Injili mar Mariko 7:1-37
7 Koro Jo-Farisai kod moko kuom jondiko ma noa Jerusalem nochokore kolwore.+
2 Kendo ne gineno jopuonjrene moko ka chiemo gi lwedo ma ok ler, tiende ni, ma ok gilogo.*
3 (Nimar Jo-Farisai gi Jo-Yahudi duto ok chiem ka pok gilogo nyaka e okumbo nikech gimakore gi timbe kod chike mag jo machon,
4 kendo ka giwuok e chiro ok gichiem ka pok gilwokore. Nitie timbe mang’eny ma pod gimakorego, kaka batiso mag okombe, gi agulni, kod gik molos gi mula.)+
5 Omiyo, Jo-Farisai kod jondikogo nopenje niya: “Ang’o momiyo jopuonjreni ok luw timbe kod chike mag kwere, to gin gichiemo gi lwedo ma ok ler?”+
6 Nodwokogi kama: “Isaya ne ni kare ka nokoro wach kuomu un jo ma wuondore, kaka ondik ni, ‘Jogi miya luor mana gi dhogi to chunygi bor ahinya koda.+
7 Gilama kayiem nono nikech gipuonjo chike dhano ka gima gin chike Nyasaye.’+
8 Uweyo chik Nyasaye kae to umakoru gi timbe dhano.”+
9 E wi mano, nokonegi niya: “Ulony e ketho chik Nyasaye mondo umakru gi timbeu.+
10 Kuom ranyisi, Musa nowacho ni, ‘Luor wuoru gi meru,’+ kendo ni, ‘Ng’at ma yanyo wuon-gi kata min-gi to mondo onege.’+
11 To un uwacho ni, ‘Ng’at mowacho ne wuon-gi kata min-gi ni: “Kony ma dine iyudo kuoma en korban (tiende ni, mich mowal ne Nyasaye),”’
12 ok uyiene mondo ochiw kony ne wuon mare kata min mare.+
13 Kuom mano, utimo wach Nyasaye doko kayiem nono nikech timbeu kod chikeu ma usepuonjo jo ma oluwo bang’u,+ kendo utimo gik mang’eny ma chal gi mago.”+
14 Noluongo oganda ire kendo mowachonegi niya: “Chikuru itu uduto mondo uwinj tiend wach.+
15 Onge gima donjo ei dhano ma nyalo miyo obed ma ok ler; to gik ma wuok ei dhano e ma miyo dhano bedo ma ok ler.”+
16 *—
17 Koro ka nosedonjo e ot moro kama oganda ne ongee, jopuonjrene nopenje tiend ngerono.+
18 Omiyo, nowachonegi kama: “Un bende pok uwinjo tiend ngerono kaka gin? Ok ung’eyo ni onge gima donjo ei dhano ma nyalo miyo obed ma ok ler,
19 nikech ok odonj ei chuny, to odonjo e ich kae to igole oko e cho?” Omiyo, gima ne owacho en ni chiemo duto ler.
20 E wi mano, nowacho niya: “Gima wuok e i dhano e ma miyo dhano bedo ma ok ler.+
21 Nimar chuny dhano e ma paro+ maricho wuokie kaka: terruok,* kuo, nek,
22 chode,* ich-lach, timbe njore, wuond, tim wang’-teko,* ich-lit, ng’awruok, kod fuwo.
23 Gik marichogo duto wuok ei dhano kendo gimiyo obedo ma ok ler.”
24 Nowuok kanyo mi odhi e alwora mar Tiro gi Sidon.+ Kuro nodonjo e ot moro to ne ok odwar ni ng’ato ong’e mano, to ji nong’eyo.
25 Gikanyono, dhako moro ma nyare matin ne nigi jachien nowinjo wachne, mi nobiro mopodho piny e tiende.+
26 Dhakono ne en Nya-Grik moa* Sirofoinike; kendo nosiko kohombe mondo ogol jachien kuom nyare.
27 To nowachone kama: “Kwong iwe nyithindo oyieng’ mondi nimar ok en gima owinjore kawo chiemb nyithindo kendo witogi ne nyithi guogi.”+
28 Kata kamano, dhakono nodwoke niya: “Ee, ruoth, to e ma pod guogi manie bwo mesa bende chamoga ng’injo mag chiemb nyithindo.”
29 Eka nokone niya: “Nikech isewacho mano, dhiyo; jachiendno osewuok kuom nyari.”+
30 Omiyo, nowuok mi odhi dalane moyudo ka nyathi matinno onindo e otanda kendo jachien nosewuok kuome.+
31 Ka Yesu noduogo koa e alwora mar Tiro kodhi Nam Galili, nokalo Sidon gi alwora mar Dekapoli.*+
32 Kanyo ne gikelone ng’at moro ma ite odino kendo ma ok ne nyal wuoyo maler,+ mi ne gisaye mondo oket lwete kuome.
33 Notero ng’atno tenge eka noketo lith lwetene e ite. Nong’ulo olaw kae to omulo lew ng’atno.+
34 Mi nong’iyo malo e polo, mogamo muya matek kendo wachone niya: “Efatha,” tiende ni, “Yawri.”
35 Eka ite noyawore+ kendo lewe ne ogonyore, mi nochako wuoyo maler.
36 Bang’ mano, nochikogi matek ni kik gihul ne ng’ato wachno.+ To kaka nomedo chikogi, e kaka ne gimedo lando wachno moloyo.+
37 Kuom adier, ne gihum matamre gi nono+ mi giwacho niya: “Osetimo gik moko duto maber. Omiyo, kata mana jo ma itgi odino winjo kendo momni bende wuoyo.”+
Weche Moler Piny
^ Tiende ni, lwedo ma ok opwodh kaluwore gi tim Jo-Yahudi.
^ Som Apendiks A3.
^ E dho Grik en porneia. Som Tiend Weche.
^ E dho Grik, wach molok kae ni ‘chode,’ en sama dichwo kata dhako manie kend oterore gi ng’at ma ok jaode.
^ E dho Grik en aselgeia. Som Tiend Weche.
^ Kata, “monyuol Sirofoinike.”
^ Kata, “Gweng’ Moting’o Mier Apar.”
