Psalm 104:1-35
104 Mi ati, yu musu prèise Yehovah.+Yehovah mi Gado, yu bigi srefisrefi.+Glori nanga grani de leki krosi na yu skin.+
2 Yu e domru yusrefi na ini leti, neleki a de wan krosi na yu skin.+Yu e bradi hemel leki wan tentikrosi.+
3 Yu na a sma di bow den sodrokamra fu yu te na loktusei fu den wolku.+Yu e meki den wolku kon tron yu asiwagi+Èn yu e waka na tapu den frei fu a winti.+
4 Yu meki den engel fu yu tron yeye di abi furu krakti,+Yu meki den dinari fu yu de leki wan faya di e bron sani.+
5 Yu seti grontapu na tapu wan steifi fondamenti.+Fu ala ten, iya, fu têgo nowan sma o man seki en.+
6 Gado, yu tapu grontapu nanga bun furu watra, neleki yu tapu en nanga wan krosi.+Watra ben tapu den bergi.+
7 Di yu bari den, den lowe.+Di den yere a dondru babari fu yu, den lon gowe fu di den bruya.
8 Bergi bigin opo kon na tapu+Èn den lagipresi saka gowe moro dipi.Na den presi di yu ben seti gi den.
9 Na yu ben taki te o fara a watra musu doro.+Na so fasi den no ben o sungu grontapu ete wan tron.+
10 Na yu e meki liba lon na den lagipresi.+Doronomo a watra fu den liba disi e lon na mindri den bergi.
11 Den e meki taki ala den busimeti abi watra fu dringi.+Ala ten baka den sabanaburiki+ e go dringi te watra e kiri den.
12 Den fowru e meki nesi na ini den bon na sei a watra.+Den e tan froiti komoto na mindri den wiwiri fu den bon.+
13 Komoto na den sodrokamra fu yu, yu e nati den bergi nanga watra.+Grontapu lai nanga den sani di yu meki.+
14 Yu e meki grun grasi gro gi den meti,+Èn sosrefi tra sani di libisma man gebroiki.+Yu e meki nyanyan gro na grontapu.+
15 Yu e gi libisma win, so taki den ati kan prisiri,+Yu e gi den oli sosrefi fu meki den fesi brenki,+Èn yu e gi libisma brede fu den nyan den bere furu.+
16 Ala ten den bon fu Yehovah e kisi nofo watra.Iya, den sedrebon fu Libanon di a prani e kisi nofo watra.+
17 Na drape den fowru e meki nesi.+Na oso fu den nengrekopu* na den yaneifer-bon.+
18 Den hei bergi+ na fu den bergikrabita.+Den bigi ston na a kibripe fu den bergi-konikoni.+
19 Yu meki a munkenki fu marki a ten.+A son sabi heri bun o ten a musu dongo.+
20 Na yu meki dungru fu neti kan de.+Na ini dungru ala den busimeti e waka lontu.
21 Den tranga yongu lew e bari, fu di den e onti tra meti+Èn fu di den e suku a nyanyan di Gado gi den.+
22 Te son e opo, den e gowe go kibri baka.+Den e go didon na a kibripe fu den.
23 Libisma e gowe go du a wroko fu den baka+Èn den e wroko teleki neti tapu.+
24 Yehovah, den sani di yu meki furu srefisrefi.+Yu meki den alamala na wan tumusi koni fasi.+Grontapu lai nanga den sani di yu meki.+
25 A se bigi èn bradi srefisrefi.+Bun furu meti de di e swen lontu na ini+Èn a lai libisani, pikinwan nanga bigiwan.+
26 Na drape den sipi e waka.+Na yu meki Lefiatan*+ fu prei na ini.+
27 Ala den libisani disi e wakti yu+Fu yu gi den nyanyan na a reti ten.+
28 Den sani di yu e gi den, na dati den e piki fu a gron fu nyan.+Yu e opo yu anu èn yu e gi den soso bun sani.+
29 Efu yu kibri yu fesi, den e bruya.+Efu yu puru a libikrakti* fu den, den e dede+Èn den e tron doti baka.+
30 Efu yu seni a krakti* fu yu, dan den e kon de.+Yu e meki nyun libi kon de na grontapu.
31 A glori fu Yehovah o tan fu têgo.+Yehovah o prisiri nanga den sani di a meki.+
32 Na luku a e luku grontapu nomo, dan a grontapu e beifi kaba.+Na fasi a e fasi den bergi nomo, dan den e puru smoko.+
33 Mi heri libi langa mi o singi gi Yehovah.+Solanga mi de na libi, mi o singi prèisesingi gi a Gado fu mi.+
34 Te mi e singi gi Gado, dan meki dati prisiri en.+Mi fu mi sei, o prisiri nanga Yehovah.+
35 Den sondari o dede gowe na grontapu.+Den ogri sma no o de moro.+Mi ati, yu musu prèise Yehovah. Prèise Yah, un pipel!+
Futuwortu
^ Bakratongo: „ooievaar.”
^ A kan taki disi abi fu du nanga wan bigi kaiman noso wan tra bigi meti fu se.
^ Noso: „yeye.”
^ Hebrewtongo: „yeye.”
