Psalm 69:1-36
Gi a fesiman fu den pokuman. Gi den „Leilibromki”.*+ Wan psalm fu David.
69 Mi Gado, frulusu mi, bika a watra sungu mi èn mi de fu dede.+
2 Mi saka go dipi na ini tokotoko pe mi no abi nowan presi fu tanapu.+Mi kon de na ini dipi watra.Wan liba di e lon esi-esi, wasi mi gowe.+
3 Mi bari so furu, taki mi kon weri.+Mi no abi sten moro.Mi wakti mi Gado so langa, taki mi ai kon weri.+
4 Someni sma de di no lobi mi kwetikweti, aladi mi no du den noti. Den sma disi kon furu moro leki den wiwiri na mi ede.+Den wan di wani tapu mi mofo, kon furu srefisrefi. Den na mi feanti, aladi mi no du den noti.+Aladi mi no fufuru noti, toku mi ben abi fu gi den san de fu mi.
5 Gado, yu srefi sabi den dondon sani di mi du.Den fowtu fu mi no kibri gi yu.+
6 Yehovah di e tiri den legre èn di de a Moro Hei Masra,+Mi e begi yu, no meki den sma di e wakti yu, kisi syen fu mi ede.+Gado fu Israel,+Den sma di e kon suku yepi na yu, no meki den fesi fadon fu mi ede.+
7 Na fu yu ede, meki mi teki a kosikosi fu sma.+Mi fesi fadon.+
8 Mi eigi brada no sabi mi moro.+Mi eigi mama pikin kon si mi leki wan trakondre sma.+
9 A lobi di mi abi gi yu oso, de leki wan faya di e bron na ini mi.+A srefi fasi fa sma e kosi yu, na so den e kosi mi.+
10 Mi ben e krei èn mi ben tan sondro fu nyan.+Ma srefi dati den teki fu spotu mi.+
11 Di mi weri krosi fu sori taki mi e sari,Sma bigin koti odo gi mi.+
12 Den sma di ben e sidon na den portu bigin taki mi tori.+Sopiman ben e meki singi fu mi.+
13 Ma mi ben e begi yu, Yehovah.+Mi Gado, na wan ten di yu feni bun, mi ben e begi yu.+Yu e sori sma bun-ati pasa marki. Sobun, piki mi èn sori taki yu na mi frulusuman trutru.+
14 Puru mi na ini a tokotoko pe mi de na ini, so taki mi no saka go moro dipi.+Mi e begi yu fu frulusu mi fu den wan di no lobi mi kwetikweti.+ Puru mi na ini a dipi watra.+
15 No meki a watra fu a liba di e lon esi-esi, wasi mi gowe.+No meki mi saka go na ini a dipi.No meki a peti* tapu mi.+
16 Ke Yehovah, piki mi, fu di yu lobi fu sori sma bun-ati.+Yu abi furu sari-ati. Sobun, mi e begi yu, poti prakseri na mi.+
17 No kibri yu fesi gi mi, a futuboi fu yu.+Piki mi esi-esi, bika mi de na nowtu.+
18 Kon krosibei fu mi èn frulusu mi.+Puru mi na a anu fu mi feanti.+
19 Yu srefi kon sabi fa sma kosi mi, fa den gi mi syen èn fa den meki mi fesi fadon.+Yu srefi si suma na den sma di e suku fu du mi ogri.+
20 Mi ati broko, fu di sma kosi mi. A soro dati no man dresi.+Mi ben e howpu taki wan sma ben o sari mi, ma nowan sma no ben de.+Mi ben e howpu taki sma ben o kon trowstu mi, ma mi no ben man feni nowan sma.+
21 Den gi mi takru wiwiri fu nyan.+Di watra kiri mi, den suku fu gi mi asin fu dringi.+
22 Meki den fesa fu den tron wan trapu gi den+Èn meki ala den gudu fu den, tron wan trapu gi den tu.+
23 Meki den ai fu den kon dungru, so taki den no man si.+Meki den bowtu* fu den lasi krakti ala ten baka.+
24 Krutu den.+Meki den firi a bigi atibron fu yu.+
25 Meki a kampu fu den, di abi wan ston skotu na en lontu, tron wan brokopresi.+No meki nowan sma tan na ini den tenti fu den.+
26 Den hari go na baka den sma di yusrefi ben naki trowe.+Den e tan taki fu a pen di sma abi fu di yu gi den mankeri.
27 Meki den sondu fu den kon moro furu.+No si den leki reti-ati sma.+
28 Figi a nen fu den puru na ini a buku pe a nen fu den libiwan skrifi.+No skrifi a nen fu den pe a nen fu den reti-ati sma skrifi.+
29 Mi e pina èn mi ati e sari.+Ke Gado, frulusu mi, so taki mi kan kisi kibri.+
30 Mi o singi fu prèise a nen fu Gado+Èn mi o taki en tangi fu gi en glori.+
31 A o gi Yehovah moro prisiri tu leki wan mankaw,+Iya, leki wan yongu mankaw di kon bigi èn di abi tutu kaba.+
32 Den safri-ati sma o si en èn den o breiti.+Un alamala di wani dini Gado, un teki deki-ati tu.+
33 Yehovah e arki den pôti sma+Èn a no o frigiti den sma fu en di de na strafu.+
34 Meki hemel nanga grontapu prèise en.+Meki a se nanga ala sani di e libi na ini, du dati tu.+
35 Gado srefi o frulusu Sion+Èn a o bow den foto fu Yuda.+Dan a pipel fu en o go libi drape èn a kondre o kon de fu den.+
36 Den bakapikin fu den futuboi fu en o kisi a kondre dati leki gudu+Èn den wan di lobi a nen fu en, na den o tan libi drape.+
Futuwortu
^ Soleki fa a sori, dan disi abi fu du nanga a grebi.
^ Hebrewtongo: „Meki den dyonku beifi doronomo.”
