Hem Pustok Kiteak Gorjechem

1-2. Ezekiel pustokantlean amkam Jehovachea nanva vixim kitem kollon ieta?

 HER kitea-i poros aplem nanv sogleam-von mhotvachem mhunn dakhounk Jehovan Ezekielak hem pustok borounk lailem. Tea pasot tantunt amkam 60-am poros chodd pavtti him utram vachunk mellttat: “Hanv Jehova mhunn tumkam vollkhon gheunk poddttolem.” (36:11) Toxench, tantunt 200 poros chodd pavtti Jehovan apunn “Akʼkhea Vixvacho Dhoni” oxem sanglam. Tor Ezekiel pustokantlean ami Jehovachem nanv ani to khoro Dev mhunn zannam zalʼlim taka zai mhunn kolltta. (36:22; 39:7) Toxench, Jehova korta tem soglem sarkem mhunn sogleamnim manun gheunk poddttolem mhunn tantuntlean kollon ieta. Ani oxem zata tednam tachea sevokank zaitim besanvam mellttolim.—34:25-28; 39:25.

² Tor “hanv Jehova mhunn tumkam vollkhon gheunk poddttolem” oxem mhunnon Jehova kitem sangonk sodhtalo? Hench ki soglea lokank manun gheunkuch poddttolem ki to Sorvpodvedar ani Vorto Raza zaun asa, toxench to jem kitem sangta tem sodanch purnn korta. Ezekielachea kallar jea Judevamnim Jehovacheo adnea pallunk nant, tankam tannem xist dili. Tednam tankam kollon ailem ki Jehova jem sangta tem to korta. (6:9, 10) Fuddarak pasun, je lok Jehovachea add voitat tancho to nas korta tednam Jehova sarko neai korta mhunn “tankam vollkhon gheunk poddttolem.” (25:17) Punn jim Jehovacho mog kortat ani taka visvaxi asat tankam to Sobit Bagent sasnachi khuxalkai ani xanti ditolo. Tednam Jehova jem bhasaita tem to purnn korta mhunn tankam kollon ietolem.—28:26.

3. Ezekiel pustokant bhasailʼlea Mesiasa vixim kosli mahiti dilʼli asa?

³ Ezekiel pustokant bhasailʼlo Mesias, zo David Razachea sonstintlo aslo, tache vixim bariksannen mahiti dilʼli asa. Udharonnak, Davidachem xinvason zaito temp poriant khali astolem. Punn uprant tea xinvasonar bosonk hokʼk asa to ietolo tednam, Jehova taka Raza mhunn nemtolo oxem bhasailʼlem. (21:27) Toxench apunn ‘eka gonvlleak, aplo sevok Davidak upzoitolo’ mhunn Jehovan bhas dilʼli. (34:23, 24) Ani heo bhasaunneo Davidachea sonstintlean ailʼlea, Jezu udexim purnn zaleo. (Lu 1:32, 33; Ju 10:11) Ezekiel pustokant anik zaiteo bhasaunneo asat, jea vorvim amcho bhavarth ghott zata.— Boks 26-A polloiat.

4. Ezekielan polloilʼlea dorxonant sorgar choltolea kamam vixim amkam kitem kollon ieta?

⁴ Jehovan Ezekielak dorxonam vorvim sorgar kitem cholta tem dakhoilem, jem munxam kednanch pollounk xokonant. Udharonnak, Jehovan taka ek vhoddlem roth dakhoilem, jea udexim sorgar kitlim ojapachim kamam choltat, devdut koxe manddavollin kam kortat ani Jehovachem margdorxon rokddech apnnaitat tem Ezekielak dison ailem. (1:15-28) Tea bhair devdut, khas korun kerub koslim kamam kortat tem taka dakhoilem.—1:4-14; 10:3-22; 11:22.

5. Ezekiel pustokant amkam Jehova vixim kitem xikonk melltta?

⁵ Ezekiel pustokant Jehovachi doia ani kakut dison ieta. Izraelitkaramnim Jehovache dorje pallunk nant, tor tancher ragar zaunk Jehovak karonn aslem. (22:26, 31) Torui, tannem tankam doia dakhoili. Tem mhunnttlear, tanchea vaitt kamancho kitem porinnam zatolo tem tankam sanglem ani tannim poschatap kelo zalear to tankam bhogxitolo mhunn bhas dili. (3:17; 33:14-16) Jehovan tankam kakut pasun dakhoili. Tem mhunnttlear, tankam koidi korun vhelea uprant pasun to tanchi kallji gheit ravlo. Khorem mhunnttlear, jim raxttram tankam tras kortalim tancho to nas kortolo mhunn tannem sanglem. (25:6, 7) Itlench nhoi, to aplea lokank porot Jeruzalemant haddttolo ani tankam besanvam ditolo mhunn bhas dili.—36:37, 38.

6. Ezekiel pustokant amkam koslim moladik lisanvam xikonk mellttat?

⁶ Ezekiel pustokant amkam moladik lisanvam pasun xikonk mellttat. Zoxem poilem, ami dor eklim amchea kamancho hixob Jehovak diunk zai. a (18:30) Dusrem, ami jem kitem kortat tea vorvim Jehovak ani tachea nanvak man mellonk xokta vo opman zaunk xokta. (6:9; 20:39) Ani tisrem, ami Jehovak kallzantlean man ditat ani taka manvota tea toren tachi bhokti kortat tednam ami jiet ravonk pavtolim.—18:5-9.

Pustok Vachʼchea Poilim Hem Zannam Zaiat

7. Ezekiela vixim amkam kitem khobor asa?

⁷ Boroupi: Provadi Ezekielan hem pustok boroilʼlem. Ezekielachea nanvacho orth asa “Dev Ghottai Dita.” To ghoddie sumar 643 K.X.A.-ant zolmolʼlo, ani tacho bapui Jeruzalemant iadnik mhunn seva kortalo. (1:3) 617 K.X.A.-ant, Ezekiel sumar 26 vorsancho aslo tednam, taka toxench Jeruzalemant aslolea zaitea zannank Babilonant koidi korun vhelʼlim. Karonn Jehoiakin Razan apleak Nebukadnezarachea adhin kelʼlo. (2Ra 24:11-15) 613 K.X.A.-ant, Ezekiel sumar 30 vorsancho aslo tednam Jehovan taka provadi mhunn nemlo. (1:1, 2; 2:3) Ezekiel provadi mhunn seva kortalo teach vellar Daniel pasun Babilonant provadi aslo. Toxench Obadia ani Jeremias Judant provadi mhunn seva kortale.

8. Ezekiela vorvim Jehovan konnank sondex dilʼlo?

⁸ Pustok boroilʼlem tednam kitem ghoddttalem: Ezekielan sanglolo sondex, Jeremias ani Danielachea sondexa sarko aslo. Jehovan ho sondex Babilonant koidi korun vhelʼlea Judev lokam pasot dilʼlo. (3:4, 5;  Boks 26-B polloiat.) Ezekiel ani thodde koidi Jeruzalemacho nas zaunchea poilim Babilonant aile, ani her koidi Jeruzalemacho nas zalea uprant aile.

9. Judev lok kitem zannam zalʼle Jehovak zai aslem?

⁹ Jehovan Ezekielak uzar korun Babilonant koidi aslolea Judevank tancheo vatto bodlunk modot keli. Zoxem, tannim khottea devanchi bhokti kelʼli ani Jehovachea nanvacho opman kelʼlo dekhun tankam koidi korun vhelʼlim mhunn Jehovan Ezekielak sangonk lailem. Tannim Jehovachi adnea pallunkuch zai ani taka manvota tea toren tachi bhokti korunkuch zai hem tim zannam zalʼlim Jehovak zai aslem. Ezekiel provadi mhunn seva korunk laglo tednam, Jehovan taka Jeruzalemacho nas zatolo mhunn sangonk lailem. Karonn Izraelitkaram vaitt kamam kortalim dekhun Jehovak khub rag ailʼlo. Punn Jeruzalemacho nas zalea uprant, Izraelitkaram porot Jeruzalemant ieun apleak manvota tea toren apli bhokti kortolim mhunn Jehovan Ezekiela vorvim tankam bhorvonso dilo. Thoddea Judevamnim Ezekiel sangtalo tachi beporva keli, punn thoddeamnim tem manun ghetlem.

10. Ezekielan aplem pustok koxe toren boroilam?

¹⁰ Anik mahiti: Ezekiel pustok vixoi-a pormonnem ani eka-fattlean-ek khoincheo ghoddnneo ghoddleo tea pormonnem boroilam. Jehovan apleak provadi mhunn nemlo tea vixim boroilea uprant, Ezekielan tem pustok hea tin bhagamnim boroilam: (1) Jeruzalemachea nisonttona vixim sondex, (2) Jehova dusman raxttrank xikxa ditolo to sondex, ani (3) Izraelitkarank Jeruzalemant haddun khori bhokti porot suru korchea vixim sondex. Tea bhair 617 K.X.A.-ant, Jehoiakin Razak Babilonant koidi korun vhelo tea ghoddnne thaun, Jehovan dilʼlo sondex khoinchea vorsak, mhoineak ani disak dilʼlo tem Ezekielan sanglem.—2It 36:9, 10; Ez 1:2;  Boks 26-C polloiat.

11. Jehovan Ezekielak kitem korunk sanglem, ani kiteak?

¹¹ Jehovan Ezekielak zaite pavtti to sangtalo to sondex korun dakhounk lailo. Udharonnak, Jehovan taka ek vitto gheun zaite dis tachea mukhar add poddonk lailo. Toxench anik ek pavtt, Jehovan taka tachem khadd ani tokleche kens tasunk sanglem, tachem saman bandun tem gheun cholonk lailo, ani don boddio sangata zoddunk laileo. (4:1-4; 5:1-4; 12:3-7; 37:15-17) Jehovan taka him vegllech torechim kamam kiteak korunk sanglim? Ek karonn mhunnttlear, to hem kiteak korta tem lokamnim zannam zalʼlem Jehovak zai aslem.—2:5.

Hem Pustok Thoddeach Utramnim

12. Ezekielak provadi mhunn nemlo tednam tannem kitem polloilem?

¹² Jehova Ezekielak provadi mhunn nemta. (1:1–3:27) 613 K.X.A.-ant, Ezekielak “Deva thaun dorxonam disonk laglim,” ani sorgar kitem cholta tem tannem polloilem. (1:1) Tannem char jive pranni polloile, je kerub asle mhunn taka uprant kollon ailem. (10:20) Toxench, tannem ek vhoddlem roth ani porzolltta toslo uzvadd polloilo, zo “Jehovachea mhoime bhaxen distalo.” (1:28) Uprant Jehovan Ezekielak rakhonndar ani provadi mhunn nemlo. (2:3) Ani lok aikom vo na aikom, Ezekielan visvaxiponnan tankam xittkaunk zai aslem, na zalear to mortolo aslo.—3:17-19.

13. Jeruzalemantlea lokanchem ani tea xarachem kitem zatolem tem Ezekiel koso dakhoita?

¹³ Jeruzalemant aslolea ovisvaxi lokancho ani tea xaracho nas zatolo mhunn Ezekiel bhasaita. (4:1–24:27) Jehova Ezekielak ek vitto gheun lokank dakhounk laita ki soinik Jeruzalem xaracher akromonn kortole ani lokank jevnnachem unnemponn astolem. (4:1-3, 10) Toxench, Jehova Ezekielak tachem khadd ani tokleche kens tasunk laita ani tachem kitem korchem tem sangta. Hea vorvim Jeruzalemacho ani thoim ravtolea lokancho koso nas zatolo tem kollon ieta. (5:1, 2) Uprant, Izraelitkaram murti-puza kortalim dekhun apunn ekdom ragar asa ani tankam xikxa ditolo mhunn Jehova Ezekielak sangonk laita.—6:1-4.

14-15. Jeruzalema vixim Jehova kitem bhasaunni korta?

¹⁴ 612 K.X.A.-ant, Jehova Ezekielak ek dorxon dita. Tantunt Jeruzalemant zatat teo vaitt vostu Ezekielak pollounk mellttat. (8:1-3) Uprant to eka munxak polloita, zo tea vaitt vostunk lagon dukh kortat tanchea koplar ek khunna kaddtta. Magir thodde dadle ieun khunna naslolea lokank jivexim martat. (9:1-6) Tor apunn Izraelitkarank xikxa ditolo mhunn Jehova Ezekielak spoxttponnim kolloita. (11:9, 10) Punn teach borabor, to aplea lokank porot Jeruzalemant haddttolo mhunn bhasaita.—11:17.

¹⁵ Judevank koidi korun vhortole mhunn dakhounk Jehova Ezekielak tachem saman bandunk laita. (12:3-7) Uprant to taka Izraelachea khottea provadeam add bhasaunni korunk sangta. (13:2) Toxench, Babilonant aslole Judev vhoddil tache lagim ulounk ietat tednam, Jeruzalemachem nisontton konnuch addaunk xokchona mhunn to Ezekielak sangonk laita.—14:1, 14.

16-18. Jehova koslim udharonnam uzar korta?

¹⁶ Jehova Jeruzalemacho kiteak nas kortolo tem sangonk zaitim udharonnam dita. To Jeruzalemak eka drakxanchea valichea lakddak sor korta, jem ujeant zollounchea xivai kiteakuch upkarona. Toxench, to taka eke bailek sor korta. Ticho ghov ticho khub mog korta, punn ti taka soddun xindollki korta. (15:6; 16:3, 8, 28) Magir to ek umannem sangta ani Zedekia Razak eke drakxanchea valik sor korta ji sukon voitoli. (17:7, 9, 12) Torui, dor eka munxachea kamam pormonnem tacho neai zatolo ani nitivont asat tancho jiv salvar zatolo mhunn sangon Jehova Izraelitkarank bhorvonso dita. (18:20-22) Uprant Jehova Ezekielak Judachea razam vixim ek dukhachem git gaunk laita.—19:1, ftn.

¹⁷ 611 K.X.A.-ant, Judev vhoddil porot Ezekiela lagim ulounk ietat. (20:1) Tednam Izraelitkaramnim zaite pavtti Jehovacheo adnea moddleat mhunn Jehova Ezekielak sangonk laita. Jehova tea noxttea raxttracho nas kortolo mhunn sangta, punn tankam bhorvonso-i dita. “Mukutt mellonk kaidea pormonnem zaka hokʼk asa” to ietolo tednam, Jehova taka razvottki ditolo mhunn to sangta. (21:27) Uprant Jeruzalemant aplo lok korta tea soglea vaitt kamam vixim Jehova sangta. Ani to Samariek ani Jeruzalemak, Ohola ani Oholibak sor korta. Heo don bhoinno xindollki korunk lagleo. Samaria, ji Izraelachea dha kullanchi rajdhani asli, ticho nas zalʼlo. Ani atam Jeruzalemacho nas zauncho aslo.—Ez 23:4; Je 3:6-8 sor korat.

¹⁸ 609 K.X.A.-ant, Babilonachea razan ani tachea soinikamnim Jeruzalemak gherav ghatla mhunn Jehova Ezekielak sangta. (24:1, 2) To Jeruzalemak kollom laglolea randpachea aidonak sor korta, jem ujeant uddounk zai. (24:6, 12) Babilon Jeruzalemak gherav ghalta tea disa Ezekielachi bail morta ani Jehova taka tichea pasot dukh korinaka mhunn sangta.—24:16, 18.

19-20. Jehova khoinchea raxttrank xikxa ditolo mhunn sangta, ani kiteak?

¹⁹ Jeruzalemacho nas zalo mhunn jim raxttram khuxal zalim tancher Jehova zhoddttechem formonn marta. (25:1–32:32) Jehova sangta ki to Amon, Moab, Edom ani Filistiak xikxa ditolo. Uprant 607/606 K.X.A.-ant, to Tir ani Sidonacher zhoddttechem formonn marta. Toxench, Ezekielak Tira vixim dukhachem git gaunk laita.—26:3; 27:1, 2; 28:22.

²⁰ Odheai 29-32-ant, Ejipttachem kitem zatolem tem sanglam. 607 ani 591 K.X.A. modem apunn Ejipttak xikxa ditolo ani Babilon Ejipttacher akromonn kortolem mhunn Jehova Ezekielak porot-porot sangonk laita.

21-22. Ezekielachea khoinchea bhasaunneank lagon Izraelitkarank bhorvonso ani bhuzvonn melltta?

²¹ Jeruzalemacho nas zatolo, punn Izraelitkaram porot thoim ieun Jehovachi bhokti kortolim mhunn Ezekielan bhasailem. (33:1–48:35) Ezekiel rakhonndar zalʼlean tachi zobabdari kitem asli tem Jehova tachea ugddasak haddtta. (33:7) 607 K.X.A.-ant Jeruzalemacho nas zata, ani ghoddie teach vorsa tantuntlean vanchlolo ek munis Ezekielak tea vixim kolloita. b (33:21) Tednam Ezekiel Babilonant koidi aslolea Judevank sangta ki Judachea urlolea xarancho nas zaunchona oxem tannim chintchem nhoi. Uprant Jehova sangta ki to Izraelachea khottea gonvlleancher khub ragar asa. Karonn tannim tachea lokancho bore toren samball korunk na. Tea pasot, apunn svota aplea menddranchi kallji ghetolo ani ‘tancher eka gonvlleak, mhunnche aplo sevok Davidak upzoitolo’ mhunn Jehova bhas dita.—34:23.

²² Ezekiel sangta ki Edomachea lokancho nas zatolo, karonn tim Izraelitkarancho dves kortalim. (35:5, 15) Jehova bhas dita ki Izraelitkaram porot Jeruzalemant ietolim. (36:8) Ezekiel eka falkeachem dorxon polloita zantunt suklolim haddam jivim zatat. (37:2, 10) Uprant, Jehova Ezekielak don boddio sangata zoddunk laita. Karonn Juda ani Benjaminachim don kullam, toxench Izraelachim dha kullam (Efraim) ek raxttr zatolem mhunn to dakhounk sodhta.—37:19.

23-24. Gog Izraelacher akromonn kortolo tednam Jehova kitem kortolo, ani Ezekiel koslem dorxon polloita?

²³ Gog Izraelacher akromonn kortolo mhunn Ezekiel bhasaita. (38:14-16) Punn Jehova aplea lokam pasot zhuztolo ani Gog ani tache foujecho nas kortolo mhunn sangta. Toxench, to aplea lokank porot Jeruzalemant haddun tim tachi bhokti kortolim tednam, to aplem nanv povitr kortolo mhunn Jehova sangta.—39:25.

²⁴ 593 K.X.A.-ant Jehova Ezekielak eka dorxonant Izraelant haddtta. (40:1) Thoim Ezekiel ek vhoddlem Devmondir polloita ani ek munis Devmondiracho dor ek bhag mezta tem polloita. Tem Devmondir Jehovache mhoimen bhorta. Jehova Ezekielak bolidanam, iadnikanchim kamam, ani zomin koxi vanttchi tea vixim nirdexon dita. Tea Devmondirantlean ek nodi vhanvta tem Ezekiel polloita. Uprant, Jehova Izraelachea 12 kullank tanchem daiz dita ani tea xarachem nanv, “Jehova Thoim Asa” mhunn Ezekielak kolltta. (48:35) Hea dorxona udexim Jehova Ezekielak sangonk sodhta, ki tachea sevokamnim tachea nitivont dorjeam pormonnem tachi seva korunk zai. Toxench hea dorxona udexim, Babilonant koidi aslolea Judevank tim porot Jeruzalemant ieun Jehovachi bhokti kortolim mhunn khatri mellʼlli.— Boks 26-D polloiat.