba ntse go bapa le tsela, ba ne ba utlwa gore Jesu o feta foo mme ba goa ba re: “Morena, re utlwele botlhoko, Morwa Dafide!”+ 31  Le fa go ntse jalo, batho bao ba bantsintsi ba ne ba ba kgalemela, ba ba raya ba re ba didimale; mme banna bao ba ne ba goela kwa godimo le go feta, ba re: “Morena, re utlwele botlhoko, Morwa Dafide!” 32  Ka jalo, Jesu o ne a ema, a ba bitsa mme a re: “Lo batla gore ke lo direle eng?” 33  Ba ne ba mo raya ba re: “Morena, bula matlho a rona.” 34  E re ka Jesu a ne a ba tlhomogela pelo, o ne a tshwara matlho a bone,+ mme ka yone nako eo ba kgona go bona, mme ba ne ba mo sala morago.

Dintlha Tse di Kwa Tlase

Kgotsa “diterebe; moretlwa.”
Seger., “ka ura ya boraro.”
Seger., “ka ura ya borataro.”
Seger., “ka ura ya borobongwe.”
Seger., “ka ura ya bo11.”
Seger., “bosula; boikepo.”
Kgotsa “molemo.”
Seger., “psy·kheʹ.” Bona Ditlhaloso Tsa Mafoko.