Ukom 15:1-20

  • Imbawi nen Samson ed saray Filisteo (1-20)

15  Agnambayag, diad panaon na panag-ani na trigo et pinasyar nen Samson so asawa to, a sankaawit toy kilaw a kanding. Inkuan to: “Labay koy onlad si asawak diad kuarto.” Balet sikatoy agpinaloob na ama nen asawa to.  Inkuan na ama na bii: “Abaloan ko sikatoy agmo labay.+ Kanian sikatoy inter kod sakey ed saramay kaibam a katulongan na nobyo.+ Agta mas magana imay yugtan to nen say sikato? Ipangasim, sikato lay alam.”  Balet inkuan nen Samson ed sikara: “Agak la natan natetel na saray Filisteo no sakitan ko ra.”  Kanian linma lay Samson tan angerel na 300 a kuyangen. Insan sikatoy angala na saray panagsilew, impansingeran tod ikol iray kuyangen, tan angiyan na sakey a panagsilew ed pegley na kada duaran ikol.  Insan to sinelselan iramay panagsilew tan imbulos to iramay kuyangen diad kapageyan na saray Filisteo. Pinoolan to so amin a bengatla manlapud abedber ya inani anggad saray pagey, pati saray kaubasan tan saray kiew ya olibo.  Intepet na saray Filisteo: “Siopay nanggawa ed saya?” Oniay inyebat da: “Si Samson a manugang na samay Timnita, ta inala toy asawa nen Samson tan inter tod sakey ed saramay kaiba ton katulongan na nobyo.”+ Diad saman et linma iray Filisteo tan pinoolan da so bii tan say ama to.+  Insan inkuan nen Samson ed sikara: “No oniay kagagawa yo, agak ontunda anggad agak makabawi ed sikayo.”+  Insan nantutumbokan to ran kinakabil, tan dakdakel so pinatey to. Kayari na satan et sikatoy linma tan nanayam ed ungib* diad baleg a bato ya Etam.  Diad saginonor et tinmatdang iray Filisteo tan nankampo rad Juda tan nanliliber ira ed Lehi.+ 10  Insan inkuan na saray lalaki ed Juda: “Akin et tinmatdang kayo pian onsumpad sikami?” a diad saman et inmebat ira: “Tinmatdang kami pian erelen* si Samson, tan ombawi kamid ginawa tod sikami.” 11  Kanian 3,000 lalaki ed Juda so linma ed ungib* diad baleg a bato ya Etam tan inkuan dad si Samson: “Agmo ta amta a saray Filisteo so manguuley ed sikatayo?+ Kanian akin et ginawam iya ed sikami?” Inkuan tod sikara: “Binmawi ak labat ed ginawa rad siak.” 12  Balet inkuan dad sikato: “Linma kami dia pian erelen* tan iyawat mi kad saray Filisteo.” Diad saman et inkuan nen Samson: “Mansamba kayod siak ya agyo ak sasalien a sakitan.” 13  Inkuan dad sikato: “Andi, baloren mi ka labat tan iyawat mi kad sikara, balet agmi ka pateyen.” Kanian sikatoy binalor day duaran balon lubir tan impaway dad samay baleg a bato. 14  Sanen sikatoy akasabid Lehi, inmeyag ed liket iray Filisteo sanen anengneng da. Insan sikatoy pinabiskeg na espiritu nen Jehova,+ tan saray lubir ed taklay to et nagmaliw a singa linen a tinebey ya apoolan, tan atunaw ed lima to iray akabalor ed sikato.+ 15  Sikatoy akaromog na sakey a panga na kalakian ya asno ya agano nin inatey; inala to itan tan inusar ton impamatey ed 1,000 lalaki.+ 16  Insan inkuan nen Samson: “Diad panamegley na sakey a panga na asno—sakey a bunton, duaran bunton! Diad panamegley na sakey a panga na asno et pinatey koy 1,000 lalaki.”+ 17  Kayari ton nansalita et imbantak toy panga tan tinawag ton Ramat-lehi*+ iman a pasen. 18  Insan sikatoy napgaan a maong, tan sikatoy tinmawag ed si Jehova, ya inkuan to: “Inter mod lima na lingkor mo iyan baleg a panangiliktar. Balet ompatey ak kasi natan ed inkapgaan tan napelag ed lima na saray ag-asegat?” 19  Kanian pinalengat na Dios so sakey ya abot a walad Lehi, tan pinmaway so danum ditan.+ Sanen sikatoy inminum, pinmawil ed sikato so espiritu* to tan kinmasil lamet. Kanian tinawag ton En-hakore* iman a pasen, a walad Lehi anggad sayan agew. 20  Tan sikatoy angukom ed Israel diad saray agew na saray Filisteo ed loob na 20 taon.+

Paimanod leksab

Odino “letak.”
Odino “baloren.”
Odino “letak.”
Odino “baloren.”
Kabaliksan toy “Atagey a Pasen na Panga.”
Odino “biskeg.”
Kabaliksan toy “Subol na Samay Ontatawag.”