Nu Ditulis ku Lukas 21:1-38
21 Waktu Isa diuk nyanghareup ka kotak-kotak sumbangan, anjeunna merhatikeun jalma-jalma beunghar ngasupkeun sumbanganana.+
2 Katingali ogé aya hiji randa miskin nu ngasupkeun dua duit kencring nu nilaina leutik pisan.*+
3 Anjeunna ngomong, ”Tah, sabenerna nu diasupkeun ku randa miskin ieu leuwih loba tibatan nu séjén.+
4 Jalma-jalma nyumbang téh da boga duit leuwih. Ari éta randa mah, najan miskin, nyumbangkeun sakabéh pangabogana, padahal éta téh keur nganapkahan diri.”+
5 Ka dieunakeun, waktu sababaraha jalma muji-muji bait nu dihias ku batu-batu nu aréndah jeung barang-barang nu dibaktikeun ka Allah,+
6 anjeunna ngomong, ”Engké, bakal aya mangsana ieu kabéh nu ditingali ku maranéh bakal dirugrugkeun, moal aya hiji-hiji acan batu nu nyusun di luhureun batu séjén.”+
7 Tuluy maranéhna nanya, ”Guru, iraha éta kabéh bakal kajadian, sarta naon tandana éta téréh kajadian?”+
8 Ceuk anjeunna, ”Kadé, maranéh ulah beunang kabobodo,+ sabab loba jalma bakal datang maké ngaran urang, seug ngaku-ngaku, ’Urang jalmana,’ sarta ngomong, ’Waktuna geus téréh.’ Nu kitu ulah dituturkeun.+
9 Salian ti éta, lamun maranéh ngadéngé dur-derna perang jeung huru-hara,* ulah sieun. Ieu kabéh kudu kajadian heula, tapi ahir éta moal langsung datang.”+
10 Ceuk Isa, ”Bangsa-bangsa bakal silih perangan,+ karajaan-karajaan ogé silih perangan.+
11 Bakal aya lini gedé, sarta di mana-mana bakal aya kalaparan jeung wabah panyakit.+ Jalma-jalma bakal ningali kajadian-kajadian nu pikasieuneun jeung tanda-tanda nu luar biasa di langit.
12 ”Tapi saacan éta kabéh kajadian, maranéh bakal ditéwak jeung dikaniaya.+ Maranéh bakal dibawa ka tempat ibadah jeung ka panjara. Maranéh gé bakal dibawa ka hareupeun raja-raja jeung gubernur-gubernur lantaran jadi murid urang.+
13 Éta bakal jadi kasempetan keur ngajelaskeun kapercayaan maranéh.
14 Tékadkeun dina haté, ulah nyiapkeun ti saméméhna naon nu rék diucapkeun pikeun ngabéla diri,+
15 sabab maranéh ku urang bakal dibéré kabijaksanaan sangkan nyaho naon nu kudu diucapkeun. Sanajan ngagabung gé, lawan-lawan maranéh moal sanggup ngalawan atawa ngabantah.+
16 Salian ti éta, maranéh bakal dihianatan,* malahan ku kolot, adi lanceuk, baraya, jeung sobat maranéh. Sababaraha di antara maranéh gé bakal dipaéhan.+
17 Maranéh bakal dipikangéwa ku kabéh jalma lantaran nuturkeun urang.+
18 Najan kitu, buuk maranéh salambar gé moal aya nu leungit.+
19 Lamun tabah, maranéh bakal tetep hirup.+
20 ”Tapi waktu maranéh ningali Yérusalém dikepung ku pasukan,+ éta tandana Yérusalém geus téréh diancurkeun.+
21 Saha waé nu aya di Yudéa kudu kabur ka pagunungan,+ sarta nu aya di jero kota kudu kalaluar ti kota, ari nu aya di pasisian ulah asup ka kota,
22 sabab éta téh waktuna Allah ngahukum* jalma-jalma sangkan kabéh nu ditulis dina Kitab Suci laksana.
23 Cilaka awéwé nu keur ngandung jeung nu keur nyusuan orokna dina mangsa éta!+ Ieu nagri bakal ngalaman kasusah nu kacida parahna, ieu bangsa bakal dihukum.
24 Aya nu bakal dipaéhan ku pedang, aya ogé nu bakal ditawan di nagri-nagri séjén.+ Yérusalém bakal ditincakan ku bangsa-bangsa* nepi ka waktu nu ditetepkeun keur éta bangsa-bangsa* béak.+
25 ”Salian ti éta, bakal aya tanda-tanda dina panonpoé, bulan, jeung béntang-béntang.+ Bangsa-bangsa di bumi bakal nalangsa jeung teu nyaho kudu kumaha lantaran laut ngamuk tingjelegur.
26 Jalma-jalma bakal kapiuhan* bakating ku sieun ngabayangkeun naon nu bakal kajadian di bumi, sabab kawasa-kawasa di langit bakal oyag.
27 Tuluy, maranéhna bakal nempo Anak manusa+ datang dina méga* ku kakawasaan jeung kamulyaan nu hébat.+
28 Tapi lamun ieu kabéh geus mimiti kajadian, ajegkeun awak, tanggahkeun sirah, sabab maranéh geus téréh dibébaskeun.”
29 Geus kitu, Isa nyaritakeun hiji ibarat, ”Perhatikeun tangkal ara jeung tatangkalan séjénna.+
30 Lamun geus bijil daun-daun ngora, maranéh nyaho yén éta téh tandana geus téréh usum panas.
31 Kitu ogé, lamun maranéh ningali hal-hal ieu kajadian, éta tandana Pamaréntahan Allah geus deukeut.
32 Sing percaya, jalma-jalma dina jaman ieu* moal musna nepi ka ieu kabéh kajadian.+
33 Langit jeung bumi bakal euweuh, tapi kekecapan urang bakal aya salilana.+
34 ”Jaga diri sing ati-ati. Maranéh ulah nepi ka beuki teuing kana* dahar jeung nginum,+ sarta ulah mikiran teuing pangabutuh hirup,+ bisi engké éta poé ujug-ujug datang
35 ngajiret maranéh.+ Éta poé téh bakal narajang ka kabéh jalma nu aya di sakuliah bumi.
36 Jadi, maranéh kudu tetep waspada+ bari terus husu ngadoa,+ sangkan maranéh bisa salamet tina kabéh kajadian nu bakal laksana sarta bisa nangtung hareupeun Anak manusa.”+
37 Isa ngajar di bait ti beurang, ari peutingna indit ka Gunung Zaitun jeung mondok di dinya.
38 Kabéh jalma daratang ka bait isuk-isuk pisan sabab hayang ngadéngékeun anjeunna.
Catetan Tambihan
^ Atawa ”jeung kaayaan kacow”.
^ Atawa ”diserahkeun ka pangadilan”.
^ Atawa ”ngabales”.
^ Atawa ”bangsa-bangsa nu teu kenal ka Allah”.
^ Atawa ”bangsa-bangsa nu teu kenal ka Allah”.
^ Atawa ”pingsan; kapaéhan”.
^ Atawa ”awan”.
^ Atawa ”Sing percaya, ieu génerasi”.
^ Atawa ”Haté maranéh ulah nepi ka kabeungbeurat ku”.
