Lucas 17:1-37
17 Insan inkuan to ed saray disipulo to: “Agnapaliisan ya onsabi iray pakatiroran. Ingen, pakaskasi la imay too a lapud sikato et onsabi iratan!
2 Mas maabig nin sabitan so beklew to na baton gilingan tan ibuntok ed dayat nen say natiror ed sikato so sakey ed sarayan angkekelag.
3 Manalwar kayo. No mankasalanan so agim, baat mo, tan no magbabawi, perdonam.
4 Anggano maminpiton mankasalanan ed sika ed loob na sanagew tan maminpiton ompawil ed sika, ya ikuan ton, ‘Magbabawi ak,’ nepeg mon perdonaen.”
5 Natan et inkuan na saray apostol ed Katawan: “Aruman moy pananisia mi.”
6 Et inkuan na Katawan: “No walaan kayoy pananisia a singa kamelag na bukel na mustasa, ibaga yo ed sayan kiew a sicamino,* ‘Nabagot ka tan ontanem ka ed dayat!’ tan ontulok itan ed sikayo.
7 “Siopa ed sikayo so walaan na aripen a manbabaka odino manpapastol na pulok a no onsabi manlapud uma et ibaga to ed sikaton, ‘Gala la dia, dungo ka ed lamisaan’?
8 Imbes, agta ibaga to ed sikaton, ‘Mangiparaan kay pangdeman ko, tan manpales ka tan serbian mo ak anggad nasumpal ak a mangan tan oninum, tan kayarik et nayarian mo lay mangan tan oninum’?
9 Makalikna kasi na utang na linawa ed aripen a nanggawa ed saray ingganggan to? Andin balot.
10 Kanian sikayo met, sano agawaan yo lay amin ya ingganggan ed sikayo, ibaga yon, ‘Ariripen kami labat ya andi-kakanaan. Say ginawa mi et nepeg mi labat a gawaen.’”
11 Legan a mamapaarap ed Jerusalem, sikatoy dinmalan diad pegley na Samaria tan Galilea.
12 Tan sanen onloob la ed sakey a baryo, sikatoy anengneng na samploran akating, balet akaalagey ira ya arawi ed sikato.
13 Tan inkasil day boses da, a kuan da: “Jesus a Managbangat, kasian mo kami!”
14 Tan sanen anengneng to ra, inkuan to ed sikara: “La kayo tan manpanengneng kayo ed saray saserdote.” Tan legan a wala la ni ra labat ed dalan, alinisan la ra.
15 Sanen anengneng na sakey ed sikara a sikatoy inmabig la, sikatoy pinmawil tan inggloria toy Dios ed maksil a boses.
16 Tan sikatoy dinmakmomo ed salian nen Jesus, tan akisalamat; sakey ni et sikatoy Samaritano.
17 Et inmebat si Jesus: “Agta samplora so alinisan? Kawalaan balet na saramay siamira?
18 Anggapo ta lay pinmawil a mangigloria ed Dios noag sayan too a nanlapud sananey a bansa?”
19 Tan inkuan to ed sikato: “Alagey ka tan la ka la; say pananisiam so amaabig ed sika.”
20 Balet sanen sikatoy tinepetan na saray Fariseo no kapigan so isabi na panarian na Dios, inebatan to ra: “Say isabi na panarian na Dios et aliwan maparungtal,
21 tan ag-ibaga na totoon, ‘Nengneng yo dia!’ odino, ‘Diman!’ Ta nia! say panarian na Dios et walad pegley yo.”
22 Insan inkuan to ed saray disipulo: “Onsabi so panaon sano pilaleken yon nanengneng so sakey ed saray agew na Anak na too balet agyo nanengneng itan.
23 Tan ibaga ed sikayo na totoo, ‘Nengneng yo diman!’ odino, ‘Nengneng yo dia!’ Agkayo oonla odino agyo ra tutumboken.
24 Ta no panon a say kirmat, a sano onkidyam et naliwawaan so sakey a kabiangan na tawen anggad sananey a kabiangan na tawen, ontan met so nagawa ed saray agew na Anak na too.
25 Balet, sikatoy nepeg a managmak ni na dakel ya irap tan ipulisay na sayan kailalakan.
26 Niarum ni, singa agawa ed saray agew nen Noe, ontan met so nagawa ed saray agew na Anak na too,
27 a saray totoo et nan-aakan tan naniinum, saray lalaki et angasawa tan saray bibii et akiasawa, angga ed agew a linmoob ed biong si Noe, tan sinmabi so delap ya aneral ed sikaran amin.
28 Ontan met, singa agawa ed saray agew nen Lot, saray totoo et nan-aakan, naniinum, nansasaliw, nanlalako, nantatanem, nampapaalagey.
29 Balet diad samay agew ya impaway nen Lot ed Sodoma et inmuran na apoy tan asupre manlapud tawen ya aneral ed sikaran amin.
30 Ontan met so nagawa diad satan ya agew sano omparungtal la so Anak na too.
31 “Diad satan ya agew, say toon walad toktok na abung et agla komon onleleksab pian alaen to iray nalibit a kagawaan to ed loob na abung, tan say toon walad uma et agto met la komon papawilen iray intilak ton kagawaan.
32 Nodnonot yo so asawa nen Lot.
33 Siopaman a malabay a mangisalba na kamarerwa to et nabalang to itan, balet siopaman a makabalang ed satan et niliktar to itan.
34 Ibagak ed sikayo, Diad satan a labi et duaran laki so wala naani ed saksakey a dukolan; say sakey et naala, balet samay sakey et natilak.
35 Wala naani duaran bii a manggigiling diad saksakey a gilingan; say sakey et naala, balet samay sakey et natilak.”
36* ——
37 Kanian inkuan da ed sikato: “Iner, Katawan?” Inkuan to ed sikara: “No iner so kawalaan na bangkay, diman met so pantitiponan na saray agila.”
