Ezekiel 42:1-20
42 Uprant to mhaka bhailea angnnant utʼtore vatten gheun gelo. Ani tannem mhaka jevpache rum asle tea bilddingent haddlo. Hem bildding uktea zagea lagim, ani taka tenklolea bilddingachea utʼtorek aslem.
2 Utʼtore vatten, tachea bhitor sortat tea vattechi lambai 100 hat asli* ani tachi rundai 50 hat asli.
3 Tem 20 hat rund aslolea bhitorlea angnnachea ani fatramnim toiar kelʼlea bhailea angnnachea vatte modem aslem. Hea bilddingeche don bhag asle ani donui bhagant tin-tin mallio asleo, ani tancheo galeri eka-mekak fuddo korun asleo.
4 Jevpachea rumam poilim, bhitorlean cholonk ek vatt asli, ji 10 hat rund ani 100 hat lamb* asli, ani tanchi bhitor sorchi vatt utʼtore vatten asli.
5 Tea bilddingent voir aslole jevpache rum, sokoilea ani modlea mallier aslolea rumam poros oxir asle. Karonn tancheo galeri chodd zago ghetaleo.
6 Jevpachea rumancheo tin mallio asleo, punn angnnant khambe asle toxe tankam khambe nasle. Taka lagon sogleant voile rum, sokol ani modlea mallier aslolea ruma poros oxir asle.
7 Bhailea angnna lagim aslolea jevnnachea rumanchi fatrachi bhaili vonott, ji dusrea jevpachea rumank fuddo korun asli, ti 50 hat lamb asli.
8 Karonn bhailea angnna vatten aslolea jevpachea rumanchi lambai 50 hat asli. Punn je rum povitr zageak fuddo korun asle te 100 hat lamb asle.
9 Bhailea angnna thaun hea jevpachea rumam lagim bhitor ieunk udente vatten ek vatt asli.
10 Udente vatten aslolea angnnachea fatrachea vontti bhitor,* uktea zagea lagim ani bilddinge lagim pasun jevpache rum asle.
11 Utʼtore koddem aslolea jevpachea rumam bhaxenuch hea rumam mukhar cholpachi ek vatt asli. Tea rumanchi lambai ani rundai, toxench tanchi bhair sorchi vatt ani akar, hem soglem utʼtorechea bilddingechea rumam sarkench aslem. Tancheo bhitor sorcheo vatto
12 dokxinnek aslolea jevpachea rumanchea bhitor sorchea vattem bhaxenuch asleo. Cholpache vattechea survatek ek bhitor sorchi vatt asli, ji udente vatten aslolea fatrachea vontti lagim asli. Hanga thaun eklo bhitor soronk xoktalo.
13 Uprant tannem mhaka mhunnttlem: “Utʼtoreche jevpache rum ani dokxinneche jevpache rum je uktea zagea lagim asat, te jevpache povitr rum zaun asat, zoim Jehova mukhar voitat te iadnik bhov povitr bhetto khatat. Thoim te bhov povitr bhetto, daneachi bhett, patka pasot bhett ani farikponnachi bhett dovortat, karonn ho zago povitr zaun asa.
14 Iadnik hanga bhitor ieun seva kortana ghaltat te kopdde povitr astat dekhun, tannim te kopdde ghalun povitr zagea bhair aslolea bhailea angnnant voichem nhoi. Lokank ieunk-vochonk porvangi asa tea zageancher voitana tannim dusre kopdde ghalche.”
15 Devmondiracho bhitorlo zago* mezun zalea uprant, to mhaka udente vatten fuddo korun aslolea darvontteantlean bhair gheun gelo, ani tannem to akʼkho zago mezlo.
16 Tannem tea mezpache boddien* udentecho bhag mezlo. Mezpache boddie pormonnem, eka ponta thaun dusrea ponta meren tachi lambai 500 boddiem itli asli.
17 Tannem mezpache boddien utʼtorecho bhag mezlo, ani tachi lambai 500 boddiem itli asli.
18 Tannem mezpache boddien dokxinnecho bhag mezlo ani tachi lambai 500 boddiem itli asli.
19 To ostome vatten gelo ani tannem mezpache boddien to bhag mezlo. Tachi lambai 500 boddiem itli asli.
20 Tannem charui vatten aslolo zago mezlo. Tea zagea sorvbhonvtonnim ek vonott asli, ji charui vatten 500 boddiem itli lamb ani 500 boddiem itli rund asli. Ti vonott povitr zago ani sadea zagea modem* ontor dakhounk asli.
Footnotes
^ Hem lamb hatachea mapak suchit korta. Mahiti B14 polloi.
^ Grik Septuagint-a pormonnem “100 hatam itli lamb.” Hebrev bhaxen oxem mhunnttlam: “Eka hata itli vatt.” Mahiti B14 polloi.
^ Utran utor, “rundaie bhitor.”
^ Utran utor, “Bhitorlem ghor.”
^ Mahiti B14 polloi.
^ Vo “sadea lokam pasot aslolea zagea modem.”
