Ezekiel 17:1-24
17 Jehovacho sondex porot ek pavtt mhaka mellʼllo. Tannem mhunnttlem:
2 “Munxachea puta, Izraelachea ghorannea vixim ek umannem ghal ani ek mhunnʼnni sang.
3 Tum tankam sang, ‘Akʼkhea Vixvacho Dhoni Jehova oxem mhunntta: “Vhoddle-vhoddle ani lamb pakhotte asloli, toxench veg-vegllea rongachim bhorpur pakham asloli ek vhoddli ghonn Lebanonant aili, ani cedar* zhaddachi sogleant voili kombri moddun gheun geli.
4 Tinnem tea zhaddachi sogleant voili kombri moddli ani ti gheun veapareanchea desant* geli ani veapareanchea xarant ti laili.
5 Uprant tinnem desantlem thoddem bim ghetlem ani tem eka pikall xetant roilem. Nhoim-chea deger zata tea zhadda* bhaxen tinnem tem roilem.
6 Uprant tem bim kirlolem ani drakxanchi ek val zali, ji zomnir sogleak posronk lagli. Tachim panam bhitorlea vatten aslim ani tachim mullam zomni ponda vaddot gelim. Hea toren, tea bim-am thaun ek drakxanchi val zali ani tika fantte funttle ani khande ieunk lagle.
7 “‘“Uprant, vhoddle pakhotte ani pakham asloli anik ek ghonn aili. Drakxanchea valin ghonnik polloili tednam tinnem axeun aplim mullam tiche vatten posrailim. Hi val jea bagent lailʼli thoim thaun tinnem aplim mullam pois tea ghonni vatten posrailim ani tea ghonnin tika ximpchi mhunn aplim panam ani khande tachea vatten posraile.
8 Hea drakxanchea valik khande ieunche, tika follam zaunchim ani ti ek khub vhoddli val zaunchi mhunn tika poilim thaunuch bhorpur udok aslolea zomnicher roiloli.”’
9 “Tum lokank oxem sang, ‘Akʼkhea Vixvacho Dhoni Jehova oxem mhunntta: “Hea valik follam-fulam zatolim kai? Tichi kombri sukon voichi mhunn ani tichim follam kuson voichim mhunn, konn tori ieun tichim mullam umttun kaddchona kai? Ti itli suktoli ki tika umttun kaddunk eka ghott hatachi vo zaitea lokanchi goroz poddchina.
10 Punn tika asa thoim thaun kaddun dusrea zagear laili zalear pasun tika follam-fulam ietolim kai? Udentechem varem ticher martolem tednam ti purnn toren sukchina kai? Jea bagent ti kirloli tea bagent ti suktoli.”’”
11 Jehovacho sondex porot ek pavtt mhaka mellʼllo. Tannem mhunnttlem:
12 “Upkar korun tea odhikara add vochpi ghoranneak sang, ‘Tumkam hea vostuncho orth somzolo kai?’ Tum tankam sang, ‘Polloi! Babilonacho raza Jeruzalemant ailo, ani to tachea razak ani kunvrank aplea sangata Babilonant gheun gelo.
13 Uprant tannem razachea ghoranneantlea sonsti* thaun ekleak gheun, tachea sangata ek korar kelo ani taka ek soput gheunk lailo. Magir to desantlea khas munxank aplea sangata gheun gelo.
14 Tem raj sokol poddchem ani porot kednanch voir sorchem nhoi, toxench fokot aplo korar pallunuch tem raj ostitvant urchem mhunn tannem oxem kelem.
15 Punn xevottak Jeruzalemacho raza tachea add gelo. Ani tannem Ejiptta koddlean ek vhoddli fouz ani ghodde magon haddche mhunn aplea sondexkarank Ejipttant dhaddle. Taka ies mellttolem kai? Oslim kamam korpi khastintlean vanchtolo kai? Korar moddun pasun to vanchonk xoktolo kai?’
16 “‘Akʼkhea Vixvacho Dhoni Jehova mhunntta, “Hanv mhojea jivacho soput gheun sangtam, to Babilonantuch mortolo. Jea razan* taka* raza kelʼlo, zacho soput tannem kainch valor naslolea bhaxen lekhlo ani zacho korar tannem moddlo, tea razachea desant to mortolo.
17 Lokank marunk dusman durgam bhonvtonnim choddtti toiar kortole ani durig ubem korun gherav ghaltole tednam, Faraoh-chi vhoddli fouz ani soinikanche zome kainch faideache aschenant.
18 Tannem ek soput kainch valor naslolea bhaxen lekhlo ani ek korar moddlo. Tannem utor diun pasun heo sogleo vostu keleo, dekhun to salvar zaunchona.”’
19 “‘Taka lagon, Akʼkhea Vixvacho Dhoni Jehova oxem mhunntta: “Hanv mhojea jivacho soput gheun sangtam, tannem mhojea soputak kainch valor naslolea bhaxen lekhla ani mhozo korar moddla dekhun, hanv taka khast ditolom.
20 Hanv tacher mhojem zall uddoitolom ani to tantunt sampoddttolo. Hanv taka Babilonant haddttolom ani to mhojea sangata ovisvaxiponnan vagla dekhun thoim hanv tachea add kes zhogoddttolom.
21 Tachea soinikanchea zomeantle pollon gelʼle sogle munis tolvarin mortole ani vanchon urtat te soglea vattamnim* ximpoddttole. Tednam hanvem Jehovan svota hem sanglam mhunn tumkam vollkhon gheunk poddttolem.”’
22 “‘Akʼkhea Vixvacho Dhoni Jehova oxem mhunntta: “Hanv tea cedar* zhaddacho sogleant voilo fantto ghetolom ani to roitolom. Hanv tea zhaddachea sogleant voilea khandeam voili ek torni kombri ghetolom, ani hanv svota eka vhodd ani unch porvotar ti laitolom.
23 Hanv Izraelachea eka unch porvotar ti laitolom, tiche khande khub vaddttole, tika follam zatolim ani ti ek vhoddlem cedar zhadd zatoli. Tichea ponda soglea torechim suknnim ravtolim ani tichea khandeanche savllent visov ghetolim.
24 Tednam desantlea soglea zhaddank vollkhon gheunk poddttolem ki hanvem Jehovanuch tea unch zhaddak sokol haddlem ani dhakttea zhaddak voir kaddlem, hanvenuch hirvea zhaddak sukoilem ani suklolea zhaddak hirvea panamnim bhorlem. Hanvem Jehovan svota hem sanglam ani tem kelam.”’”
Footnotes
^ Vo “devdar.” Eke torechem vhoddlem zhadd.
^ Utran utor, “Kanan desant.”
^ Mhunnche, ek oslem zhadd zaka lamb khande, toxench lamb ani oxir panam astat. Inglez bhaxent taka “willow” mhunnttat.
^ Utran utor, “bie.”
^ Mhunnche, Nebukadnezar.
^ Mhunnche, Zedekia.
^ Utran utor, “soglea varear,” mhunnche, varem marta tea dor eke vatten.
^ Vo “devdar.” Eke torechem vhoddlem zhadd.
