Ezekiel 46:1-24
46 “Akʼkhea Vixvacho Dhoni Jehova oxem mhunntta: ‘Bhitorlea angnnantlo udente vatten fuddo korun aslolo darvontto, kamache sov dis poriant bond asonk zai. Punn Sabathachea ani novea chondrimachea* disa to ugddunk zai.
2 Mukheli darvontteachea bolkanvachea bhailea vatten thaun bhitor ietolo, ani darvontteachea khambea lagim ubo ravtolo. Iadnik tachi hulpailʼli bhett ani xantichim bolidanam bhettoitolo. Tea uprant, mukheli darvontteachea umbrea lagim bagovtolo* ani magir bhair voitolo. Punn darvontto sanz zai meren bond korcho nhoi.
3 Desantle lok pasun, darvontteantlean bhitor sortat thoim, Sabathachea disamnim ani novea chondrimachea* disamnim Jehova mukhar bagovtole.
4 “‘Sabathachea disa mukheli Jehovak bhettoitolo ti akʼkhi hulpailʼli bhett, khot naslolea sov menddurleanchi ani khot naslolea eka menddreachi asonk zai.
5 Tea menddrea sangata to ek efa* daneachi bhett ditolo, ani menddurleam sangata to diunk xokta titlem ditolo. Teach borabor, dor eka efa sangata to ek hin* tel ditolo.
6 Novea chondrimachea* disa to hinddantlea khot naslolea eka boilachi, sov menddurleanchi ani eka menddreachi bhett ditolo. Him soglim khot naslolim asonk zai.
7 Tannem tornattea boila sangata ani menddrea sangata ek-ek efa daneachi bhett bhettounchi, ani menddurleam sangata tachean bhettounk zata titlem bhettounchem. Dor eka efa sangata tannem ek hin tel bhettounchem.
8 “‘Mukheli bhitor sorta tednam, tannem darvontteachea bolkanva vatten bhitor sorchem ani teach vatten bhair voichem.
9 Ani porbam vellar, desantle lok Jehovachi bhokti korunk tachea mukhar ietat tednam, je lok utʼtorechea darvontteantlean bhitor ietat tannim dokxinnechea darvontteantlean bhair voichem, ani dokxinnechea darvontteantlean bhitor ietat tannim utʼtorechea darvontteantlean bhair voichem. Apunn bhitor aileat tea darvontteantlean konnench bhair voichem nhoi, punn jea darvontteantlean te bhitor aileat, tachea mukhar aslolea darvontteantlean tannim bhair voichem.
10 Ani lokam modem aslolea mukhelean, lok bhitor ietat tednam bhitor ieunchem ani lok bhair voitat tednam tannem bhair voichem.
11 Tharailʼlea porbam vellar ani dusrea porbam vellar, tornattea boila sangata ani menddrea sangata ek-ek efa daneachi bhett bhettounchi, ani menddurleam sangata tachean bhettounk zata titlem bhettounchem. Dor eka efa sangata tannem ek hin tel bhettounchem.
12 “‘To mukheli, Jehova pasot khuxen haddloli bhett mhunn, ek hulpailʼli bhett vo xantichim bolidanam dita zalear, udente vatten fuddo korun aslolo darvontto tachea pasot ukto kortole, ani Sabathachea disa to korta toso to apli hulpailʼli bhett ani xantichim bolidanam ditolo. To bhair soron gelea uprant, tachea fattlean to darvontto bond korunk zai.
13 “‘Ek hulpailʼli bhett mhunn tunvem dor disa, ek vorsacho khot naslolo menddurlo Jehova pasot diunk zai. Hem tunvem dor sokallim korunk zai.
14 Tachea sangata, dor sokallim daneachi bhett mhunn tunvem efacho sovʼvo vantto diunk zai, ani tachea sangata borea pittacher ximpddaunk ek hin telacho tisro bhag diunk zai. Hi Jehova pasot sodanch ditat tosli daneachi bhett mhunn urtoli. Ho kaido sodankal urtolo.
15 Tannim menddurlo, daneachi bhett ani tel, sodanch ditat tosli hulpailʼli bhett mhunn dor sokallim diunk zai.’
16 “Akʼkhea Vixvacho Dhoni Jehova oxem mhunntta: ‘Eka mukhelean aplea dor eka putak daiz mhunn ek dennem dilem zalear, tem tachea putanchem zatolem. To tankam mellʼllolo daizacho vantto zatolo.
17 Punn tannem aplea eka sevokak aplea daizantlem ek dennem dilem zalear, suttkechea vorsa meren tem tea sevokachem astolem. Tea uprant, tem porot tea mukheleak mellttolem. Fokot tannem aplea putank dilʼlem daiz, sodankal tanchem zaun urtolem.
18 Mukhelean, lokank tanchea zomni voile dhanvddaun, tancho khoinchoch daizacho vantto zobordosten gheuncho nhoi. Tannem aplea putank, aplo svotacho zomnicho vantto daiz mhunn diuncho, jea vorvim mhojea lokam modlea konnankuch tachea zomni voilo dhanvddaun ghatlolo aschona.’”
19 Uprant to mhaka tea darvontteanchea lagim aslolea bhitor sorchea vattentlean gheun ailo. To darvontto utʼtore vatten fuddo korun aslolea iadnikanchea jevpachea povitr rumam lagim voitalo. Thoim hanvem fattlean ostome vatten ek zago polloilo.
20 Tannem mhaka mhunnttlem: “Ho to zago, zoim iadnik farikponnachi bhett ani patka pasot bhett xizoitole, ani zoim te daneachi bhett bhaztole, jea vorvim khoinchich vost bhailea angnnant vhorchenant ani lokank povitrtai posorchina.”
21 Uprant to mhaka bhailea angnnant gheun ailo, ani tannem mhaka angnnachea charui konnxeamnim bhonvddailo. Bhailea angnnachea dor eka konnxear hanvem ek angonn polloilem.
22 Tea angnnachea dor eka konnxear lhan angnnam aslim, jim 40 hat* lamb ani 30 hat rund aslim. Tim charui angnnam ekach zokhachim aslim.*
23 Tachea charui vatten lhan durgam aslim, ani tanchea bhitor bolidanam xizounk chuli bandloleo asleo.
24 Uprant tannem mhaka mhunnttlem: “Him tim ghoram zaun asat, zoim Devmondirache sevok lokamnim haddlolim bolidanam xizoitale.”
Footnotes
^ Vo “omaxechea.” Chondrimacho lhanso bhag disonk suru zata to dis.
^ Vo “sorpottʼttolo.”
^ Vo “omaxechea.” Chondrimacho lhanso bhag disonk suru zata to dis.
^ Mahiti B14 polloi.
^ Mahiti B14 polloi.
^ Vo “omaxechea.” Chondrimacho lhanso bhag disonk suru zata to dis.
^ Hem lamb hatachea mapak suchit korta. Mahiti B14 polloi.
^ Vo “Tim charui, ani tanchea konnxeanche akar ekach zokhache asle.”
