Oseas 4:1-19
4 Dengel yoy salita nen Jehova, O totoo na Israel,Ta mikuentaan si Jehova ed saray manaayam ed sayan dalin,+Lapud anggapoy katuaan odino matoor a panangaro odino pikakabat ed Dios diad sayan dalin.+
2 Kasmak iray palson samba tan panagtila+ tan panagpatey+Tan panagtakew tan pikakalugoran,+Tan mantutumbokan so panagpaagus na dala.+
3 Kanian manermen so dalin+Tan onkapuy a maong so amin a manaayam ditan;Naandi iray atap ya ayep tan manok,Pati saray sira ed dayat.
4 “Balet anggapo komoy toon onsumpa odino mangipetek,+Ta saray totoom et singa saramay onsusumpa ed sakey a saserdote.+
5 Kanian napatir kayo diad kakkaktangay agew,Tan kaiba yon napatir so propeta, a singa no diad labi.
Tan pareenen* ko so ina yo.
6 Napareen* iray totook, lapud andian iray kakabatan.
Lapud impulisay yoy kakabatan,+Ipulisay ta kayo met diad panlilingkor yo bilang saserdotek;Tan lapud nilingwanan yoy ganggan* na Dios yo,+Lingwanan ko met iray ananak yo.
7 No panoy indakel da, ontan met so indakel na kasalanan dad siak.+
Pagmaliwen kon kabandayan so gloria ra.*
8 Say kasalanan na saray totook so kakanen da,Tan pampilpilalekan da so* kaugsan da.
9 Nampadpara so nagawa ed saray totoo tan saserdote;Mikuentaan ak ed sikara lapud saray kagagawa ra,Tan iyakar kod sikara so resulta na saray kiwakiwas da.+
10 Mangan ira balet ag-ira napesel.+
Miakdol irad nanduruman totoo,* balet ag-ira ondakel,+Lapud agda dinengel si Jehova.
11 Say prostitusyon* tan alak tan say balon alakSo mangekal na motibo ed panggaway duga.*+
12 Tinmupleg iray totook ed saray idolo ran gawad kiew,Tan gagawaen da no antoy ibagad sikara na baston da;*Lapud imbalang ira na espiritu na prostitusyon,*Tan ag-ira nampasakop ed Dios lapud gagawaen dan prostitusyon.*
13 Manbabagat irad toktok na kapalandeyan,+Tan manpapaasewek ira na bagat ed saray pukdol,Diad silong na saray kiew a roble,* kiew ya estorake,* tan kada baleg a kiew,+Lapud maabig so sirom na saratan.
Kanian akibiang ed prostitusyon* iray ananak yon bibiiTan akikalugoran iray manugang yon bibii.
14 Agko dusaen iray ananak yon bibii lapud impibiang dad prostitusyon,*Tan saray manugang yon bibii lapud impikalugoran da.
Ta akila iray lalaki ed saray paabang a bibiiTan manbabagat ira a kaiba na saray paabang a bibii ed templo;Naderal iray ontan a totoon andiay pakatalos.+
15 Anggaman milalawanan ka,* O Israel,+Agkomon mankasalanan so Juda.+
Agkayo oonlad Gilgal+ odino ed Bet-aven,+Tan agkayo mansasamba na, ‘Unong a mabilay si Jehova!’+
16 Ta nagmaliw a benger so Israel+ a singa agnapatulok a baka.
Kasin pastolan ira natan nen Jehova a singa sakey a kilaw a kalakian a karnero ed panagpastolan?*
17 Say Efraim et akapeket ed saray idolo.+
Sikatoy paulyan yon bukor!
18 Sanen naupot lay serbesa ra,*Akiakdol irad nanduruman totoo.*
Tan labalabay na saray manuley* to so kabandayan.+
19 Sikatoy balkoten* na dagem ed saray payak to,Tan nabaingan ira lapud saray bagat da.”
Paimanod leksab
^ Odino “deralen.”
^ Odino “bangat.”
^ Odino “Naderal.”
^ Odino posiblin, “Insalat dad kabandayan so mismon gloriak.”
^ Odino “Magmaliw iran alablabas ya imoral; Manggawa ray prostitusyon.”
^ Literal, “mangekal na puso.”
^ Odino “imoralidad.”
^ Odino “baston dan parad panagparles.”
^ Odino “imoralidad.”
^ Odino “imoralidad.”
^ Sakey iyan klase na angkabaleg a kiew. Diad Ingles et oak.
^ Sakey a kiew ya ambalbalingit iray amputin rosas to.
^ Odino “imoralidad.”
^ Odino “imoralidad.”
^ Odino “manggagawa kay imoral.”
^ Literal, “ed sakey a maawang a pasen?”
^ Odino “serbesa ran nanlapud trigo.”
^ Odino “Nagmaliw iran alablabas ya imoral; Nanggawa ray prostitusyon.”
^ Literal, “saray panagsamper.”
^ Odino “itikyab.”
