Ukom 16:1-31
16 Aminsan et linmay Samson ed Gaza tan akanengneng diman na sakey a paabang a bii, tan sikatoy linmoob ed abung to.
2 Oniay nipaamta ed saray Gazita: “Wadiay Samson.” Kanian sikatoy pinaliberan da tan tinalaranan dan sanlabi diad puerta na syudad. Mareereen ira a sanlabi, ya inkuan da: “Kaliwawa na kabuasan, sikatoy pateyen tayo.”
3 Balet nansiansiad dukolan si Samson ya anggad pegley-labi. Insan sikatoy binmangon ed pegley-labi tan inegnaan to iray puerta na syudad tan saray duaran poste ed gilig tan binagot to iratan a kaibay balewet. Sinakbat to iratan tan inawit to ya anggad toktok na palandey a walad arap na Hebron.
4 Kayari na satan et sikatoy inmibeg ed sakey a bii diad Lawak* na Sorek, a say ngaran to et Delila.+
5 Kanian saray manuley na saray Filisteo et linmad samay bii tan inkuan da: “Sikatoy palikdom*+ tan amtaen mo no antoy panlalapuan na baleg a biskeg to tan no panon min nadaeg tan nabalor pian sikatoy napatulok mi. No gawaen mo iya, kada sakey ed sikami et ikdan mi kay 1,100 a piraso na pilak.”
6 Diad saginonor et oniay inkuan nen Delila ed si Samson: “Ipangasim, ibagam ed siak no antoy panlalapuan na baleg a biskeg mo tan no antoy nayarin pamalor ed sika pian napatulok ka.”
7 Inkuan nen Samson ed sikato: “No baloren da ak na pitoran ambasa nin lubir na pana,* onkapuy ak a singa ordinaryon too.”
8 Kanian inyakar na saray manuley na saray Filisteo ed si Delila so pitoran ambasa nin lubir na pana, tan imbalor to iratan ed sikato.
9 Natan et wala ray akaparaan a manatambang diad kuarto, insan inyeyag na bii ed sikato: “Samson, nitan la ray Filisteo!” Diad saman et pinultot to iramay lubir na pana, a singa labat apultot a tinebey a linen no niyasingger ed apoy.+ Agda naamtaan so sekreto na biskeg to.
10 Insan oniay inkuan nen Delila ed si Samson: “Pinalikdo* mo ak tan tinilaan mo ak. Ipangasim, ibagam la natan no antoy nayarin pamalor ed sika.”
11 Kanian inkuan tod sikato: “No baloren da ak na saray balon lubir ya agnin balot nausar, onkapuy ak a singa ordinaryon too.”
12 Kanian angalay Delila na saray balon lubir tan sikatoy binalor to tan inyeyag to: “Samson, nitan la ray Filisteo!” (Kaleganan na satan et wala ray manatambang ya akaparaan diad kuarto.) Diad saman et pinultot to iramay lubir ed saray taklay to a singa labat iratan tinebey.+
13 Kayari na saman et inkuan nen Delila ed si Samson: “Anggad natan et siansia nin papalikdoen mo ak tan tinilaan mo ak.+ Ibagam la no antoy nayarin pamalor ed sika.” Insan inkuan tod sikato: “No lagaen mo so pitoran lapir na buek ko ed panamegley na tinebey a walad panaglagaay abel.”
14 Kanian ineletan to iratan ed panamegley na palpal, tan inyeyag tod sikato: “Samson, nitan la ray Filisteo!” Kanian sikatoy abangon tan binagot toy palpal na panaglagaan tan say tinebey.
15 Inkuan to natan ed sikato: “Panoy pangibagam ya, ‘Inaro ta ka,’+ anta anggapod siak so pusom? Amitlo mo ak lan pinalikdo tan agmo ni imbagad siak so panlalapuan na baleg a biskeg mo.”+
16 Lapud sikatoy inagew-agew ton dedesdesen tan pipiliten, sikatoy* agla akaanos.+
17 Kanian imbaga ton siansia ed sikato so amin a walad puso to tan inkuan tod sikato: “Anggapo nin balot so labahas a dinmalan ed ulok, ta sakey ak a Nazareo na Dios manlapu lad inkiyanak ko.*+ No nakatlian ak, naandid siak so biskeg ko tan onkapuy ak tan magmaliw ak a singa arum a totoo.”
18 Sanen anengneng nen Delila ya imbaga to lan amin so walad puso to, impatawag ton tampol iray manuley na saray Filisteo,+ ya inkuan to: “La kayo dia natan, ta imbaga to lad siak so amin a walad puso to.” Kanian linmad sikato iray manuley na saray Filisteo, ya awit day kuarta.
19 Sikatoy pinaugip tod akwalan to; insan anawag na laki tan impaputot toy pitoran lapir na buek to. Kayari na satan et sikatoy apatulok to, tan naandi ed sikato so biskeg to.
20 Inyeyag to natan: “Samson, nitan la ray Filisteo!” Sikatoy abangon tan inkuan to: “Makapaway ak tan makablos ak a singa dati.”+ Balet agto amtan inkaindan la nen Jehova.
21 Kanian sikatoy siningkat na saray Filisteo tan sinukit da iray mata to. Insan sikatoy inawit dad Gaza tan binalor day duaran gulonggulong a gansa, tan nagmaliw a managgiling na ilik diad prisoan.
22 Balet tinmubo lamet so buek to kayarin sikatoy akatlian.+
23 Nantitipon iray manuley na saray Filisteo pian manselebra tan mangiyapay ira na dakel a bagat ed si Dagon+ a dios da, tan ibabaga ran: “Inyawat ed sikatayo na dios tayo si Samson a kabusol tayo!”
24 Sanen sikatoy anengneng na saray totoo, indayew day dios da tan inkuan da: “Inyawat ed sikatayo na dios tayo so kabusol tayo, say aneral ed dalin tayo+ tan amatey na dakdakel ed sikatayo.”+
25 Lapud malikeliket so puso ra, inkuan dan: “Tawag yoy Samson pian walay panliketan tayo.” Kanian impaway day Samson ed prisoan pian paliketen to ra; tan sikatoy pinaalagey dad baetan na saray lusek.
26 Insan inkuan nen Samson ed ugaw a mangitatabin ed sikato: “Ipaegnam ed siak iray lusek ya akaletnegan na sayan abung pian makasaral ak ed saratan.”
27 (Say abung et napno na lalaki tan bibii. Wadman so amin a manuley na saray Filisteo, tan diad atep et walay manga 3,000 lalaki tan bibii a manbabantay legan a panliliketan day Samson.)
28 Tinmawag natan si Samson+ ed si Jehova: “Soberanon Katawan a Jehova, ipangasim, nonot mo ak, tan pabiskeg mo ak,+ ipangasim, diad sayan bekta labat, O Dios, tan abuloyan mo ak ya ombales ed saray Filisteo parad sakey ed saray duaran matak.”+
29 Insan inegnaan to so duaran lusek ed pegley ya akaletnegan na abung, tan intulak to iratan, sakey ed kawanan tan sakey ed kawigin lima to.
30 Inmeyag si Samson: “Abuloyan mon ompatey ak* a kaiba iray Filisteo!” Insan intulak to iray lusek diad anggaay biskeg to, tan atumbaay abung iray manuley tan amin a totoon wadman.+ Kanian mas dakel ni so apatey to diad samay impatey to nen say apatey to legay bilay to.+
31 Diad saginonor et linma iray agagi to tan say interon pamilya nen ama to pian sikatoy isempet da. Sikatoy inyakar dan imponpon ed baetan na Zora+ tan Estaol, diad lubok nen Manoa+ ya ama to. Sikatoy angukom ed Israel diad loob na 20 taon.+
