Roma 12:1-21
12 Gani mga kauturan, tungod sa kaluoy sang Dios, nagapangabay ako sa inyo, nga ipresentar ninyo ang inyo lawas+ nga isa ka halad nga buhi, balaan+ kag kalahamut-an sa Dios. Sa sini nga paagi magahimo kamo sing sagrado nga pag-alagad nga ginagamit ang inyo ikasarang sa pagpangatarungan.+
2 Untati na ninyo ang pagpadihon sa mga dalanon sang katawhan sini nga sistema sang mga butang,* kundi bag-uha na ninyo ang inyo panghunahuna,+ agod mapamatud-an ninyo sa inyo kaugalingon+ kon ano ang maayo kag kalahamut-an kag himpit nga kabubut-on sang Dios.
3 Kay paagi sa wala tupong nga kaayo nga ginhatag sa akon ginasilingan ko ang tagsatagsa sa inyo nga indi kamo magpakataas sa inyo kaugalingon,+ kundi ipakita ninyo nga may maligdong kamo nga panghunahuna suno sa pagtuo nga ginhatag* sang Dios sa tagsatagsa sa inyo.+
4 Kay subong nga ang lawas may madamo nga bahin,+ apang indi pareho ang ginahimo sini nga mga bahin,
5 kita man isa ka lawas nga nahiusa sa Cristo bisan pa madamo kita, kag mga bahin man kita nga nagaalangot sa isa kag isa.+
6 Gani tungod sa wala tupong nga kaayo sang Dios, nanuhaytuhay nga mga dulot ang ginhatag niya sa aton,+ kon dulot ini sa pagpanagna, magpanagna kita suno sa pagtuo nga ginhatag sa aton.
7 Kon dulot ini sa pagministeryo, padayon nga himuon naton ini; ukon ang may dulot sa pagpanudlo, padayon nga magpanudlo.+
8 Ang may dulot sa paglaygay, padayon nga maglaygay;+ ang nagahatag,* padayon nga maghatag sing maalwan;+ ang nagadumala,* padayon nga maghimo sini sing maukod;*+ ang nagapakita sing kaluoy, padayon nga maghimo sini sing malipayon.+
9 Dapat indi salimpapaw ang inyo gugma.+ Kangil-ari ninyo ang malaut;+ magpanguyapot kamo sing malig-on sa maayo.
10 Sa pagpakita sing utudnon nga gugma magpinalanggaanay kamo. Sa pagpadungog sa isa kag isa, manguna kamo.+
11 Magmapisan* kamo, indi magtinamad.*+ Tungod sa balaan nga espiritu,+ magmakugi kamo. Magpaulipon kamo kay Jehova.*+
12 Magkasadya kamo tungod sa inyo paglaum. Batasa ninyo ang kabudlayan.+ Magpadayon kamo sa pagpangamuyo.+
13 Buligi ang mga balaan sa ila mga kinahanglanon.+ Mangin maabiabihon.+
14 Padayon nga magpangabay sa Dios nga pakamaayuhon ang mga nagahingabot sa inyo.+ Pangabaya ang Dios nga pakamaayuhon ang katawhan, kag indi sila pagpakamalauton.+
15 Magkasadya upod sa mga tawo nga nagakasadya; maghibi upod sa mga tawo nga nagahibi.
16 Tamda ang iban pareho sang pagtamod ninyo sa inyo kaugalingon. Indi paghunahunaa ang mataas nga mga butang,* kundi mangin mapainubuson kamo.+ Indi kamo magpakaalam sa inyo kaugalingon.+
17 Indi magbalos sing malaut sa malaut kay bisan sin-o.+ Himua ang maayo sa pagtamod* sang tanan nga tawo.
18 Himua ang masarangan ninyo sa pagpakighidait sa tanan nga tawo.+
19 Indi kamo magtimalos, mga hinigugma, kundi pabay-i nga ang Dios ang magpakita sang iya kaakig;+ kay nasulat na: “‘Akon ang pagtimalos; ako ang magabalos,’ siling ni Jehova.”*+
20 Apang “kon ginagutom ang imo kaaway, pakan-a sia; kon ginauhaw sia, hatagi sia sing mainom; kay sa paghimo sini mapahumok mo ang katig-a sang iya tagipusuon, nga subong bala nagatumpi ka sing masingkal nga mga baga sa iya ulo.”*+
21 Indi ka magpadaug sa malaut, kundi padayon nga dauga ang malaut paagi sa maayo.+
Footnote
^ Ukon “ginbahin.”
^ Ukon “nagaamot.”
^ Ukon “nagapanguna.”
^ Ukon “hanuot.”
^ Ukon “Magmaukod; Magmakugi.”
^ Ukon “Indi kamo mangin uyaya sa inyo hilikuton.”
^ Tan-awa ang Apendise A5.
^ Ukon “pagpalambua ang matinaastaason nga mga ideya.”
^ Ukon “panulok.”
^ Tan-awa ang Apendise A5.
^ Agod pahumukon ang tawo kag tunawon ang iya katig-a.
