Lucas 2:1-52

2  Diad saraman ya agew et ingganggan nen Cesar* Augusto a kaukolan a manparehistro so amin a totoo,*  (agawa iyan unonan panagparehistro sanen say gobernador na Sirya et si Quirinio,)  tan nambiahe so amin a totoo pian manparehistro, kada sakey diad dilin syudad to.  Kanian, si Jose a walad Galilea, diad syudad na Nazaret, et linma met ed Judea, diad syudad nen David, a tatawagen a Betlehem, lapud sikatoy kabiangan na sankaabungan tan pamilya nen David,  pian manparehistro a kaiba nen Maria, a nagmaliw lan asawa to unong ya akisipanan to, tan magano lan mananak ed saman.  Sanen wadman ira, asabin siansia so agew na pananak nen Maria.  Tan inyanak toy anak to a laki, say panguloan, insan binalkot to na abel tan imparukol to ed atotong, lapud anggapoy kuarton napanpundoan da.  Diad saman met a lugar, walaray managpastol a manaayam ed kaumaan tan sanlabin manbabantay na saray pulok da.  Et inmalagey ed arap da so anghel nen Jehova, tan sinminag ed kaliberliber da so gloria nen Jehova, tan ataktakot iran maong. 10  Balet inkuan na anghel ed sikara: “Agkayo natatakot, ta nia! linma ak dia pian ipasabi ed sikayo so maong a balita a mangiter na baleg a liket ed amin a totoo, 11  lapud nianak ed sikayo natan ed syudad nen David so sakey a Manangilaban, say Kristo a Katawan. 12  Tan saya so panandaan yo: naromog yo so sakey ya ugaw ya abalkot na abel tan akarukol ed atotong.” 13  Kabekta et akiulop ed anghel so dakerakel nin anghel,* ya indaydayew da so Dios, a kuan da: 14  “Nigloria so Dios ed katawenan, tan diad dalin et niwala so deen ed saray totoon aabobonan to.” 15  Kanian sanen pinmawil la ed tawen iray anghel, inkuan na saray managpastol ed sakey tan sakey: “Onla tayo lan tampol sirin ed Betlehem tan nengnengen tayo iyan agawa ya impakabat ed sikatayo nen Jehova.” 16  Et magangganat iran linma tan aromog da si Maria tan Jose, tan say ugaw ya akarukol ed atotong. 17  Sanen anengneng da itan, impakabat da imay nibaga ed sikara nipaakar ed sayan ugaw. 18  Et nikelkelawan so amin ya akadngel ed saray bengatlan imbaga na saray managpastol, 19  balet tinandaan nen Maria irayan amin a salita, tan minorekdek to so kabaliksan na saraya. 20  Insan anempet la iray managpastol, ya inggloria tan indaydayew da so Dios lapud amin a bengatlan nadngel tan anengneng da, unong a nibaga ed sikara. 21  Natan sanen asabi lay mikawalon agew pian segaten so ugaw, sikatoy inngaran day Jesus, say ngaran ya imbaga na anghel sakbay a sikatoy nilukon. 22  Ontan met, sanen asumpal la iray agew parad pampalinis da unong ed ganggan nen Moises, sikatoy inawit da ed Jerusalem pian iparungtal da ed si Jehova, 23  ta unong a nisulat ed ganggan nen Jehova: “Amin a panguloan a laki et nepeg a masanto ed si Jehova,” 24  tan pian mangiyapay ira na bagat unong a nikuan ed ganggan nen Jehova: “Sankaparis a palekpek odino duaran sibong a malapati.” 25  Et nia! walay laki ed Jerusalem a manngaran na Simeon, tan sayan laki et matunong tan matakot ed Dios, ya aalagaren to so pakaligliwa na Israel, tan walad sikato so masanton espiritu. 26  Niarum ni, impaamta na Dios ed sikato ed panamegley na masanton espiritu a sikatoy agni ompatey anggad agto nanengneng so Kristo ya imbaki nen Jehova. 27  Tan diad pakayari na espiritu et sikatoy linmoob ed templo, tan sanen say ugaw nin Jesus et inloob ditan na atateng to pian gawaen da ed sikato so kakaukolanen na ganggan, 28  inawat to so ugaw diad saray taklay to tan indayew toy Dios tan inkuan to: 29  “Soberanon Katawan, aabuloyan mo la natan so aripen mo ya ompatey a mareen unong ed imbagam, 30  lapud anengneng ko lan mismo so usaren mon mangilaban 31  ya intaryam ed arap na amin a totoo, 32  sakey a liwawa a mangekal na sakbong ed saray nasyon tan kigloriaan na totoom ya Israel.” 33  Tan say ama tan ina na ugaw et nantultuloy a nikelawan ed saray nasasalita nipaakar ed sikato. 34  Ontan met, sikaray pinagalangan nen Simeon, balet inkuan to ed si Maria ya ina na ugaw: “Nia! Sikato so pansengegan na pakatumba tan ibangon lamet na dakel a totoo ed Israel tan sakey a tanda a sumpaen 35  (on, sakey ya andukey ya espada so ontalos ed mismon kamarerwam), ta pian ompatnag iray panagkatunongan na dakel a kapusoan.” 36  Natan et wadman si propetesan Ana, ya anak a bii nen Fanuel, ed tribu nen Aser (sayan bii et akulaw la, tan kayari na impiasawa to et pitoy taon labat ya akapiamong ed asawa to, 37  tan sikatoy abalo, a walomplo tan apat lay taon to), ya agbalot onsasaew ed templo tan agew-labin manlilingkor tekep na panag-ayunal tan masimoon a panagpikasi. 38  Diad saman a mismon oras et sikatoy sinmingger tan akisalamat ed Dios tan intongtong to so ugaw ed amin na saramay manatalaran ed kiliktar na Jerusalem. 39  Kanian sanen agawaan da la so amin a bengatla unong ed ganggan nen Jehova, pinmawil la ra ed Galilea diad mismon syudad da a Nazaret. 40  Tan say ugaw et nantultuloy a binmaleg tan binmiskeg, a napno na karunongan, tan nansiansia ed sikato so panangabobon na Dios. 41  Et niyugali la na atateng to so tinaon ya iyakar ed Jerusalem parad piesta na paskua. 42  Tan sanen labinduay taon to, linma ra ed piesta a singa dati lan gagawaen da 43  tan pinasumpal da itan. Balet sanen pasempet la ra, say ugaw a Jesus et tinmilak ed Jerusalem, tan ag-itan naimano na atateng to. 44  Lapud abaloan da a sikatoy kaiba ed ulop na saray manbiabiahe, sikaray akapanakar la na sanagew insan sikatoy inanap da ed saray kakanayon tan kabkabat da. 45  Balet, sanen sikatoy agda aromog, pinmawil ira ed Jerusalem, a sineetan dan inanap. 46  Tan kayari na taloy agew et sikatoy aromog da ed templo, ya akayurong ed pegley na saray managbangat, ya ondedengel ed sikara tan tetepetan to ra. 47  Balet amin ya ondedengel ed sikato et mankelkelaw ed pakatalos to tan ed saray ebat to. 48  Sanen anengneng da et abigla ra, tan inkuan ed sikato nen ina to: “Anak, akin ya oniay ginawam ed sikami? Aburido kami lan maong nen amam ed panaanap mi ed sika.” 49  Balet inkuan to ed sikara: “Akin et aanapen yo ak? Agyo ta amta a nepeg a wala ak ed abung nen Amak?” 50  Balet, agda atalosan iyan imbaga to ed sikara. 51  Tan sikatoy akila ed sikara a sinmempet ed Nazaret, tan nantultuloy a nampasakop ed sikara. Ontan met, amin irayan salita et tinantandaan nen ina to. 52  Et binmaleg si Jesus, tan nantultuloy ya inmaligwas ed karunongan tan lalon nanliketan na Dios tan saray totoo.

Paimanod leksab

Luc 2:1 * Odino, “say Emperador.”
Luc 2:1 * Literal, “say panaayaman a dalin.”
Luc 2:13 * Literal, “dakerakel ya armada ed tawen.”