Lucas 24:1-53

24  Diad unonan agew na simba, asaksakbay iran linma ed lubok, a sankaawit da iray pabalingit ya imparaan da.  Balet asabian da a nitulin lay baton akasara ed pakanodnonotan a lubok,  tan sanen linmoob ira, agda anengneng so bangkay nen Katawan a Jesus.  Sanen nagugulo so nonot da lapud saya, nia! nampanengneng ed sikara so duaran lalaki a mansyayap so kawes da.  Et ataktakot irayan bibii tan ag-ira tinmangwa, kanian inkuan na lalaki ed sikara: “Akin et aanapen yo ed saray inaatey so Sakey a mabilay?  [Anggapo dia, ta sikatoy apaoli la.]* Nonot yo imay imbaga to ed sikayo sanen sikatoy wala ni ed Galilea,  ya inkuan ton say Anak na too et nepeg ya iyawat ed saray lima na makasalanan a totoo tan ipasak ingen ta onoli ed komatlon agew.”  Kanian anonotan da iray imbaga to,  tan tinmaynan ira ed pakanodnonotan a lubok pian ipakabat da irayan amin ed saray labinsakey tan ed arum niran disipulo. 10  Say angibaga ed sarayan bengatla ed saray apostol et sikara di Maria Magdalena, tan Juana, tan Maria ya ina nen Santiago, pati say arum a bibiin kaiba ra. 11  Balet, sarayan imbaga na bibii et impasen dan anggapoy kakanaan tan agda ra panisiaan. 12  [Ingen inmalagey si Pedro tan batik ed kawalaan na pakanodnonotan a lubok, tan sanen tinmakiling, saray berber labat so anengneng to. Kanian sikatoy tinmaynan a mankelaw ed agawa.]* 13  Balet, nia! diad saman a mismon agew et manaakar so duaran disipulo a paarap ed sakey a baryo a tatawagen ya Emaus, a masulok a labinsakey a kilometro so kaarawi to ed Jerusalem, 14  tan pantotongtongan dan dua irayan amin ya agawa. 15  Legan iran mantotongtong, inmasingger si Jesus tan akiulop ed sikaran manakar; 16  balet sikatoy agda abidbir. 17  Inkuan to ed sikara: “Anto irayay pansasangsangan yon dua legan a manaakar kayo?” Tan tinmunda ra a maer-ermen so lupa ra. 18  Inmebat ed sikato imay manngaran na Cleopas: “Kasin sakey kan sangkaili ed Jerusalem kanian agmo amta iray agawa diman nen imbeneg iran agew?” 19  Et inkuan to ed sikara: “Nipaakar ed anto?” Inkuan da ed sikato: “Nipaakar ed si Jesus a Nazareno, a nagmaliw a propetan makapanyari ed gawa tan salita diad imaton na Dios tan ed amin a totoo; 20  tan no panon a sikatoy inyawat na saray manunan saserdote tan papangulo mi pian nasentensiaan na patey tan nipasak. 21  Balet iilaloan mi a sayan too so aturon mangiliktar ed Israel; on, aliwan saratan labat, komatlo la iyan agew manlapu la nen agawa iratan. 22  Niarum ni, nikelawan kami met ed imbalita na pigaran bibii ed limog mi, ta asaksakbay iran linma ed lubok 23  balet agda aromog so bangkay to tan pinmawil ira, a kuan dan wala met so nikadkaduman anengneng da, salanti, saray anghel ya angibagan sikatoy mabilay. 24  Niarum ni, arum ed saray kaiba mi et linma ed kawalaan na pakanodnonotan a lubok, tan anengneng da a tua so inkuan na saray bibii, balet sikatoy agda anengneng.” 25  Kanian inkuan to ed sikara: “O sikayoran andiay-pakatalos tan mairap a manisia ed amin a bengatlan sinalita na saray propeta! 26  Agta nakaukolan a sagmaken na Kristo irayan bengatla ta pian makasabi ed gloria to?” 27  Tan impaliwawa to ed sikara so amin a bengatlan walad Kasulatan a nipaakar ed sikato, manlapud saray sulat nen Moises tan amin a Propeta. 28  Diad kaunoran, asingger la ra ed baryo a laen da, tan impalikas to a singano arawi ni so laen to. 29  Balet sikatoy pinilit da, a kuan da: “Ontuloy ka ni ed sikami, ta onlalabi la tan asumpal lay sanagew.” Diad saman et sikatoy tinmuloy ed sikara. 30  Tan sanen sikatoy akirungo ed sikara, inala to so tinapay, impabendisyonan to, pinisagpisag to insan inderew to ed sikara. 31  Diad saman et atalosan da la tan abidbir da a sikato iman; insan sikatoy naandi ed pakanengneng da. 32  Tan inkuan da ed sakey tan sakey: “Agta singa onaapoy so puso ta sanen sikatoy mitotongtong ed sikata diad dalan, legan ton ipapaliwawa ed sikata so Kasulatan?” 33  Diad saman a mismon oras et sikaray inmalagey tan pinmawil ed Jerusalem, tan asabian da so labinsakey tan saramay akitipon ed sikara, 34  a kuan da: “Tua ya apaoli so Katawan tan nampanengneng ed si Simon!” 35  Natan et insalaysay dan mismo iray agawa diad dalan tan no panon a sikatoy abidbir da diad impamisag toy tinapay. 36  Legan dan ibabaga irayan bengatla, sikatoy inmalagey ed pegley da [tan inkuan to ed sikara: “Niwala komon so kareenan ed sikayo.”]* 37  Balet lapud abaloan dan sakey ya espiritu so anengneng da, akigtot tan ataktakot ira. 38  Kanian inkuan to ed sikara: “Akin et agonigon kayo, tan akin et manduaruwa so kapusoan yo? 39  Nengneng yo iray limak tan salik, ta siak iya. Diwit yo ak tan nengneng yo, ta say sakey ya espiritu et andian na laman tan pukepukel a singa nanenengneng yon walad siak.” 40  [Tan legan ton ibabaga iya, impanengneng to ed sikara iray lima tan sali to.]* 41  Balet sanen agni ran siansia makapanisia lapud panlikliket tan pankelkelaw da, inkuan to ed sikara: “Walay naakan dia?” 42  Tan sikatoy dinerewan da na sakey ya inkalot a sira; 43  tan inala to itan tan inakan to ed arapan da. 44  Inkuan to natan ed sikara: “Saraya imay salita ya imbagak ed sikayo sanen kaiba ta kayo ni, ya amin a nisulat ed ganggan nen Moises tan ed sulat na saray Propeta tan Salmos nipaakar ed siak et nepeg a nasumpal.” 45  Insan sigpot ton nilukasan iray nonot da pian natalosan da so kabaliksan na Kasulatan, 46  tan inkuan to ed sikara: “Diad onian paraan et nisulat a say Kristo et manirap tan diad komatlon agew et onoli manlapud inaatey, 47  tan unong ed ngaran to et nipulong ed amin a nasyon so nipaakar ed panagbabawi pian naperdona iray kasalanan. Manlapu ed Jerusalem, 48  sikayoy magmaliw a tasi nipaakar ed sarayan bengatla. 49  Tan nia! ibakik ed sikayo imay insipan nen Amak. Balet, manayam kayo ed syudad ya anggad makaawat kayo na pakayarin manlapud tagey.” 50  Balet inyakar to ra angga ed Betania, tan intagey to iray lima to tan benendisyonan to ra. 51  Legan a bebendisyonan to ra, sikatoy nisian ed sikara tan ontatagey lan paarap ed tawen. 52  Tan dinmakmomo ra ed sikato tan malikeliket iran pinmawil ed Jerusalem. 53  Tan naynay a wala ra ed templo a mangidadayew ed Dios.

Paimanod leksab

Luc 24:6 * Parad eksplinasyon nipaakar ed saray bracket, nengnengen so paimano ed leksab na Luc 23:34.
Luc 24:12 * Parad eksplinasyon nipaakar ed saray bracket, nengnengen so paimano ed leksab na Luc 23:34.
Luc 24:36 * Parad eksplinasyon nipaakar ed saray bracket, nengnengen so paimano ed leksab na Luc 23:34.
Luc 24:40 * Parad eksplinasyon nipaakar ed saray bracket, nengnengen so paimano ed leksab na Luc 23:34.