Injili mar Mariko 9:1-50

TUGE

Kaka kit Yesu ne olokore (1-13)
Ochang wuowi ma nigi jachien (14-29)
- Gik moko duto nyalore kuom ng’at ma nigi yie (23)
Okor tho mar Yesu kendo (30-32)
Jopuonjre yware e wi ng’at maduong’ie moloyo e kindgi (33-37)
Ng’at ma ok kwedwa en ng’atwa (38-41)
Gik ma kelo chwanyruok (42-48)
“Beduru gi chumbi e iu” (49, 50)

9 E wi mano, nokonegi kama: “Adier awachonu ni, nitie moko kuom jo ma ochung’ kae ma ok notho ka pok gineno Pinyruodh Nyasaye ka biro gi teko.”+ ² Ndalo auchiel bang’e, Yesu nokawo Petro gi Jakobo kod Johana, modhi kodgi e wi got moro mabor kar kendgi. Eka kit Yesu nolokore e nyimgi;+ ³ lepe nochako rieny, mi ne gibedo ma rachar ahinya moloyo kaka jalwok lewni moro amora ne nyalo miyo gibed ma rachar. ⁴ Bende, Elija kod Musa nofwenyorenegi, to ne giwuoyo gi Yesu. ⁵ Eka Petro nowacho ne Yesu niya: “Rabi, otimore maber ni wan kae. Omiyo, we wager hembe adek, achiel mari, achiel mar Musa, to machielo mar Elija.” ⁶ En adier ni ne ok ong’eyo gima dowachnegi nikech ne giluor ahinya. ⁷ Kendo bor polo nochokore moumogi, mi dwol moro+ nowuok e bor polono ka wacho niya: “Ma Wuoda ma ahero.+ Winjeuru.”+ ⁸ Eka apoya nono ne ok gineno ng’ato e kindgi kendo, mak mana Yesu. ⁹ Sa ma ne gia e got, nosiemogi matek ni kik giwach ne ng’ato gima ne gisenenono+ nyaka bang’ ka Wuod dhano osechier.+ ¹⁰ Ne giketo wachno e chunygi,* to pod ne giwuoyo e kindgi e wi tiend chierne a kuom jo motho. ¹¹ Ne gichako penje niya: “Ang’o momiyo jondiko wacho ni Elija+ nyaka bi mokwongo?”+ ¹² Nodwokogi kama: “Elija biro mokwongo mi oduok gik moko duto kaka ne gin.+ To ang’o momiyo ondik e wi Wuod dhano ni nyaka okal e sand mang’eny+ mi timne timbe mag achaya?+ ¹³ Kata kamano, awachonu ni, adier, Elija+ osebiro to ne gitimone kaka ne gidwaro mana kaka nondik kuome.”+ ¹⁴ Koro ka ne gibiro ir jopuonjre mamokogo, ne gineno oganda mang’ongo kolworogi kod jondiko ka mino kodgi wach.+ ¹⁵ Ka ne ogandano duto noneno Yesu, ne gimor kendo ne giringo ka gidhi ire mondo gimose. ¹⁶ Omiyo, nopenjogi niya: “En ang’o momiyo umino kodgi wach?” ¹⁷ Mi achiel kuom jo ma ne ni e ogandano nodwoke kama: “Japuonj, ne akelo wuoda iri nikech en gi jachien ma momo.+ ¹⁸ Sa asaya ma jachiendno omake, ogore piny kae to buoyo wuok e dhoge kendo omuodo lekene mi tekone rum. Ne akwayo jopuonjreni mondo gigole, to ne otamogi.” ¹⁹ Nodwokogi kama: “Yaye un tieng’ ma onge yie,+ anabed kodu nyaka karang’o? Abiro nano kodu nyaka karang’o? Kelnagouru kae.”+ ²⁰ Omiyo, ne gitero wuoyino ire, to ka jachiendno noneno Yesu, nomiyo nyathino ogwecho matek. Bang’ podho piny, nong’ielore ong’ielore kendo buoyo ne wuok e dhoge. ²¹ Eka Yesu nopenjo wuon wuoyino niya: “Ma osebedo ka time kuom ndalo ma romo nade?” Nodwoke niya: “Chakre tinne, ²² kendo nyading’eny ojawite e mach kata e pi kodwaro nege. To ka inyalo timo gimoro, kechwa kendo ikonywa.” ²³ Yesu nowachone kama: “Ang’o momiyo iwacho ni, ‘Ka inyalo’? Gik moko duto nyalore ne ng’at ma nigi yie.”+ ²⁴ Gikanyono, wuon nyathino nokok niya: “An gi yie! Konya kama aremie e yie!”+ ²⁵ Koro ka Yesu noseneno oganda ka reto kochomo irgi, nokwero jachiendno kama: “In jachien ma momo kendo ma ite odino, achiki ni iwuog ia kuome, kendo kik ichak idonj kuome!”+ ²⁶ Eka bang’ kok kendo gwecho nyading’eny, jachiendno nowuok kuome mi nyathino ne oling’ ka ng’at motho, kendo mano nomiyo thoth ji owacho kama: “Otho!” ²⁷ To Yesu nomako lwete mochunge malo. ²⁸ Omiyo, bang’ ka nosedonjo e ot moro, jopuonjrene nopenje kar kendgi niya: “Ang’o momiyo gole ne otamowa?”+ ²⁹ Nodwokogi kama: “Jachien ma chal kama nyalo mana wuok kuom lamo.” ³⁰ Ne giwuok kanyo mi gikalo e piny Galili, to ne ok gidwar ni ng’ato ong’e mano. ³¹ Nimar nopuonjo jopuonjrene kowachonegi kama: “Wuod dhano idhi ndhogi mi chiwe e lwet ji, kendo gininege,+ to kata konege obiro chier bang’ ndalo adek.”+ ³² Kata kamano, ne ok giwinjo tiend gima nowachono kendo ne giluor penje. ³³ Eka nodonjo Kapernaum. Koro ka ne en e ot nopenjogi kama: “Ang’o momiyo ne uywaru e yo?”+ ³⁴ Ne giling’ nikech ne gisebedo ka giyware ni ng’ano maduong’ moloyo e kindgi. ³⁵ Omiyo, nobet piny moluongo ji Apar Gariyoka kendo nowachonegi niya: “Ka ng’ato dwaro ni mondo otel, nyaka odwokre chien mogik kendo oti ne ji duto.”+ ³⁶ Eka nokawo nyathi moro matin, mi nochunge e diergi; kendo bang’ keto bedene kuome, nowachonegi kama: ³⁷ “Ng’at ma rwako achiel kuom nyithindo matindo+ kaka mae nikech nyinga, orwaka an bende; kendo ng’at ma rwaka, ok orwaka an kenda, to orwako bende Jal ma ne oora.”+ ³⁸ Johana nowachone niya: “Japuonj, ne waneno ng’at moro ka golo jochiende kotiyo gi nyingi, mi ne watemo geng’e nikech ok osebedo ka oluwowa.”+ ³⁹ To Yesu nowacho kama: “Kik utem geng’e nikech onge ng’at ma biro timo tich moro amora maduong’ e nyinga kae to mapiyo bang’e owacho gimoro marach kuoma. ⁴⁰ Nimar ng’at ma ok kwedwa en ng’atwa.+ ⁴¹ Kendo ng’at ma miyou pi mondo umodh nikech un mag Kristo,+ adier awachonu ni, ng’atno ok nolal pokne ngang’.+ ⁴² To ng’at ma chwanyo achiel kuom jo matindo ma keto yie kuomagi, dibed maber moloyo ka otue pong’ ma punda rundo e ng’ute kae to inyumego e nam.+ ⁴³ “Ka po ni lweti miyo ichwanyori, ng’ade oko. Ber mondo idonj e ngima ka irang’ol moloyo dhi gi lweteni ariyo e mach ma ok tho e Gehena.*+ ⁴⁴ *— ⁴⁵ To ka tiendi miyo ichwanyori, ng’ade oko. Ber mondo idonj e ngima ka in puth moloyo owiti e Gehena* ka in gi tiendeni ariyo.+ ⁴⁶ *— ⁴⁷ Kendo ka wang’i miyo ichwanyori, wite mabor.+ Ber mondo idonj e Pinyruodh Nyasaye ka in gi wang’ achiel moloyo owiti e Gehena* ka in gi wengeni ariyo,+ ⁴⁸ kama kute ok thoe kendo ok negie mach.+ ⁴⁹ “Nikech ng’ato ka ng’ato nyaka twon gi chumbi e mach.+ ⁵⁰ Chumbi ber, to ka chumbi olalo ndhadhu, ibiro ti kode e twono ang’o?+ Beduru gi chumbi e iu,+ kendo urit kuwe e kindu.”+