Ukom 13:1-25

  • Binisita na anghel si Manoa tan say asawa to (1-23)

  • Inkiyanak nen Samson (24, 25)

13  Ginawa lamet na saray Israelita so mauges ed pakanengneng nen Jehova,+ kanian inyawat ira nen Jehova ed lima na saray Filisteo+ ed loob na 40 taon.  Kaleganan na satan et walay sakey a laki ed Zora,+ diad pamilya na saray Danita,+ a say ngaran to et Manoa.+ Say asawa to et lepes* kanian anggapoy anak to.+  Asabi panaon et nampanengneng so anghel nen Jehova ed samay bii tan inkuan tod sikato: “Lepes ka tan anggapoy anak mo. Balet manlukon ka tan mangiyanak kay sakey a laki.+  Natan, manalwar ka tan agka oniinum na alak odino antokaman a de-alkohol ya iinumen,+ tan agka mamangan na antokaman ya agmalinis.+  Manlukon ka tan mangiyanak kay sakey a laki, tan agbalot katlien so buek to,+ lapud sakey a Nazareo na Dios so pagmaliwan na ugaw manlapud kiyanak to,* tan sikatoy mangidaulo ed pangiliktar ed Israel ed lima na saray Filisteo.”+  Insan linma imay bii tan inkuan tod asawa to: “Walay sakey a too na tuan Dios a linmad siak, tan say itsura to et singa anghel na tuan Dios, makapadinayew. Agko tinepet no iner so nanlapuan to, tan agto met imbagad siak so nanlapuan to, pati say ngaran to.+  Balet inkuan tod siak, ‘Manlukon ka tan mangiyanak kay sakey a laki. Natan, agka oniinum na alak odino antokaman a de-alkohol ya iinumen, tan agka mamangan na antokaman ya agmalinis, lapud sakey a Nazareo na Dios so pagmaliwan na ugaw manlapud kiyanak to* ya anggad agew na ipatey to.’”  Akikasi si Manoa ed si Jehova tan inkuan ton: “Dispensa mo ak, Jehova. Ipangasim, papawil mod sikami imay too na tuan Dios ya imbakim pian ibangat to kami no antoy nepeg min gawaen ed ugaw ya iyanak.”  Kanian dinengel na tuan Dios si Manoa, tan pinmawil imay anghel na tuan Dios ed samay bii legan a sikatoy akayurong ed uma; agto kaiba si Manoa ya asawa to. 10  Tampol a binmatik imay bii tan imbaga tod asawa to: “Nampanengneng ed siak imay laki a linmad siak nen imbeneg ya agew.”+ 11  Diad saman et inmalagey si Manoa tan inibaan toy asawa to. Sikatoy linmad samay laki tan inkuan tod sikato: “Sika may laki ya akitongtong ed asawak?” Inkuan to: “On, siak.” 12  Insan inkuan nen Manoa: “Ontua komon iray salitam! Panoy pamabaleg mid ugaw, tan antoy gawaen to?”+ 13  Kanian inkuan na anghel nen Jehova ed si Manoa: “Nepeg a sumpalen nen asawam so amin a bengatlan imbagak ed sikato.+ 14  Agto nepeg a mangan na antokaman a manlapud ubas, agnepeg ya oninum na alak odino antokaman a de-alkohol ya iinumen,+ tan agnepeg a mangan na antokaman ya agmalinis.+ Nepeg ton unoren so amin ya ingganggan kod sikato.” 15  Inkuan natan nen Manoa ed anghel nen Jehova: “Ipangasim, agka ni onaalis ta mangitarya kami na kilaw a kanding parad sika.”+ 16  Balet inkuan na anghel nen Jehova ed si Manoa: “Anggano agak onalis, agko met lanlamang kanen so iparungom; balet no labay moy mangiyapay na apay a popoolan parad si Jehova, iyapay mo la itan.” Ag-amta nen Manoa ya anghel nen Jehova iman. 17  Insan inkuan nen Manoa ed anghel nen Jehova: “Antoy ngaran mo,+ pian napagalangan mi ka sano ontua so imbagam?” 18  Balet inkuan na anghel nen Jehova ed sikato: “Akin et tetepeten moy ngaran ko, anta makapakelaw itan?” 19  Insan inala nen Manoa imay kilaw a kanding tan say apay a kakanen tan inyapay tod si Jehova diad tapew na bato. Tan walay makapakelaw a ginawa To legan a manbabantay si Manoa tan say asawa to. 20  Sanen mamapaatagey ed tawen so apoy manlapud altar, amaatagey imay anghel nen Jehova diman ed apoy ed altar legan a manbabantay si Manoa tan say asawa to. Tampol a dinmakmomo rad dalin. 21  Aglan balot nampanengneng imay anghel nen Jehova ed si Manoa tan ed asawa to. Diad saman et naamtaan nen Manoa ya anghel nen Jehova iman.+ 22  Kanian inkuan nen Manoa ed asawa to: “Ompatey ta la, ta anengneng tay Dios.”+ 23  Balet inkuan nen asawa tod sikato: “No labay to ta’n pateyen nen Jehova, agto la komon inawat ed sikata so apay a popoolan+ tan say apay a kakanen, agto la komon impanengneng ed sikata irayan amin, tan agto la komon imbagad sikata so antokaman ed saraya.” 24  Diad saginonor et angiyanak imay bii na sakey a laki tan inngaran ton Samson;+ tan legan ya ombabaleg so ugaw, sikatoy bebendisyonan nen Jehova. 25  Asabi panaon et sikatoy pinakiwas na espiritu nen Jehova+ diad Mahane-dan,+ ed baetan na Zora tan Estaol.+

Paimanod leksab

Odino “agmakaanak.”
Literal, “manlapud eges.”
Literal, “manlapud eges.”