Lucas 13:1-35

13  Diad saman a mismon panaon et walaray wadman ya angibalita ed sikato nipaakar ed saray taga Galilea a say dala ra et inlaok nen Pilato ed saray bagat da.  Kanian sikatoy inmebat ed sikara: “Isipen yo kasi a mas makasalanan irayan taga Galilea nen say arum niran taga Galilea lapud asagmak da irayan bengatla?  Ibagak ed sikayo, andin balot; balet, no agkayo magbabawi, ompatey kayo met ya amin.  Odino saramay labinwalo ya atapilan na tori ed Siloam, a sengegay impatey da, isipen yo kasi a mas baleg so kasalanan* da nen say arum niran totoo a manaayam ed Jerusalem?  Ibagak ed sikayo, andin balot; balet no agkayo magbabawi, ompatey kayon amin diad ontan met a paraan.”  Insan insalaysay to ed sikara iyan ilustrasyon: “Walay sakey a toon walaan na kiew ya igos ya akatanem ed ubasan to, tan linman nananap na bunga na satan, balet anggapoy aromog to.  Insan inkuan to ed samay managkimey ed ubasan, ‘Nia, taloy taon ak lan manaanap na bunga na sayan kiew ya igos, balet anggapoy aromog ko. Batang mo la! Akin a magmaliw laingen ya andi-kana so dalin lapud satan?’  Et sikatoy inmebat, ‘Katawan, paulyanan mo ni ed sayan taon, anggad nakotkotan ko so paliber na satan tan naabonoan ko,  ta no manbunga itan diad arapen, maong; balet no andi, ipabatang mo la.’” 10  Natan et sikatoy manbabangat diad sakey ed saray sinagoga legan na sabaton. 11  Tan nia! walay bii a labinwalon taon lan pansasakiten na sakey ya espiritu, tan sikatoy abukot kanian agton balot nayarian so onalagey a diretso. 12  Sanen sikatoy anengneng nen Jesus, tinawag to tan inkuan to: “Bii, nibulos ka la ed sakit mo.” 13  Et intapew to iray lima to ed bii; tan tampol ya akaalagey a diretso tan inggloria toy Dios. 14  Balet sinmanok so manangasikaso na sinagoga lapud amaabig si Jesus legan na sabaton tan inkuan to ed saray totoo: “Walay anemiran agew a nepeg a gawaen itan, kanian diad saratan labat ya agew so nayarin pampatambal yo, ya aliwan diad agew na sabaton.” 15  Balet, inmebat so Katawan ed sikato: “Mansimpisimpitan, agta uukbaran na kada sakey ed sikayo so baka odino asno to ed kuwadra tan iyaakar to itan a painumen legan na sabaton? 16  Agta manepeg labat sirin a sayan bii ya anak nen Abraham, tan labinwalon taon lan binalor nen Satanas, et naukbaran ed sayan inkabalor to, anggano agew na sabaton?” 17  Sanen imbaga to irayan bengatla, abaingan so amin ya onsusumpa ed sikato; balet nanliketan na amin a totoo so amin a makapakelaw a ginawa to. 18  Kanian intuloy ton inkuan: “Anto so pipadparaan na panarian na Dios, tan antoy pangikomparaan ko ed satan? 19  Singa itan bukel na mustasa ya inala na sakey a too tan insukit to ed tanamanan to, tan tinmubo itan tan nagmaliw a kiew, tan saray sanga na satan et nansiroman na saray ontitikyab a manok.” 20  Tan inkuan to lamet: “Antoy pangikomparaan ko ed panarian na Dios? 21  Singa itan lebadura, ya inala na sakey a bii tan inlaok* to ed taloran angkakabaleg iran sukat na arina anggad linmebag so interon masa.” 22  Tan sikatoy linma ed kada syudad tan kada baryo, a nambabangat tan intuloy toy nambiahe a paarap ed Jerusalem. 23  Natan et walay sakey a toon nantepet ed sikato: “Katawan, daiset labat kasi so nilaban?” Inkuan to ed sikara: 24  “Pampilitan yon maong* so makaloob ed mainget a puerta, lapud ibagak ed sikayo, dakel naani so manpirawat a makaloob balet agda nayarian. 25  Ta sano say akan-abung et intalak to lay puerta, insan kayo labat onalagey ed paway tan ontoktok ed puerta, ya ikuan yon, ‘Katawan, lukasan mo kami,’ sikatoy onebat ed sikayo, ‘Agta kayo kabat.’ 26  Insan ibaga yo, ‘Angan tan inminum kami ed arapan mo, tan nambangat ka diad saray maawang a dalan* mi.’ 27  Balet sikatoy mansalita tan ikuan to ed sikayo, ‘Agta kayo kabat. Arawi kayo ed siak, amin yon manggagawa na ag-inkatunong!’ 28  Diman so pannangisan yo tan panngalatengetan na saray ngipen yo sano nanengneng yoy Abraham tan Isaac tan Jacob tan amin a propeta diad panarian na Dios, balet sikayoy nibantak ed paway. 29  Niarum ni, onsabi iray totoo manlapud bandad bukig tan sagur, tan manlapud amianen tan abalaten, tan ondungo ra diad lamisaan ed panarian na Dios. 30  Tan nia! walaray unor a magmaliw ya unaan, tan walaray unaan a magmaliw ya unor.” 31  Diad saman ya oras et inmasingger ed sikato so pigaran Fariseo, a kuan da: “Paway ka la tan taynan ka dia, ta labay to kan pateyen nen Herodes.” 32  Et inkuan to ed sikara: “La kayo tan ibaga yo ed satan a masilib a kuyangen, ‘Papawayen ko iray demonyo tan mamaabig ak ed sayan agew tan nabuas, tan diad komatlon agew et sumpalen koy kimey ko.’ 33  Anggaman ontan, nepeg a manbiahe ak la natan tan nabuas tan diad ontumbok ya agew, lapud agnayarin pateyen so sakey a propeta diad paway na Jerusalem. 34  Jerusalem, Jerusalem, say managpatey na saray propeta tan managtupak na saramay nibaki ed sikato—aminpiga a labay kon tiponen komon iray anak mo a singa ed panitipon na nganak ed saray siwsiw to diad saray payak to, balet agyo labay! 35  Nia! Paulyanan la na Dios ed sikayo so abung yo. Ibagak ed sikayo, agyo ak lan balot nanengneng anggad ikuan yon, ‘Narayew imay onsasabi diad ngaran nen Jehova!’”

Paimanod leksab

Luc 13:4 * Literal, “utang.”
Luc 13:21 * Literal, “inyamot.”
Luc 13:24 * Literal, “mipuligesgesan.”
Luc 13:26 * Nengnengen so paimano ed leksab na Mat 6:5.