Psalm 89:1-52
Wan maskil* fu Etan, wan Esrasma.+
89 Fu ala ten mi wani singi fu a fasi fa Yehovah e sori sma bun-ati.+Fu têgo mi o opo mi mofo fu fruteri sma taki yu e du ala ten san yu pramisi.+
2 Mi taki: „Bun-ati de leki wan tranga oso di e tan fu ala ten.+Srefi na ini hemel yu e sori taki yu e du ala ten san yu pramisi.”+
3 Gado taki: „Mi meki wan frubontu nanga David, a futuboi di mi teki.+Mi sweri gi en:
4 ’Mi o meki den bakapikin fu yu tan fu ala ten+Èn mi o meki a kownukondre+ fu yu tan fu têgo.’” Sela.
5 Yehovah, hemel srefi o prèise yu gi den bigi sani di yu du.+Iya, den santawan fu yu di kon makandra o prèise yu, fu di yu e du ala ten san yu pramisi.
6 Suma de na hemel di sma kan teki gersi nanga Yehovah?+Sortuwan fu den manpikin fu Gado de leki Yehovah?+
7 Ala den santawan di de krosibei fu Gado musu abi lespeki gi en.+Gado bigi èn a e meki taki ala den wan di de lontu en, kisi bigi lespeki gi en.+
8 Yehovah Gado di e tiri den legre,+Suma tranga leki yu, Yah?+Ala ten yu e du san yu pramisi.+
9 Na yu e basi a krasi se.+Te den skwala fu en hei, dan na yu e hori den.+
10 Yu meki Rahab*+ lasi a strei. A kon de neleki wan sma di den kiri na ini wan feti.+Nanga a krakti fu yu, yu panya yu feanti go na ala sei.+
11 Hemel na fu yu.+ Grontapu na fu yu sosrefi.+Na yu meki+ a gron nanga ala den sani di e gro na tapu.+
12 Na yu meki noordsei nanga zuidsei.+Tabor-bergi+ nanga Hermon-bergi+ e bari fu prisiri èn den e prèise yu nen.+
13 Yu abi bigi makti.+Yu tranga srefisrefi.+Yu opo yu reti-anu hei.+
14 A fondamenti fu yu kownusturu na retidu nanga a reti fasi fa yu e koti krutu.+Ala ten yu e sori sma bun-ati èn ala ten yu e du san yu pramisi.+
15 Koloku fu den sma di sabi san a wani taki fu bari fu prisiri.+Yehovah, den e tan waka na ini a leti di e skèin komoto fu yu fesi.+
16 A nen fu yu e meki den firi prisiri heri dei.+Na a retidu fu yu e meki den kon moro hei.+
17 Na yu e meki taki den abi bigi krakti.+Na a bunfasi fu yu e meki taki wi tranga* srefisrefi.+
18 Na Yehovah gi wi a skelt fu wi.+Iya, na a Santawan fu Israel gi wi a kownu fu wi.+
19 Na a ten dati yu ben taki na ini wan fisyun nanga den sma di tai hori na yu.+Yu ben taki:„Mi yepi wan tranga man.+Mi teki wan sma na mindri a pipel èn mi poti en moro hei leki den.+
20 Mi feni mi futuboi David.+Mi salfu en nanga mi santa oli.+
21 Misrefi o de nanga en èn mi o horibaka gi en,+Iya, misrefi o gi en krakti.+
22 Nowan feanti o man kwinsi en+Èn nowan ogri sma o man pina en.+
23 Leti na en fesi mi broko den feanti fu en pisipisi.+Den wan di no lobi en kwetikweti, mi ben naki doronomo.+
24 Ala ten mi o du san mi pramisi en èn mi o tan sori en bun-ati.+Na mi nen o meki taki a kon tranga srefisrefi.+
25 Mi poti en anu na tapu a se+Èn en reti-anu na tapu den liba.+
26 Ensrefi e bari taigi mi: ’Yu na mi Tata,+Mi Gado+ èn a Stonbergi pe mi e feni frulusu.’+
27 Mi o meki a tron a fosi pikin fu mi.+A o de a moro heiwan fu ala den kownu fu grontapu.+
28 Fu ala ten mi o sori en bun-ati.+Noiti a frubontu di mi meki nanga en o broko.+
29 Mi o meki den bakapikin fu en tan fu ala ten+Èn solanga hemel de, a kownukondre fu en o de tu.+
30 Efu den manpikin fu en no hori a wèt fu mi+Èn efu den no gi yesi na den krutubosroiti fu mi,+
31 Iya, efu den gowe libi den markitiki fu miÈn den no hori den komando fu mi,
32 Dan mi o poti prakseri na den sondu fu den èn mi o fon den nanga wan tiki.+Mi o wipi den gi den fowtu fu den.+
33 Ma noiti mi o tapu fu sori en bun-ati.+Ala ten mi o du san mi pramisi en.+
34 Mi no o broko a frubontu fu mi.+San mi taki nanga mi mofobuba, na dati mi o du.+
35 Leki Santawan mi sweri,+Taki mi no o lei gi David.+
36 Den bakapikin fu en o tiri fu ala ten.+A kownusturu fu en o tan na mi fesi, neleki fa a son o tan.+
37 A kownukondre fu en o tan fu ala ten, leki a mun,Iya, leki wan kotoigi di de na loktu ala ten.” Sela.
38 Ma yu fu yu sei, gowe libi a salfuwan fu yu èn yu tan si en leki wan soso sani.+Yu ati bron srefisrefi nanga yu salfuwan.+
39 Yu no luku a frubontu moro di yu meki nanga yu futuboi.Yu trowe en kownu-ati na gron, so taki a no warti noti moro.+
40 Yu broko ala den ston koi fu en puru.+Yu broko den fortresi fu en te na gron.+
41 Ala den sma di e waka pasa na tapu a pasi, fufuru den sani fu en tyari gowe.+Den birtisma fu en teki en leki spotupopki.+
42 Yu meki taki den sma di ben e gens en, kon tranga moro en.+Yu meki taki den feanti fu en firi prisiri.+
43 San moro ogri srefi, na taki yu si a feti-owru fu en leki yu feanti.+Yu no meki a wini a feti.+
44 Yu meki a lasi a glori fu en+Èn yu trowe a kownusturu fu en na gron.+
45 Yu meki a kon owru esi-esi.Yu gi en bigi syen.+ Sela.
46 Yehovah, o langa yu o kibri gi wi? Na fu ala ten?+Yu o meki yu ati tan bron neleki wan faya?+
47 Memre o langa a libiten fu mi de.+Na fu soso yu meki ala libisma?+
48 Suma de na grontapu di no o dede noiti?+Wan sma de di kan frulusu ensrefi* puru na a anu fu Grebi?*+ Sela.
49 Yehovah, fu san ede yu no e sori wi bun-ati moro,Soleki fa yu ben sweri gi David, di yu pramisi en fu du san yu taki?+
50 Yehovah, memre fa sma teki yu futuboi leki spotupopki.+Iya, na soso syen mi e firi,* fu di someni sma e teki mi leki spotupopki.+
51 Yehovah, memre fa den feanti fu yu ben spotu yu futuboi+Èn fa den meki spotu nanga ala den sani di a salfuwan fu yu ben du.+
52 Blesi fu Yehovah fu ala ten. Amen, iya, Amen.+
Futuwortu
^ Luku „Moro sani”, nr. 8.
^ Hebrew wortu: syeol. Luku „Moro sani”, nr. 10.
^ Hebrewtongo: „mi e tyari a syen fu furu sma na tapu mi borsu.” Na ini Hebrewtongo a wortu „borsu” abi fu du nanga wan sortu saka di sma ben e meki na a borsusei fu den krosi.
