Lucas 5:1-39

5  Diad sakey ya inkagawa, si Jesus et mumungkogen na dakel a totoo tan ondedengel ira ed salita na Dios legan a sikatoy akaalagey ed asingger ed dayat na Genesaret.  Tan anengneng to a walad gilig na dayat so duaran baloto, balet ta akalasur la iray managsigay tan uurasan da la iray iket da.  Sikatoy linmugan ed sakey ed saratan a baloto, tan kinerew to ed si Simon ya akanggawa ed satan ya iyarawi to itan na daiset. Insan sikatoy yinmurong, tan manlapud baloto et binangatan to so dakel a totoo.  Kasumpal ton nansalita, inkuan to ed si Simon: “Iyakar mo diman ed aralem, tan ipelag yo iray iket yo pian makarel kayo.”  Balet inkuan nen Simon: “Managbangat, sanlabi kami lan mansisigay tan anggapon balot so nala mi, balet lapud imbagam, ipelag ko iray iket.”  Et sanen impelag da iray iket da, akarel ira na dakdakel a sira. Diad tua et napipilat la iray iket da.  Kanian kinaweyan da iray kakaiba ra a walad sananey a baloto pian ondago ra tan tulongan da ra; tan dinmago ra, tan pinanopano ra so duaran baloto, kanian onlelereg la iratan.  Kanengneng nen Simon Pedro ed saya, sikatoy tinmalimukor ed arapan nen Jesus, a kuan to: “Katawan, arawian mo ak, ta sakey ak a toon makasalanan.”  Ta sikato tan amin a kaiba to et nikelawan a maong diad impakarel da na sira, 10  pati sikara di Santiago tan Juan, ya ananak nen Zebedeo, a kakaiba nen Simon. Balet inkuan nen Jesus ed si Simon: “Agka la natatakot. Manlapud natan et mansigay ka la na totoon mabilay.” 11  Kanian insakbit da lamet iray baloto, tan tinaynan da so amin a bengatla tan tinmumbok ira ed sikato. 12  Diad sakey lamet ya inkagawa legan a sikatoy walad sakey ed saray syudad, nia! walay sakey a lakin napno na kating! Sanen anengneng toy Jesus, sikatoy dinmakmomo tan akikasi, a kuan to: “Katawan, sarag mo ak a linisan no labay mo.” 13  Kanian, inyunat toy lima to, insan diniwit to, a kuan to: “Labay ko. Nalinisan ka.” Et tampol a naandi so kating na laki. 14  Tan binilin to so laki ya agto ibabaga iya ed anggan siopa, tan inkuan to: “Balet onla kan manpanengneng ed saserdote, tan mangiyapay ka ta alinisan ka, unong ed ingganggan nen Moises, bilang paneknek ed sikara.” 15  Ingen ta lalon kinmayat so balita nipaakar ed sikato, tan dakel a totoo so nantitipon pian ondengel tan patambal da iray sakit da. 16  Balet, sikatoy nambukbukor diad kalawakan tan manpipikasi. 17  Et diad sakey ed saraman ya agew a sikatoy manbabangat, wadman met ya akayurong iray Fariseo tan saray managbangat na ganggan a nanlapud amin a baryo ed Galilea tan Judea tan Jerusalem. Tan walad sikato so pakayari nen Jehova a mamaabig. 18  Tan nia! walaray lalaki ya awit-awit day sakey a paralitiko a walad dukolan to, tan nananap ira na dalan pian sikatoy niloob da tan niiyan da ed arapan to. 19  Lapud karakel na totoo, ag-ira makaromog na dalan pian sikatoy niloob da, kanian sinmapat ira ed atep tan binungawan da itan, insan sikatoy inleksab da ed panamegley na melag a dukolan diad pegley na saramay walad arapan nen Jesus. 20  Tan sanen anengneng toy pananisia ra, inkuan to: “Kaaro, aperdona la iray kasalanan mo.” 21  Diad saman et nankatunongan iray eskriba* tan Fariseo, a kuan da: “Siopa iyan mansasalita na panag-ayew? Siopa so makaperdona na saray kasalanan noag say Dios labat?” 22  Balet sanen atebek nen Jesus so panagkatunongan da, oniay inyebat to ed sikara: “Antoy ikakatunongan yo ed kapusoan yo? 23  Dinan so mas mainomay ya ibaga, ‘Aperdona la iray kasalanan mo,’ odino ‘Alagey ka tan manakar ka’? 24  Balet ta pian naamtaan yo a say Anak na too et walay autoridad to diad dalin a mamerdona na saray kasalanan,” inkuan to ed samay paralitiko: “Ibagak ed sika, Alagey ka tan libit moy dukolan mo tan sempet ka la.” 25  Et sikatoy inmalagey a tampol ed arapan da, tan nilibit to imay dinukolan to tan sinmempet la ed abung to, ya inggloria toy Dios. 26  Tan nikelkelawan iran amin, tan inggloria ra so Dios, tan tinmakot iran maong, a kuan da: “Nikadkaduma iray anengneng mi natan!” 27  Natan kayari na sarayan bengatla, sikatoy pinmaway tan anengneng toy sakey a managsingil na buis a manngaray Levi ya akayurong ed panagsingilan na buis tan inkuan to: “Magmaliw kan patumbok ko.” 28  Et sikatoy inmalagey, a tinaynan to so amin a bengatla, tan tinmumbok ed sikato. 29  Tan sikatoy imparaanan nen Levi na baleg a ponsia diad abung to, tan akirungo ed sikara so dakerakel a managsingil na buis pati say arum nin kakaiba ra. 30  Diad saya et nannguronguro iray Fariseo tan saray eskriba ra ed saray disipulo to, a kuan da: “Akin et midudungo kayo ed saray managsingil na buis tan saray managkasalanan?” 31  Et inmebat si Jesus ed sikara: “Agmankaukolan na managtambal iramay maksil so laman da, noagta saraman labat so mansasakit. 32  Linma ak dia pian pagbabawien iray managkasalanan, aliwan saray matunong.” 33  Et imbaga ra ed sikato: “Saray disipulo nen Juan et mabetbet a manaayunal tan masimoon a manpipikasi, anggan saray babangatan na saray Fariseo, balet saray disipulom et mamangan tan oniinum ira.” 34  Inkuan nen Jesus ed sikara: “Agta saray kakaaro na nobyo et agyo nayarin panayunalen legan a kaiba to ni ra? 35  Ingen ta onsabi iray agew sano alaen la ed sikara so nobyo, insan manayunal la ra ed saratan ya agew.” 36  Tan sikatoy angiter ed sikara na ilustrasyon: “Anggapo so toon mangatli ed balon kawes pian isakab to ed daan a kawes; ta no gawaen to itan, napilat so balon sakab tan ag-inangay na daan a kawes so sakab ya inala ed balon kawes. 37  Ontan met, anggapoy toon mangiyan na balon alak diad daan iran panagkargaan;* ta no gawaen to itan, ombetag so panagkargaan, tan naibung so balon alak tan naderal so panagkargaan. 38  Balet nepeg ya iyan so balon alak diad balo iran panagkargaan. 39  Anggapo so toon malabay ya oninum na balon alak no atawayan to la so daan, ta ikuan ton, ‘Maong imay daan.’”

Paimanod leksab

Luc 5:21 * Nengnengen so paimano ed leksab na Mat 2:4.
Luc 5:37 * Saray supot a gawa ed katat.