Lucas 23:1-56

23  Kanian inmalagey so karaklan ed sikara, tan sikatoy inyakar da ed si Pilato.  Insan sikatoy inakusaan da, a kuan da: “Aromogan mi iyan too a guguloen toy nasyon mi tan isesebel toy pambayar na saray buis ed Cesar, tan ibabaga to a sikaton mismo so Kristo ya ari.”  Natan et sikatoy tinepetan nen Pilato: “Sika so ari na saray Judio?” Et inmebat ed sikato: “Sikan mismo so mangibabaga ed satan.”  Insan inkuan nen Pilato ed saray manunan saserdote tan saray totoo: “Anggapoy aromog kon kasalanan na sayan too.”  Balet nagmaliw iran mapilpilit, a kuan da: “Guguloen to so totoo diad pambabangat to ed interon Judea, ya inggapo to ni ingen ed Galilea ya anggad dia.”  Sanen nadngel itan nen Pilato, tinepet to no kasin taga Galilea iyan too,  tan kayari ton aseguro a sikatoy nanlapud nasasakopan nen Herodes,* sikatoy imbaki to ed si Herodes, a wadman met ed Jerusalem diad saraman ya agew.  Sanen anengneng nen Herodes si Jesus, sikatoy malikeliket ta abayag to lan labay a nanengneng lapud nadngelan toy nipaakar ed sikato, tan iilaloan toy makanengneng na sakey a tanda a gawaen to.  Et amayamay so intepet to ed sikato, balet agto inebatan iratan. 10  Balet, saray manunan saserdote tan saray eskriba et naynay ya onaalagey tan mapaspasnok iran mangaakusa ed sikato. 11  Insan sikatoy pinabpabaingan nen Herodes tan saray sundalo to, tan inelek-elekan to a sinulongan na masileng a kawes, insan impawil da ed si Pilato. 12  Diad saman ya agew et nagmaliw a sankaaro si Herodes tan si Pilato; ta antis na satan et abayag da lan kabusol so sakey tan sakey. 13  Insan tinipon nen Pilato iray manunan saserdote tan papangulo tan saray totoo 14  tan inkuan to ed sikara: “Inawit yo ed siak iyan too a kuan yon susugsogan toy totoo a manrebelde, tan nia! sikatoy inusisak ed arapan yo balet anggapoy aromog kon basiyan na saray iyaakusa yo ed sikato. 15  Diad tua, anggapo met so aromog nen Herodes, ta sikatoy impawil to ed sikatayo; tan nia! anggapoy ginawa ton makanepegan na patey. 16  Sikatoy dusaen ko sirin insan ibulos ko la.” 17*  —— 18  Balet inmeyag ira a kaiba so amin a totoo, a kuan da: “Patey mo, balet ibulos mo ed sikami si Barabas!” 19  (Sayan laki et nipriso lapud panagrebelde ed gobierno a nagagawa ed syudad tan lapud impamatey to.) 20  Et nansalita lamet si Pilato ed sikara, lapud labay to lan ibulos si Jesus. 21  Diad saman et lalo ran inmeyag, a kuan da: “Ipasak! Ipasak!” 22  Et inkuan to ed sikara diad komatlon pankanawnawa: “Akin, antoy mauges a ginawa na sayan too? Anggapon balot so aromog ko ed sikato a makanepegan na patey, sikatoy dusaen ko sirin tan ibulos ko la.” 23  Balet maksil so boses dan mangipipilit a sikatoy nepeg ya ipasak; tan inkasikasil day eyag da. 24  Kanian senentensiaan la nen Pilato pian nagawa so kekerewen da: 25  imbulos to imay papaibulos da, samay toon apriso lapud impanrebelde ed gobierno tan lapud impamatey to, balet impalima toy Jesus ed sikara pian nagawaan da ed sikato so labay da. 26  Natan sanen sikatoy iyaakar da la, sinabat day Simon a taga Cirene, a nanlapud uma, tan impasakbat da ed sikato so panamairapan a kiew* pian awiten to itan ya itumbok ed si Jesus. 27  Balet ontutumbok ed sikato so dakerakel a totoo tan saray bibii a tatapoktapoken day pagew da lapud ermen tan sikatoy aakisan da. 28  Nilingaw nen Jesus iray bibii tan inkuan to: “Ananak a bibii na Jerusalem, agyo ak la aakisan. Say akisan yo ingen et say inkasikayo tan saray anak yo; 29  ta nia! onsabi iray agew sano ibaga na totoo, ‘Maliket iray bibiin agmakaanak, tan saramay agnananak tan saramay agnampasuso!’ 30  Insan ibaga ra naani ed saray palandey, ‘Saniban yo kami!’ tan ed saray pukdol, ‘Iyamot yo kami!’ 31  Lapud no gawaen da irayan bengatla sano ambasay kiew, antoy nagawa sano amagaan la itan?” 32  Balet walay duara nin lalaki a kriminal, ya inyakar da met a pateyen a kaiba to. 33  Tan sanen akasabi ra ed pasen a tatawagey Lapislapis na Ulo, sikatoy impasak da ditan tan saramay kriminal, sakey ed kawanan to tan sakey ed kawigi to. 34  [Balet inkuan nen Jesus: “Ama, perdonam ira, ta agda amtay gagawaen da.”]* Niarum ni, nampapalaranan* da iray kawes to pian panaapagan da. 35  Tan saray totoo et akaalagey a maniimaton. Balet sikatoy binabalaw na saray papangulo, a kuan da: “Insalba toy arum; isalba to met komon so inkasikaton dili no sikato so Kristo na Dios, say Sakey a Pinili.” 36  Tan sikatoy inelek-elekan met na saray sundalo, ya inasinggeran da tan sinali ran painumen na anakseng ya alak, 37  tan inkuan da: “No sika so ari na saray Judio, isalbam so inkasika.” 38  Diad uloan to et wala met so akasulat: “Saya so ari na saray Judio.” 39  Balet sikatoy ininsulto na sakey ed saray impasak a kriminal: “Agta sika so Kristo? Isalbam so inkasika tan sikami.” 40  Et inmebat imay sakey tan binano to, a kuan to: “Agmo ta tatakotay Dios, anta nadudusa ka la lanti a singa sayan too? 41  Tan makatunongan labat iya ed sikata, ta aawaten ta lay kanepegan ta lapud saray ginawa ta; balet sayan too et anggapoy ginawa ton mauges.” 42  Tan inkuan to ni: “Jesus, nonot mo ak sano onsabi ka ed panarian mo.” 43  Et inkuan to ed sikato: “Tua ibagak ed sika natan,* Nakaiba ta ka ed Paraiso.” 44  Natan et ngalngali la komanem ya oras,* ingen ta binmilunget ed interon dalin anggad komasiam ya oras,* 45  lapud naandi so liwawa na agew. Insan say kurtina na santuaryo et apilat ed pegley. 46  Tan inmeyag si Jesus, a kuan to: “Ama, imatalek ko ed sika so espirituk.” Kapangibaga to ed saya, nauyos so linawa to. 47  Lapud anengneng na opisyal na saray sundalo iyan agawa, inggloria toy Dios, a kuan to: “Peteg a matunong iyan too.” 48  Sanen sarayan agawa et anengneng na amin a totoon nantitipon diman a maniimaton, sinmempet ira, a tatapoktapoken da iray pagew da. 49  Niarum ni, amin iramay akankabat ed sikato et akaalagey ed bandad arawi. Tan saramay nanuulop a bibiin tinmumbok ed sikato manlapud Galilea et akaalagey met a maniimaton ed sarayan bengatla. 50  Tan nia! walay sakey a lakin manngaran na Jose, a membro na Konsilyo,* sakey a maong tan matunong a too— 51  ya agto sinuportaan imay getma tan ginawa ra—sikatoy taga Arimatea, a sakey a syudad na saray taga Judea, tan manaalagar ed panarian na Dios. 52  Sikatoy linma ed si Pilato tan kinerew toy bangkay nen Jesus. 53  Tan inleksab to itan tan binalkot toy pinon lienzo, tan imparukol to ed sakey a lubok ya inungib ed bato, ya agnin balot angiponponan. 54  Et asabi lay agew na Panagparaan, tan asingger la so liwawa ed labi na sabaton. 55  Balet linma met iramay bibiin akila ed sikato manlapud Galilea tan ninengneng day lubok tan no panon so impangilira da ed bangkay to; 56  tan sinmempet ira pian mangiparaan na saray pabalingit tan ambalingit a larak. Balet, nampainawa ni ra legan na sabaton unong ed ganggan.

Paimanod leksab

Luc 23:7 * Nengnengen so paimano ed leksab na Luc 3:1.
Luc 23:17 * Nengnengen so paimano ed leksab na Mat 17:21.
Luc 23:26 * Nengnengen so Apendise 6.
Luc 23:34 * Ipapatnag na saray bracket  a say teksto et inekal ed pigaran kadaanan a manuskrito balet ta naromog itan ed arum.
Luc 23:34 * Nengnengen so paimano ed leksab na Mat 27:35.
Luc 23:43 * Say comma et ag-inusar ed orihinal a Griegon teksto. Diad sayan patalos et inyan itan ed kayari na “natan” lapud sayan pakatalos et susuportaan na arum niran bersikulo na Biblia, a singa say Jn 20:17; Gaw 1:1-3, 9; 10:40; 1Co 15:20; Col 1:18.
Luc 23:44 * Alas-12 ed kaagwan, no bilangen manlapud imbutay na agew.
Luc 23:44 * Alas-3 ed ngarem, no bilangen manlapud imbutay na agew.
Luc 23:50 * Odino, “say Sanhedrin.”