Psalm 37:1-40
Wan psalm fu David.
א [Alef]
37 No ati bron te sma e du ogri.+No dyarusu na tapu den wan di no e du san reti,+
2 Bika neleki grasi den o drei gowe,+Iya, neleki grun grasi den o lasi gowe.+
ב [Bet]
3 Frutrow tapu Yehovah èn du bun.+Tan libi na grontapu èn du sani gi trawan nanga wan krin ati.+
4 Prisiri pasa marki nanga Yehovah,+Dan a o gi yu san yu ati wani.+
ג [Gimel]
5 Meki Yehovah tiri yu libi,+Frutrow tapu en,+ dan ensrefi o yepi yu.+
6 A o meki a reti fasi fu yu skèin neleki leti di e skèin na deiten+Èn a o meki a retidu fu yu skèin, neleki fa son e skèin na mindridei.+
ד [Dalet]
7 Tan pî te yu de na fesi Yehovah+Èn tan wakti en nanga yu heri ati.+No nyan yu niri te trawan e du sani fu meki a libi fu den waka bun,+Iya, te yu e si fa sma e waka e du den takru sani di den abi na prakseri.+
ה [He]
8 No kisi atibron moro èn no rigeri moro.+No ati bron so te, taki yu go du ogri,+
9 Bika Gado o kiri den ogri sma,+Ma den sma di e howpu na tapu Yehovah, na den o kisi grontapu.+
ו [Waw]
10 Ete wan syatu pisi ten èn den ogriwan no sa de moro.+Yu o luku pe den ben de fosi, ma den no sa de moro.+
11 Ma den safri-ati sma o kisi grontapu+Èn den o prisiri srefisrefi, fu di freide o de pasa marki.+
ז [Sayin]
12 Na ogriwan e seti sani fu du ogri nanga a reti-ati wan+Èn te a e si a trawan, a e kaw tifi, fu di en ati e bron.+
13 Yehovah o lafu a sma dati,+Bika a sabi taki a sma dati o dede wan dei.+
ח [Ket]
14 Den ogriwan hari den feti-owru èn den span den bo,+Fu meki den pôtiwan di e pina fadon,+Iya, fu kiri den wan di e waka a reti pasi.+
15 Ma den eigi feti-owru o boro go na ini den ati.+Den eigi bo o broko.+
ט [Tet]
16 A moro betre te wan reti-ati sma abi pikinso sani nomo,+Leki te wan ogri sma abi bun furu sani.+
17 Den anu fu den ogri sma o broko,+Ma Yehovah o horibaka gi den reti-ati sma.+
י [Yod]
18 Yehovah sabi fa den reti-ati sma e libi+Èn noiti den gudu di den kisi, o lasi gowe.+
19 Den no o kisi syen te problema miti den+Èn den o abi nofo fu nyan te angriten de.+
כ [Kaf]
20 Ma den ogriwan o dede gowe+Èn den feanti fu Yehovah o drei gowe leki moi weigron.Den o kon na wan kaba.+ Na ini smoko den o kon na wan kaba.+
ל [Lamed]
21 Den ogriwan lobi leni sondro fu pai baka.+Ma den reti-ati sma e du bun gi trawan èn den lobi fu gi sma sani.+
22 Den sma di Gado e blesi, o kisi grontapu.+Ma a o kiri den wan di a fluku.+
מ [Mem]
23 Na Yehovah e sori wan man fa a musu waka+Èn A e prisiri nanga a pasi di a man disi teki.+
24 Awinsi a sma fadon, toku a no o tan didon leki na fringi sma fringi en na gron,+Bika Yehovah e hori en anu fu a opo tanapu.+
נ [Nun]
25 Mi ben de wan yongu man, ma now mi kon owru.+Toku mi no si noiti taki Gado libi wan reti-ati sma en wawan.+Noiti mi no si taki den pikin fu en e waka e suku nyanyan.+
26 Ala ten a reti-ati sma e du bun gi trawan èn a e leni den iniwan sani di den abi fanowdu.+Dati meki den pikin fu en o kisi blesi.+
ס [Samek]
27 No du ogri, ma du san bun.+Na so yu kan tan libi na grontapu fu ala ten.+
28 Yehovah na wan sma di lobi retidu.+Dati meki a no o gowe libi den sma di e tai hori na en.+
ע [Ayin]A o kibri den fu ala ten.+Ma a o kiri den pikin fu den ogri sma.+
29 Na den reti-ati sma o kisi grontapu+Èn fu têgo den o tan libi drape.+
פ [Pe]
30 Na a mofo fu reti-ati sma e taki koni sani nanga wan safri sten+Èn na en tongo e taki sani di reti.+
31 A wèt fu a Gado fu en de na ini en ati.+Te a e waka, a no o grati fadon.+
צ [Tsade]
32 Den ogri sma e seti luru gi den reti-ati sma+Èn den e suku fu kiri den.+
33 Ma Yehovah no o libi den gi den ogri sma+Èn a no o strafu den te den kon na fesi krutu.+
ק [Kof]
34 Howpu na tapu Yehovah èn tan waka a pasi fu en,+Dan a o gi yu a grani fu libi na grontapu.+Te a kiri den ogriwan, yu o si dati.+
ר [Resj]
35 Mi si fa den ogri-ati sma e rigeri+Èn fa den e bradi densrefi leki wan bigi bon di tanapu na en eigi gron.+
36 Toku den dede gowe te fu kaba èn den no ben de moro.+Mi suku den, ma mi no feni den.+
ש [Syin]
37 Hori den sma na ai di e du bun èn luku san den krin-ati sma e du,+Bika na ini a ten di e kon, sani o waka bun gi den sma dati.+
38 Ma den sma di e du sondu, o kisi pori.+Te fu kaba den ogriwan o kisi pori.+
ת [Taw]
39 Na Yehovah e frulusu den reti-ati sma.+A de a fortresi fu den, te den de na ini banawtu.+
40 Yehovah o yepi den èn a o sorgu taki a frulusu den.+A o frulusu den fu den ogriwan èn a o kibri den,+Bika na en den lon go suku kibri.+
